Năm mât chăm cà phê 2024 - 2025, rnoh khlay cà phê hao khlay tay, ƀư nău ŭch geh mpeh tơm prăk manh đah ăp doanh nghiệp rgum rvăt- tăch n’gluh cà phê. Gay tŏng đah nău ŭch geh mhe, Ngân hàng Ngih dak gŭ kan ta Dak Lak hŏ rđău đă ăp mpôl kan  an manh tơm prăk lor nchrăp tơm prăk ăp tŏng.

 UBND n’gor Dak Lak hŏ dăn đă Ngân hàng Ngih dak Việt Nam gŭ kan ta Dak Lak ơm ntĭm nti, rđău đă ăp ngân hàng thương mại, mpôl kan an manh tơm prăk ta n’gor an rong lor tơm prăk an ăp mpôl kan, ăp nuĭh râng tuch tăm, rgum rvăt, nkret njêng n’hanh tăch n’gluh cà phê manh tâm năm klêh cà phê 2024 – 2025. Tât aƀaơ, ăp mpôl kan an manh tơm prăk ta n’gor hŏ tâm pă geh rlău 8.700 rmen prăk, n’hao 10,3% rđĭl đah năm bah năp nơh. Ăp mpôl an manh tơm  prăk ton mbra tâm pă tơm prăk n’hanh tŏng an  nău učh geh  manh tơm prăk tuch tăm, tăch rgâl, tăch n’gluh bah doanh nghiệp n’hanh nuĭh ƀon lan”. Năm klêh cà phê năm 2024, rnoh khlay cà phê rnglay ta n’gor Dak Lak hŭch ta rnoh 110.000đ tât 125.000đ/kg, âk rlău nklăp 70% tât 80% rđĭl đah rĭng geh bah năm klêh năm e nơh, ƀư mpet jâk mpeh tơm prăk đah ăp doanh nghiệp rvăt, nkret njêng, tăch n’gluh.