Trong kan mĭn uănh, mbơh dăn đă pă dăp ăp ntŭk kan bâh ăp rnâng kan Đảng, Chính phủ n’hanh Quốc hội lĕ geh Kruanh rnâng kan leo kan Trung ương Lê Minh Hưng mbơh tơih ta rơh rƀŭn nchră lơ 1/12 ta năp rlău 1,3 rkeh đảng viên ta lam dak. Kruanh rnâng kan leo kan Trung ương Lê Minh Hưng lĕ mbơh tơih ăp trong kan na nê̆ gay ma pă dăp, ƀư ueh aih ăp ntŭk kan Đảng, Chính phủ, Quốc hội, Mặt trận Tổ quốc, ăp ntŭk kan Chính trị- rêh jêng n’hanh ăp nuĭh ƀon lan yor Đảng, Ngih dak pă nău kan...tĭng trong du ntŭk kan ƀư âk nău kan, du nău kan kanŭng jao du ntuk leo kan n’hanh dơn kan tơm, ndâk nsơm nkra rgâl ăp nău tih mpeh nău dơi, nău dơn kan tơm, trong kan geh mât dơn. Ăp ntŭk kan, n’gâng kan leo kan ntơm nơh lĕ geh pă dăp bôk năp lĕ an geh uănh nđôi dăn mbơh tay, jut jăng răng dăng ăp nău ƀư ndranh. Tĭng trong kan pă dăp, lăp kan ndrel geh kruanh rnâng kan leo kan Trung ương mbơh mbra ƀư n’huch geh 4 ntŭk kan Đảng bâh Trung ương, hŭch 5 n’gâng kan, 2 ntŭk kan bâh Chính phủ mât uănh, hŭch 4 ủy ban bâh Quốc hội n’hanh 1 ntŭk kan bâh Ủy ban rnâng kan Quốc hội...

Mpeh nău wăng sa rêh jêng, Thủ tướng Phạm Minh Chính an git nău wăng sa- rêh jêng 11 khay ba năp lĕ geh âk nău geh dơi khlăy, ueh lơn đah khay aơ ta lĕ rngôch ăp trong kan. Nchrăp lĕ rngôch 15 nău mpŏng kan dŭt âk lĕ dơi geh n’hanh rlău nău nchrăp. Hun hao lĕ năm geh rlău 7%. Chính phủ uănh năl năm 2025 lah năm hun hao ngăch gay ma sĭt tât dŭt lôch, nsrôih an nău geh dŭt âk ăp nkô̆ mpŏng, nău ngluh mbơh kan bâh nău nchrăp 5 năm 2021-2025. Ntoh ngơi ta rơh ntĭm leo rƀŭn nchră Tổng Bí thư Tô Lâm an lah, gay ma dơi geh nkô̆ mpŏng hun hao wăng sa- rêh jêng ma Nghị quyết Đại hội 13 lĕ ngluh mbơh, mpôl he an geh rgâl mhe nău mĭn kan, an geh ƀư kan răng dăng, an geh ƀư lôch, an geh rlet rlău nău kan săk nơm, nău ŭch, ăp gâl kan, ăp n’gâng kan bâh Trung ương tât ta ntŭk kan ba dâng an geh uănh năl nsrôih mpeh chính trị dŭt âk tâm nău ƀư tĭng nău ntrŭnh aơ, cán bộ leo kan, nuĭh leo bôk năp gâl ủy, ntŭk kan an geh hăn lor, leo kan, nsrôih âk lơn tâm nău ƀư tĭng nău kan geh pă jao. An geh njêng nău mhe lơn tay ta rơh kan mhe, doh rklaih ăp nău jêr jŏt, kŏ văk, nău kŏ khan gay ma mbluh aih ăp rnoh nuĭh kan n’hanh rgâl mhe hành chính an răng dăng, njêng ăp nău kan dơh nơih gay ma hun hao lơn.