Tĭng ăp ntoh măt, dak ngêt geh sĭk lah ngoai tâm ăp nkô̆ ƀư lay săk, aơ lah ăp ntil ndơ jêr nkân sĭk. Wa Nguyễn Kim Thuý, rmôt kan bah Đà Nẵng mbơh:

“Nau ngêt âk ir ndơ geh sĭk lơh khuch ngăn tât nau ji mô tâm ntưp, kơt: Play nuih, chrach njŭng...yor rnoh sĭk lăp tâm săk âk lơn rnoh ŭch. Ndri ma, ăp ntŭk kan dak si lam ntur neh drel rmôt ƀư nau răk mât n’hâm soan, đă đah Chính phủ ăp neh dak dŏng nau mbơh nchră soay tâm ndơ ngêt geh sĭk, gay ma rƀŏng nau dŏng”.

 Ăp ntoh măt tâm ban mpeh rnoh soay đah ăp ntul ndơ kơt lah ndrănh, ƀiêr gay ma n’huch nau dŏng ngêt ndrănh, ƀiêr. Yơn lah, gay ma n’huch nŭih ƀon lan ngêt ndrănh, ƀiêr mô knŭng đah ndơ dŏng soay ma ân geh n’hao nau leo mhal prăk, tâm rgop ma nkoch trêng, mhal prăk. Ăp ntoh măt tâm ban ma nau n’hao soay tĭng ntrong kan đah ma ndrănh, ƀiêr, yơn đah ndrăng ƀiêr ân geh nkah tâm rnôk. Wa Hoàng Văn Cường, rmôt kan bah nkuăl ƀon têh Hà Nội, đă:

 ‘Nơm ân geh uănh tay nau kan mpeh soay đah ƀiêr. Tĭng gâp, nơm ân geh n’hao, yơn rnoh n’hao prêh ngăn lah ndrănh, jêh nê dêh lơn lah ndrănh tâm dâng 20 độ ndrel dêh lơn lah ƀiêr. Kơt nê mơ geh tâm ban”.

Mpeh nau ntop rnoh soay đah hât, tĭng ăp ntoh măt, ân geh n’hao lơn tay rnoh soay đah hât. Yor su hât lơh jêng 28 nau ji. Nchrăp Việt Nam geh rlau 84.500 nŭih khĭt yor hât nchrăp ndrel 18.800 nŭih khĭt yor geh n’hơp hât. Yơn lah, đă kơp ân geh kloh, ngăn lah nau tât đah ntŭk ƀư kan tăch rgâl, pơk trong ân hât geh rvăt tă bah dih. Wa Trịnh Xuân An, rmôt kan Đồng Nai, đă:

 ‘Gâp uănh nê lah nau tât đah ƀon lan ndrel ăp ntŭk ƀư nkra hât su. Rnôk aơ ăp ntŭk kan rgop prăk dăp tal 5, tal 6, yơn lah kơt aơ ri mra pơk trong ân nau geh tâm ƀah ngai ir, ri ma nsŭk ân phung bu tăch ntŭng ndơ, huch tât n’ăp ma nau kan neh dak, rnă njrăng. Ơ lah nau ma ân geh mĭn, nkah tay ntrong kan ân tâm di, gay nơm nkre geh prăk soay nkre đăp mpăn ân ăp ntŭk kan geh ntŭk pah kan, nkre mô khuch tât ƀon lan ƀư nau kan tuch tăm ndrel ngăn lah der nau ƀư ân phung tăch ntŭng ndơ”.

Nchră tâm ngih rƀŭn, wa Trương Trọng Nghĩa, rmôt kan bah nkuăl ƀon têh Hồ Chí Minh, mbơh:

 ‘Mhâm ƀư mô nchrăp tât năm 2024, 100 năm ndâk neh dak ri Việt Nam mra jêng du neh dak mô hôm geh hât. Ăp neh dak êng bu kŏ dôl ma rƀŏng tât neh dak mô su hât. Gâp tâm ban nau lah ân geh nkah nau kan, yơn gâp ân lah ân geh nsôih rjăp tâm nau aơ ndrel mô dơi mĭn êng yor lah klach phung tăng ntŭng ma nơm ƀư nơih lơh tâm nau aơ”.

Mbơh tâm nar rƀŭn, Groi Thủ tướng, N’gâng kan Hồ Đức Phớc ƀư kloh nkô̆ nau ntrŭnh đah hât su:

‘Hât geh nau khuch khat ngăn, ndrel nơm roh nklăp du rmen đôla Mỹ ân nau săm ji geh tât nau khuch bah hât dê lơh. Hât tâm Việt Nam geh rnoh dêh, knŭng ntơm 600 ân tât 20 rbăn dơm, nklăp 7000 prăk dŏng soay ân du ndrôm hăt, tâm rnôk ta Sigapore ri kơp 200 rbăn prăk soay tâm du ndrôm hât. Ndri ma, nchră soay tâm hât đah nkô̆ nau kơt nê”.

 Kruanh n’gâng lah kloh, N’gâng kan dak si Đào Hồng Lan tâm ban ngăn đah nkô̆ nau, nau mĭn ndrel nau khlay ân geh ntrŭnh nau nchrăp Luật soay dŏng ndơ (nkra nkra), ngăn lah nau nchrăp n’hao say đah ăp ndơ geh nau khuch tât n’hâm soan kơt lah hât, ndrănh, ƀiêr ndrel ntop ndơ ngêt geh sĭk tâm rnoh ndơ geh soay. Kruanh n’gâng kan ndŏ luh ăp rnoh ân saơ nau khlay ân nchâp soay đah hât. Yor su hât geh tât 28 nau ji. Nchrăp, Việt Nam geh rlau 100 rbăn nŭih khĭt yor su hât./.