Nkhêp di 78 năm Nar Thương binh-Liệt sĩ (27/7), kêng măng 15/7, Tổng Bí thư Tô Lâm lĕ tât khâl, an ndơ ăp tahen ơm, tahen sôt rmanh n’hanh nuĭh geh soan đah cách mạng ta Ntŭk Mât săm tahen sôt rmanh Thuận Thành (Bắc Ninh). Tổng Bí thư nkoch nuih n’hâm nkah gĭt jru n’hanh nău ryơk têh đah ăp nuĭh lĕ roh, n’hâm soan an nău đăp mpăn rnoi nuĭh.

Tổng Bí thư lah rjăp, Đảng, Ngih dak n’hanh Nuĭh ƀon lan uănh nuĭh geh soan lah drăp ndơ têh khlay bah rnoi nuĭh, lah rup ndah têh bah nuih n’hâm rŏng dak n’hanh nău rêh Việt Nam. Nău “Rsơl plơng”, “Ngêt dak kah gĭt tu dak” mô knŭng lah nău kơl têh ma hôm lĕ nău kan chính trị n’hanh nău rêh jru. Tổng Bí thư đă Ntŭk kan tâm rgop tay đah ăp ngih pah kan dơi kan gay mkra ngăch, tŏng ăp trong ƀư, nău kơl đah nuĭh geh soan, tahen ơm, tahen sôt rmanh tĭng nău ntrŭnh pháp luật, rgop mât uănh uĕh lơn nău rêh drăp ndơ n’hanh nuih n’hâm an khân pơng.