Ngih wa Nguyễn Đình Phong êp dak sông Gianh. Ngih aơ geh 2 dăp, tâm dâng gŭ, klơ ri ƀư “bảo tàng kon jê̆”. Ntŭk aơ lĕ rnăk wa Phong mât, prăp ăp nau ueh, rup wa Hồ, Đại tướng Võ Nguyên Giáp, ăp kruanh, tahen janh dăng, Mẹ Việt Nam janh dăng ntoh lư bah rnoi mpôl Việt Nam.

            Hŏ rlau n’gul rach năm ma aơ, ăp ndơ bah wa Phong geh rlau 3000 rup, săm ƀŭt khlay nkoch tât Wa Hồ bah ăp rnôk, ntơm rnôk deh, têh, ndăm ndrel hăn joi trong kơl an neh dak, nau kan cách mạng bah Wa. Wa Nguyễn Đình Phong nkoch, âk nau nchih nau khlay tât nau rêh bah ƀon lan ndrel rnoi mpôl kŏ geh wa nkah, mât nâp:

            Năm 1969, neh dak hôm tâm lơh, rnôk nê Wa Hồ roh hôm. Tât năm 1975 neh dak đăp mpăn ri Wa mô hôm ôh, wa lôch nau rêh kơl an neh dak. Gâp joi ăp rup aơ gay ăp nŭih ndrel gĭt, ân geh nau rŏng đah Wa ri gâp hăn joi, mhe geh ƀư nau aơ ndrel kan aơ mô nơih. Rnôk joi âk ri gâp mĭn nau mât ăp rup aơ, jêh ri mpla gay ăp nŭih ndrel uănh ndrel ngăn lah leo hăn mpla yâm ăp ngih săm ƀŭt gay kon se nti uănh’.

            Ntrong joi rup nkoch tât Wa Hồ bah Phong kŏ mâp âk nau jêr. Wa rlu nau kan yor mô hôm dăng, rnôk sĭt rlu mô geh prăk, nau văng sa mô geh ri ma wa mâp âk nau jêr rbôk rvăt săm ƀŭt, rup, ép Plastic gay ma mta, geh rnôk wa mâp săm ƀŭt ueh, geh rup khlay tât Wa Hồ ma wa ŭch yơn lah păng ŭch dăn ri bu mô ân, rvăt mô tăch. Rnôk nê wa knŭng dăn bu ân nklih rup Wa Hồ, geh rnôk wa ŭch rup ueh bah Wa Hồ knŭng du plơk ma wa rvăt lĕ ma du ndrôm săm ƀŭt. Nau joi, rgum jêr lơn rnôk ngih wa Phong êp dak me sông Gianh, ăp năm dak lip. Tât yan lip, wa Phong ntrơn ndơ khlay ngăn bah nơm nê lah ăp nau geh tât Wa Hồ hăn tât ntŭk đăp mpăn lor.

            Wa Nguyễn Hồng Sâm, 90 năm, tâm thôn Tân An, xã Quảng Thanh, nkuăl Quảng Trạch lah nŭih tâm dăch ma păng, vay kơl an wa Phong tâm nau joi rup Wa Hồ. Wa Sâm mbơh, wa Phong ŭch ngăn joi, ri ma lah geh mâp rup, săm ƀŭt nkoch tât Wa Hồ, wa Sâm kŏ mbơh ân wa Phong gĭt gay hăn joi rgum. Tĭng wa Nguyễn Hồng Sâm, săm bŭt khlay tât Wa Hồ hŏ rgop ân nŭih uănh ăp nau ueh tâm nau rêh, nau kan bah Hồ Chí Minh:

            ‘Lah nkoch tât nau hăn joi ndrle mpla ri mô geh nŭih dơi ƀư ơm, ndrel knŭng geh wa Phong dơm ƀư nau aơ du ngăn. Bol ma wa Phong mô geh prăk khay, mô geh prăk yor roh n’hâm kan, yơn wa ŭch ngăn, ăp khay rnôk gâp geh ndơn prăk khay ri kơl ân wa Phong đê̆ gay ma rvăt rup nsĭt rgum. Wa Phong tă uănh nau hăn joi, mpla tâm ngih săm ƀŭt gay rêng, kơl an ăp nŭih gĭt tât nau kan bah wa Hồ, ntĭm ân rơh ba kơi nthoi tay ndrel gĭt nau aơ”.

            Khay 5 lah rnôk nkah 135 nar deh Kruanh Hồ Chí Minh. Tâm ngih jê̆ bah wa Phong êp sông Gianh lŏ geh nŭih hăn uănh rup ueh Wa Hồ, săm ƀŭt khlay ma wa Phong hŏ hăn rgum joi.

            Yuh Trần Thị Vân, đoàn viên xã Đoàn Quảng Thanh, nkuăl Quảng Trạc lah, mô kâp hăn ngai ơm, ăp băl mom lah ŭch gĭt tât nau ơm, nŭih ntoh lư bah ăp rơh ndrel joi ăp nau ueh tât Wa Hồ ri knŭng tât uănh ntŭk ‘bảo tàng jê̆” bah wa Nguyễn Đình Phong:

            ‘Gâp saơ ăp rup nkoch bah Wa Phong, gâp saơ nau ryơk đah rđau kan ŭch rŏng bah rnoi mpôl, rgop nau mât ndrel ƀư rêng nau ueh tât Wa Hồ. Ntŭk aơ kŏ kơl an rơh mom geh dơi joi mpeh nau rêh, nau kan bah Wa. Âk rbăn plơk rup nkoch bah Wa Hồ geh wa Phong dăp tĭng trong khoa học, nkoch ăp nau nau ndrel mbơh, n’hơ ân ăp nŭih uănh tâm ăp rnôk ơm, gay ăp rơh mom joi, kơt tĭng nti tĭng nau ueh ang bah Wa Hồ”./.