Dak Lak aƀaơ geh rnoh neh geh ơm, rnoh nuĭh tâm rmôt ăp n’gor, nkual ƀon têh dâk bôk năp lam dak, nkre lah bôk ntung trong khlay bah Tây Nguyên; geh dŭt âk nău dơh gay kan ndrel, boăt nthoi ntŭk ntô hun hao, jêng n’hâm soan ntrôl kan ndrel hun hao wăng sa, văn hóa, rêh jêng đah ăp n’gor tâm nkual Tây Nguyên, duyên hải miền Trung n’hanh ăp ntŭk wăng sa têh bah lam dak. Wăng sa hun hao ngăch, mât uĕh ngăch hao jêng âk rĭng geh 8%/năm tâm 20 năm plơ̆ ma aơ. Lơn lah, Dak Lak hôm lah ntŭk âk nău uĕh lăng mpeh nău khlay văn hóa way ơm, nău way ơm bah nsum mpôl 49 rnoi nuĭh gŭ rêh ndrel, tâm nĕ geh “Ntŭk ntô văn hóa chĭng gong Tây Nguyên” dơi rmôt kan UNESCO kơp dơn lah nkoch trêng I mbung n’hanh drăp ndơ văn hóa mô mpơl săk bah kon nuĭh.

Mhe aơ, tât râng n’hanh ntoh ngơi ta ƀư nkah gĭt 120 năm Dak Lak têh jêng n’hanh hun hao, Groi Thủ tướng Rnâng kan Chính phủ Nguyễn Hòa Bình mĭn lah: jâng nsan khlay, trong kan têh bah n’gor Dak Lak đah nkual n’hanh lam dak dơi năl lah tâm âk nău ntrŭnh nău kơl bah trung ương tă bah ăp rơh. Na nê̆ ngăn lah n’glôn jêh mrô 67 bah Bộ Chính trị mpeh “Ndâk njêng n’hanh hun hao nkual ƀon têh Buôn Ma Thuột, n’gor Dak Lak tât năm 2030, uănh tât năm 2045”; Nghị quyết mrô 72 bah Quốc hội mpeh trong ƀư, nău kơl êng ndâk njêng, hun hao nkual ƀon têh Buôn Ma Thuột jêng nkual ƀon têh nklang nkual Tây Nguyên; Nghị quyết 23 bah Bộ Chính trị mpeh trong rƀŏng hun hao-rêh jêng n’hanh đăp mpăn mât njrăng bri dak, rnă njrăng nkual Tây Nguyên tât năm 2030, uănh tât năm 2045... mĭn lah nău ŭch têh dơi mbak anh n’gor Dak Lak hun hao wăng sa an tâm ban đah văn hóa, rêh jêng, ntŭk ntô gŭ âm, mât njrăng bri dak, rnă njrăng; ndrel đah nĕ, an ta nklang, ntŭk hao jêng bah nkual.

Groi Thủ tướng Rnâng kan Chính phủ Nguyễn Hòa Bình lah rjăp, gay lôch jêh nău dơi ăp nău rƀŏng, nău kan n’gluh an, đă Đảng bộ, n’gâng kan ƀon lan n’hanh Nuĭh ƀon lan ăp rnoi nuĭh tâm n’gor an tâm rnglăp, nsrôih, rgum ntĭm rđău, ƀĭt joet ƀư uĕh ăp nău kan, nău khlay:

Rgŏ jă soan dăng lĕ rngôch, ƀư săk rnglăy nău geh, dơh hun hao, ntrôl dăng hao jêng; rgâl mhe ntrong ƀư wăng sa, kuănh khlay hun hao ăp ndơ lŏ mir, si glê geh ơm, trong ƀư têh, uĕh kah âk, tăch n’gluh âk; ntrôl nău ƀư lŏ mir nkret njêng ndơ lŏ mir, si glê, tui ka n’hanh nkra njêng ŭnh nar; ndâk njêng trong chính trị kloh uĕh, nâp nâl, yor rhŏ an ƀon lan, hun hao wăng sa-rêh jêng, mât njrăng ntŭk ntô, đăp mpăn nău rêh jêng; đăp mpăn mât njrăng bri dak, rnă njrăng n’hanh đăp mpăn nău rêh kon nuĭh.

Wa Nguyễn Đình Trung, Ủy viên Trung ương Đảng, Bí thư N’gor ủy Dak Lak an gĭt, tâm njăr trong hăn êp tât, bah meng ăp rnôk tât, dơh lah bôk năp, Dak Lak dôl dâk ta năp mô đêt jêr jŏt, đă lĕ trong chính trị tâm n’gor an rdâk ƀư tay, mât uĕh têh dăng nuih n’hâm rŏng dak, soan dăng tâm rnglăp lam rnoi nuĭh, joi ƀư ndơ geh, nău dơh; ndăn nău uănh tât bah Đảng, Ngih dak, nău kơl bah nsum mpôl doanh nghiệp n’hanh ăp rơh kơn nuĭh ƀon lan; mât uănh jru, lĕ rngôch, tŏng ăp n’hanh ƀư tĭng rjăp nău mĭn êng “Hun hao wăng sa lah nău kan khlay, ndâk njêng Đảng lah nău kan tơm khlay, ndâk njêng trong chính trị kloh uĕh nâp dăng, dơh nơih, pah kan tam, săk rnglăy; mât n’hanh hun hao văn hóa nău uĕh rnoi nuĭh lah n’gâng tơm bah kon nuĭh, nta n’hâm soan an hun hao nâp nâl; đăp mpăn mât njrăng bri dak, rnă njrăng lah nău kan khlay, ƀa ƀơ.

Đảng bộ, n’gâng kan ƀon lan, tahen n’hanh nuĭh ƀon lan ăp rnoi nuĭh n’gor Dak Lak mbra tĭng tay đah nău way ơm cách mạng têh dăng n’hanh rŏng dak; ryơk n’hanh mât ăp săk rnglăy ma ăp rơh u che lĕ mât rgum; tâm rnglăp, ndrel soan nsrôih rlet rlău jêr jŏt, ntŭl rlong, nsrôih ndâk njêng n’gor Dak Lak hun hao ngăch, nâp nâl, nar lơ ndrŏng uĕh, ntơr ang; rgop jêng nâp nâl ndrel đah lam dak lăp tâm răch năm mhe-răch năm rŭn hao săk nơm bah rnoi nuĭh Việt Nam.

Mât uĕh ndơ geh, nău dơh bah nkual neh geh âk lịch sử, rgum nău khlay văn hóa way ơm bah ăp rnoi nuĭh bah ăp nkual bah lam dak; ntŭk geh nău kan têh khlay n’hanh nklang, n’hâm soan hun hao nkual Tây Nguyên; đah âk nău dơh geh ơm, n’gor Dak Lak dôl nsrôih hao dŭt n’hâm ndâk njêng n’gor nar lơ têh ndrŏng, uĕh lăng.