Du nau kan jru geh Rmôt bu ur nkuăl Thuận Châu (ơm) tâm rgop ngăn ma ăp n’gâng kan dak si Sơn La ntrŭnh ƀư tâm 23 xã jêr ngăn, Đah nkô̆ “nkoch nau lor, kơl an ba kơi”, ăp cán bộ hội ndrel nai dak si tât ăp thôn, ƀon, bonh đă, rgâl ‘nau mĭn, nau kan”.  wa Lường Thị Thanh Thuỷ, Groi Bí thư Đảng uỷ xã Thuận Châu, Kruanh rmôt bu ur nkuăl Thuận Châu (ơm) mbơh, rnoh kơl an deh kon đăp mpăn rƀŏng tât ăp cán bộ hội, nŭih bu ur ndrel ngăn lah bu ur rnoi mpôl đê̆ lah nŭih geh kơl an nau aơ. Rnơm nê, rnoh nŭih bu ur rnoi mpôl đê̆ geh kơl an nau aơ âk ngăn kơp ntơm năm 2021:

‘Tâm rnôk rơh 1 (2021-2025), Thuận Châu hŏ ntrŭnh ƀư âk ăp nkô̆ nau kơl an deh nse ân đăp mpăn tât ăp ntŭk kan hội. Ri ma ăp nŭih oh nur rnoi mpôl đê̆ geh kơl an nau kơl an ueh mpeh deh nsre đăp mpăn dŭt âk ngăn”.

Gay nơih lơn, rmôt bu ur nkuăl Thuận Châu (ơm) hŏ ƀư Jrâu ntĭm nti n’hao nau dăng nau kan. Nŭih râng lah ăp cán bộ bu ur ndrel cán bộ ngih dak si xã, ăp nŭih ƀư kơl an nau kan kơl tâm ntŭk. Rmôt kŏ dŏng đăp mpăn tơm prăk bah nau kơl an gay ma dŏng kơl ăp nŭih bu ur rnoi mpôl đê̆ deh kon đăp mpăn tâm ăp ngih dak si ngih dak.

Kŏ tĭng wa Lường Thị Thanh Thuỷ, ntơm năm 2021-2024, nkuăl Thuận Châu (ơm) hŏ kơl an rlau 1.600 nŭih bu ur rnoi mpôl đê̆ mpeh nau kan deh nse ân đăp mpăn. Rnoh prăk dŏng ân ăp nŭih me hao tât 2,4 rmen prăk. Aơ lah ngoai tâm ăp nkuăl geh rnoh nŭih me lah nŭih rnoi mpôl đê̆ geh kơl an deh nse âk ngăn tâm n’gor Sơn La:

“Lor ma ntrŭnh ƀư nau kơl an aơ (bah năp năm 2021), rnoh bu ur rnoi mpôl đê̆ tât khám rnôk bŭn ƀa ƀơ ndrel deh kon tâm ngih dak si hôm dêh ngăn, knŭng geh nklăp 600 nŭih ăp năm dơm. Yơn lah, knŭng jêh 3 năm ƀư nau kan, rlau 1000 nŭih bu ur ndrel kon se hŏ geh rgâl ngăn, rnoh nŭih me khĭt yor deh kon huch âk, rnoh kon se khĭt jêh mhe deh kŏ huch âk ngăn đŏng”.

Ăp nau tă dơi geh aơ lah nau tơm gay mrôt bu ur Thuận Châu đă nau ma Trung ương, n’gor ndrel ăp n’gâng kan lŏ ntrŭnh nau kơl an tâm rơh 2 (2026-2030) gay lŏ kơl an bu ur rnoi mpôl đê̆ tâm n’gor. Đah bơi tât 2,5 rmen prăk geh pă ƀư, rlau 1000 bu ur ta Thuận Châu geh kơl an âk lơn. Rlau du rbăn kon se mhe deh ueh lăng, rlau du rbăn nŭih me geh mât chăm ueh. Yuh Lò Thị Hồng, bu ur rnoi Thái, nkoch:

‘Bah năp nơh hên klach ngăn hăn ngih dak si xã, lŏ mô geh prăk. Rnôk aơ geh cán bộ tât tâm ngih bonh đă, lŏ geh kơl an prăk sa, prăk hăn ro, phung hên đăp mpăn ngăn. Kon nơm mhe deh ri săk jăn dăng ueh lah nau rhơn ngăn ngên”.

Bôk nau kan mrô 8 mô êng lah nau tơm leo tât ma nkuăl jêr, ma nau khlay lơn, hŏ leo nau gĭt, rgâl nau mĭn ndrel pă nau dơi đăp mpăn ân nŭih me tâm nkuăl yôk prêh, rgop nau ƀư nâp nau geh dơi dăng ân rơh mom ueh lăng, ngăch prăl ndrel tâm ban lơn./.