Ta năp nu nău srê ji ndŭl djroh sŭr Châu Phi geh nu nău jêr jŏt ta âk ntŭk, n’gor Dak Lak dôl ndăn ƀư tĭng ăp trong njrăng n’gang gay mât đăp mpăn mpôl sŭr n’hanh đăp mpăn poăch pă an ntŭk tăch rơh Tết Nguyên đán Ất Tỵ. Tĭng N’gâng kan tuch tăm mât rong n’hanh Hun hao ƀon lan Dak Lak, năm aơ srê ji ndŭl djroh sŭr Châu Phi ta n’gor geh nu nău jêr jŏt. Tât n’gul khay 11, srê lĕ geh ta 233 rnăk, 120 thôn, 43 xă bah 10 nkuăl, ƀư khĭt n’hanh tâp bôr rlău 2.700 mlâm đah dĭng lĕ bơi 140 tấn.

Gay uănh nđôi srê, Kruanh UBND n’gor Dak Lak mhe geh sam ƀŭt đă UBND ăp nkuăl, nkual têh, nkual ƀon têh n’hanh n’gâng kan, nău kan geh tât mbơh ƀư dŭt n’hâm, tâm ban ăp trong mkra njrăng n’gang srê. Lơn lah, n’gâng kan Tuch tăm mât rong n’hanh hun hao ƀon lan, uănh nđôi nu nău srê, nchrăp lor ntĭm rđău, mbơh ƀư ăp trong đăp mpăn pă an ndơ sông sa bah năp, tâm n’hanh jêh Tết Nguyên đán Ất Tỵ-2025.