Phŭt mrô 3 ndrel ngăn lah phŭt têh ngăn bah dŭt khay 11 năm 20225 hŏ ƀư 1.653 ngih rlâm tâm Miền Trung ndrel Tây Nguyên rlâm, rlau 35 rbăn ngih djơh, âk rmưn rnăk ƀon lan dôl tŭp tâm nau khuch khat. Jêh rhuăt dak, dak bŏk hôm lam Nam Trung Bộ, Thủ tướng Chính phủ Phạm Minh Chính hŏ tât ntŭk lip mpeh ba lơ bah Dak Lak, ndrel geh nau đă chính trị: Nkra ngih ndrel ndâk tay ngih ân ƀon lan jêh âk nau roh hoach aơ!.

‘Phung he ân geh rgŏ ja ‘Nau kan Quang Trung” leo tât nau kan ƀư ndal, ndăn ngăch tâm nau ndâk nkra ngih gŭ. Nau kan Quang Trung rklaih 2 nau kan geh tât ngih gŭ. Ngoai lah nau ƀư mbrơi ngăn bah năp lơ 31/1/2026 dĭng lĕ ăp ngih rlâm, ngih geh nklôn rdu gay nkra tay. Nau kan tal 2 lah nkra ngih gjơh khuch ri ân geh jêh bah năp lơ 31/12/2025”.

Du nar jêh nau rgŏ jă bah Thủ tướng Chính phủ,lơ 1/12, nrtơm bah Hà Tĩnh tât Lâm Đồng, ngăn lah tâm ntŭk tơm phŭt tâm Dak Lak, Khánh Hoà, Gia Lai, rlau 5.600 cán bộ, tahen bah ăp rmôt, bơi tât 5.100 cán bộ, tahen bah rmôt công an hŏ hăn.

Măng yan sial puh dŭt ngăch tâm nkuăl dak lip Hoà Thịnh, n’gor Dak Lak. Tâm nau n’hiăng mpa kĭt, lêr, tâm dak bŏk, ŭnh ang bah ntŭk ƀư nau kan hôm mpoh gay kơl an ăp tahen chuah dak bŏk, anh  ndơ ndâk nkra ngih, khân păng ntơm du nau kan êng ngăn: ndâk tay ngih ân bon lan ta ưbah ăp ntu jru bah dak bŏk. Mô geh nau uh, đă, mô hôm geh nau ntĭm mbơh, “Nau kan Quang Trung’ ndak ntoh ma ăp rnôk kuih neh ma chŭk jâk ty, ăp thung bê tông tâm ndŏ ndrel ăp nhoat jang tâm neh dak bŏk tâm lôch măng.

Trung uý Hồ Hoài Phin, Tiểu đoàn 1, Trung đoàn 143, Sư đoàn 315 (Quân đoàn 5) mbơh, tâm du đê̆ ntŭk neh ngih, ăp nô âk tŏ ƀư yor neh neh mô đăp, mô dăng:

‘Dak bok aơ ri păng krêp ngăn, păng ƀư nkol âk ngăn nau kan bah hên. Bol ma mât âk nau jêr, yơn đah nuih n’hâm nau kan prêh ngăn, oh nô hôm nsôih lôch n’hâm gay ƀư jêh nau kan, ân geh nau dơi nâp prêh ngăn”.

“Njăch ndan’ lah nuih n’hâm ƀư mro bah nau kan Quang Trung, yơn nau ƀư nâp ndrel nau kan dơi geh ndŏ tâm ban ma nau đă nau kan. Thượng tá Đỗ Thành Thái, Chính uỷ sư đoàn 315 (Quân khu 5) mbơh, knŭng geh du nau nsôih gay ăp ntŭk ƀư ân geh dơi n’ăp ma 2 nau đă, nê lah lơn ma nsôih, pah kan tâm măng nar.

‘Bri mih n’hach mô tâm di, mih âk ngăn, yơn lah phung hên mro ntrŭnh đă ma cán bộ, tahen, đạh nuih n’hâm rklaih nau jêr. Pă 3 ca, 4 kíp, ngăn lah n’hao rmôt kan tâm măng nar gay ma phung hên jêh lôch nau kan geh jao”.

Nuih n’hâm “Rlet mih, rlet nar, pah kan bri măng” cán bộ, tahen râng “Nau kan Quang Trung” mô ân nơm ƀư mbrơi ôh. Ntơm bah ôi ơm tât rnôk ƀon lan mpoh ŭng, ăp nŭih tahen hôm lăp tâm bŏk, hôm dŏng thung gay ma choh bê tông, nŭih ri lŏ hao klơ giàn giáo ndâk ngih, ndâk meh. Rđau kan ndrel ƀư, ăp tahen ndrel mbăk nau kan jâk.

Đah nŭih ƀon lan nkuăl dka lip, nau kan geh saơ bah năp măt nơm ăp ngih geh mhe ndâk bah nơm dơi geh ƀư jêh tâm bri măng mô êng lah nau rhơn,ma hôm lah ‘nau săm bah” ueh an nuih n’hâm jêh ăp nar roh hoach. Wa Lê Hùng Nhựt, thôn Mỹ Điền, xã Hoà Thịnh, n’gor Dak Lak, nkoch nau:

‘Chính phủ leo tahen jur kơl an ƀon lan kơt aơ ri hên saơ rhơn ndrel nkah gĭt ngăn. Lah mô geh ăp kônh tahen kơl an, ê nkoch ôh nau ndâk ngih, nau  rep ngih vâl hôm geh nklă klêng kơt aơ ri kŏ mô dơi ƀư êng ơm’.

Jêh 3 pơh ntrŭnh “Nau kan Quang Trung” ăp ngih mhe ntơm geh ndâk nkra tâm ăp ntŭk neh bŏk. Aơ mô êng lah ntŭk nkŭm mih, nar, gay ƀon lan tâm dăch mât rjăp tâm ƀon tơm jêh mih dak lip. ‘Nau kan Quang Trung” hŏ rlet rlau bah nau jâk dơi bah du nau kan rklaih nau khuch khat bah trôk nar lơh, jêng du nau ntoh mhô ueh mpeh n’hâm dăng tâm rnglăp ndrel nau kan chính trị bah năp măt. Nau đă bah nŭih dâk bôk Chính phủ hŏ ndal nthoi nau kan ƀư ngăch ndal bah ăp tahen. Ăp ngih geh ndâk ma nthưp gay ma nkŭm ân ƀon lan, băl mpol jêh ri geh rưih lơi, gay lơi ân bah lơi ăp ngih mhe, kơt lah nau nkah bah nau nsôih ndrel nau ŭch rŏng. Ăp nau kan ueh ơm aơ hôm geh ndâk ƀư đah nau mĭn mhe, đăp mpăn nau nâp gay ma nsôih ndrel nar, măng, khay, kơl an ƀon lan ueh nâp lơn tâm ăp nau tât bah trôk nar tă lơh khuch./.