Nkah ndray 95 năm njêng Đảng Cộng sản Việt Nam (3/2/1930 -3/2/2025), ta Hà Nội, Học viện Chính trị quốc gia Hồ Chí Minh kan nsum đah Ban Tuyên giáo Trung ương ƀư Tâm nchră khoa khoa học neh dak: "Đảng Cộng sản Việt Nam - 95 năm Đảng sŏng tât geh đăp mpăn rnoi nuĭh n’hanh chủ nghĩa xã hội, rdâk njêng neh dak, ndrŏng uĕh, rhơn răm". Wa Nguyễn Xuân Thắng, Giám đốc Học viện Chính trị quốc gia Hồ Chí Minh lah rjăp: Đảng ân rgâl dăng tay mpeh nău mĭn hun hao đăt ndal tâm ăp nău n’glêh an têh jong, tâm  hun hao blău njêng mhe mô rlu, gay n’hao nău dơi kan, bôk rngok gĭt blău, han săk rđău đă n’hanh trong uănh têh jong sôt hơr tâm lor luh gung trong jong bah Đảng.

 Khay năm mhe 1930, Đảng Cộng sản Việt Nam njêng luh, ntơm jâng khlay tâm lịch sử cách mạng Việt Nam. Ta tâm nchră njêng Đảng (ƀư ntơm bah nar 6-1 tât 7-2-1930), Đảng Cộng sản Việt Nam hŏ ntrŏng gung trong hun hao bah cách mạng Việt Nam lah: "ƀư tư sản dân quyền cách mạng n’hanh thổ địa cách mạng gay hăn tât xã hội cộng sản", tĭng ƀư rnoh ŭch tât kan: "Đăp mpăn rnoi nuĭh n’hanh chủ nghĩa xã hội". Đah gung trong cách mạng sŏng di, khoa học n’hanh blău ƀư mhe, ntơm bah rnôk njêng luh tât aƀaơ, Đảng Cộng sản Việt Nam way du trong sŏng tât nău đăp mpăn n’hanh chủ nghĩa xã hội, rđău đă ƀon lan Việt Nam njêng ăp nău dơi têh kuâng, tĭng ƀư rnoh tât rdâk njêng neh dak Việt Nam ƀon lan geh ndrŏng, neh dak têh dăng, ƀon lan ƀư tơm, geh nău tâm ban, srăch uĕh. PGS. TS Bùi Đình Phong, Học viện Chính trị Quốc gia Hồ Chí Minh lah rjăp:

"95 năm ta nâm nău rđău đă bah Đảng he geh nău dơi têh kơt aƀaơ ri nê lah geh 3 nkô̆ dŭt tơm khlay. Bôk năp, ân năl di nău rđău đă bah Đảng lah ndơ khlay bôk năp n’glêh an tât nău dơi bah cách mạng. Nău tâl bar dŭt khlay lah he ân mât nâp chông cờ đăp mpăn rnoi nuĭh n’hanh chủ nghĩa xã hội. aơ lah du trong đăt ndal blău njêng mhe mpeh  măt lý luận bah Wa Hồ tât Đảng n’hanh nơm geh kơt nê ma he geh nău dơi. Nău tâl pe nê lah suan dăng bah bah ƀon lan lah tu tơm bah nău dơi cách mạng".

Ăp nău dơi bah 95 năm hŏ rdâk nâp jâng nsing, njêng suan ntrôl dăng bah Đảng rđău kan tay neh dak nâp jâng chuat lăp tâm rơh hun hao mhe – rơh hun hao lhung jong săk bah rnoi nuĭh he. PGS.TS Nguyễn Viết Thảo, Ủy viên Hội đồng Lý luận Trung ương lah rjăp:

