UBND n’gor Gia Lai n’gluh an njuăl siƀŭt gay tĭng ƀư nău rđău đă bah Chính phủ mpeh  jut jăng nhih jay truh sat, nkưp nde, đăp mpăn geh ntŭk gŭ n’hŭt uĕh n’hanh đăp mpăn. N’gor n’gluh rnoh ŭch tât jut jăng rlău 3.000 jay truh sat, nkưp nde bah ăp nuĭh geh n’hâm suan đah cách mạng, rnăk ach o n’hanh rnăk dăch kêng ach o.

Nău ŭch ƀư lôch jêh bah năp khay 9 năm 2025. Tĭng Sở Lao động-Thương binh n’hanh Xã hội Gia Lai, ntơm bah năm 2021 tât aƀaơ, n’gor ntop kơl mon mhe n’hanh nkra tay 4.365 mblâm jay đah lĕ rngôch prăk dŏng ƀư rlău 234 rmen prăk. Yơn  lah, kêng dŭt lôch ôp uănh mơ saơ n’gor hôm rlău 3.000 rnăk ach o, dăch kêng ach o n’hanh nuĭh geh n’hâm suan dơi ntop kơl mon mhe mô lah nkra jay. Gay ƀư ngăch, UBND n’gor hŏ jao an Sở Lao động-Thương binh n’hanh Xã hội kan nsum đah ăp n’gâng kan geh tât rdâk njêng trong nchrăp na nê̆, đăp mpăn năl di nuĭh n’hanh der bah tâm trŭp đah ăp bôk nău  kan. Nkre, Sở Xây dựng geh nău dơn weh ƀư dŭt đêt 3 ntil jay ntĭt lor tâm di đah nău way ta ntŭk, tŏng nâp uĕh n’hanh prăk dŏng ƀư tâm di gay nuĭh ƀon lan dơh sơch.