Tĭng nău mbơh tơih, nău kan njrăng rdâng nuĭh tih, ƀư tih pháp luật geh rgum âk, nău kan njrăng rdâng nuĭh tih lĕ geh mbơh tơih tĭng nău kan na nê̆. Ăp nău mbơh kan bâh Quốc hội pă jao kan bôk năp lĕ geh ƀư lôch, du đê̆ nău mpŏng ntrŭnh kan geh dơi n’hanh rlău đah nău nchrăp. Tĭng nău mbơh tơih bâh Chính phủ mpeh nău kan ƀư phong dôih dân sự, năm 2024 geh du đê̆ nău tih lôch phong n’hanh rnoh prăk geh dŭt âk bâh ntơm tât aƀaơ. Nău ƀon lan tât ta ntŭk vơt ƀon lan bâh ăp ntŭk kan Quốc hội, mpôl Đại biểu Quốc hội hŭch yơn rnoh săm ƀŭt phong, nduĭh dôih, dăn đă, mbơh tơih bâh ƀon lan njoăl tât ntŭk kan Quốc hội hao âk, hao rlău 1 rbăn đơn đah năm 2023. ăp đại biểu an lah nău kan vơt ƀon lan, doh rklaih nău tâm lah tâm phong mpeh nău kan hành chính bâh Quốc hội n’hanh đại biểu Quốc hội lah nău kan khlăy tơm, mpơl nău dơn kan đah ƀon lan, đah ƀon lan an geh tâm rgop bâh trung ương tât ntŭk kan ba dâng. Gay ma n’hao an săk rnglăy, an geh rdâk njêng trong kan mbơh nău mât uănh tâm lah tâm phong, tâm nduĭh mbơh rgum tâm rgop bâh rnoh mbrô ngih dak đah ăp ntŭk kan gay ma uănh nđôi lĕ rngôch nău kan an geh mât uănh dơn uănh tât doh rklaih nău.