"Ntŭk ŭch tât tâm rơh hun hao lah ân rdâk njêng du dak Việt Nam XHCN têh dăng, geh ndrŏng, srăch uĕh, tâm ban đah ăp dak têh ndrŏng lam ntŭr neh kơt Wa Hồ hŏ n’gluh lah bah năm 1945, nê lah ntŭk ŭch tât geh. 2 nău ŭch tât dŭt kloh, tât năm 2030 ân jêng dak dôl hun hao, geh jâng nsing ƀư njêng công nghiệp têh mhe, rĭng geh tĭng bôk nuĭh âk, gay tât năm 2045 jêng dak Xã hội chủ nghĩa hun hao, nsĭt geh wăng sa âk. Gâp dăn lah rjăp tay lah ân jêng dak Xã hội chủ nghĩa, tâm ban, ƀon  lan ƀư tơm, srăch se, hun hao uĕh, geh ndrŏng, ăp tŏng rhơn răm".

Ta tâm nchră, Giám đốc Học viện Chính trị Quốc gia Hồ Chí Minh Nguyễn Xuân Thắng an lah, gay tĭng ƀư geh nău dơi ăp rnoh hun hao tât năm 2030, uănh ngai tât năm 2045, Đảng ân rgâl mhe dăng tay nău mĭn hun hao, geh ăp trong đăt ndal ăp n’glêh an têh jong, ntik n’hao nuih  n’hâm blău njêng mhe, mô rlu n’hao nău dơi blău bôk rngok, han săk chính trị n’hanh trong uănh jong sôt hơr tâm gung trong tor luh, nchrăp lor:

“Đảng ân rgâl mhe tay dăng mpeh nău mĭn hun hao, jêng lah ân geh đăt ndal ngăn tâm ăp n’glêh an têh jong, tâm ntik n’hao nău blău mhe mô gŭ rlu, gay n’hao nău dơi kan, bôk rngok gĭt blău, han săk rđău đă n’hanh trong uănh têh jong  sôt hơr tâm tor luh gung trong têh jong bah Đảng. Ân đăm gĭt jru nău mĭn têh jong rloh rlău bah Đảng lah “ân hun hao ngăch n’hanh jŏ jong neh dak”, tâm nê hun hao wăng sa- rêh jêng kon nuĭh  n’hanh mât njrăng ntŭk gŭ rêh lah rgum tơm, rdâk njêng Đảng lah n’gâng sơn nâp tay, cán bộ lah “n’gâng tơm bah n’gâng tơm”; hun hao văn hóa n’hanh kon nuĭh lah jâng nsing tơm. Aơ lah tơm drăp ndơ, nău dăng blău tâm trôm săk tơm, tơm suan n’hanh suan ntrôl bah nău hun hao”.

Lah ta rnôk tâm nchră, Kruanh Ban Tuyên giáo Trung ương Nguyễn Trọng Nghĩa lah rjăp nău n’hao êng săk mpeh nău way ơm 95 năm Đảng rđău đă cách mạng Việt Nam, đah nău mbăk anh jâk nsrôih rdâk njêng tay nău kan, bun dăp ăp nău dơi, rnoh khlay bah Đảng. Wa Nguyễn Trọng Nghĩa nsing nơm Tâm nchră mbra rgop uĕh an pah kan gŭ mĭn, nkoch trêng, ntĭm nti nuih n’hâm uĕh lŏng chrat ang bah kruanh Hồ Chí Minh, ăp kruanh rđău kan cách mạng ơm bah năp, rơh kơn đảng viên rôih dăng, mô dơi roh... an nar aơ n’hanh ôi tay klak. N’hao dăng bun dăp, n’hao têh lơn đŏng nău nsing nơm bah ƀon lan đah Đảng, njêng nău tâm ban ŭch âk mpeh nău mĭn, nău rvê n’hanh dâk kan tâm lam Đảng, lam ƀon lan, lam tahen, yor du Việt Nam "bah tâm lơh tâm su, đăp mpăn, geh nău tâm ban, têh ndrŏng, srăch se, rhơn răm, nâp jâng chuat hao chủ nghĩa xã hội"./.