N’gor Kon Tum dôl ntrôl dăng tay nău hun hao tơm dak si ta nkual rnoi mpôl đêt kơl nuĭh ƀon lan hao nău geh n’hŭch ach o nâp nâl. Tât aƀaơ n’gor Kon Tum lĕ hun hao geh bơi 11.300ha tơm dak si, tâm nĕ êng rnoh neh tơm sâm Ngọc Linh rlău 2.400 ha. Nău geh bah tơm dak si lĕ kơl hang rbăn rnăk rnoi mpôl đêt ta ăp nkuăl: Tu Mơ Rông, Kon Plông n’hanh Đăk Glei hao rklaih luh ach o, rgop ntrôl wăng sa-rêh jêng ta nkual jru ngai bah n’gor.

Aƀaơ, n’gor Kon Tum dôl mĭn njêng, ndâk ƀư du đêt nău kơl êng ntop kơl nuĭh ƀon lan mpeh ntil, kỹ thuật, nkret njêng... gay nkre pơk hvi rnoh neh nkre n’hao nău khlay ndơ dak si. Gay ntrôl nău hun hao tơm dak si an pơk hvi tu tơm ntil. Tâm rnôk nĕ, rnoh khlay ntil sâm Ngọc Linh dŭt khlay; 1 grăp ntil khlay nklăp 100.000 rbăn, 1 tơm kon 1 năm 300.000 rbăn. Yor nê, Kon Tum dŭt ŭch wăch rgum ntuh kơl an nău kan aơ, mư dơi ndâk njêng geh nkual dak si têh hvi lơn.