Ta nkual Tây Nguyên, nuih n’hâm nsan bah nar rgum njŭn hăn tahen dôl khuh n’gôr. Druh ndăm nđơr hăn lăp êng tahen, tâm nê geh âk druh ndăm rnoi mpôl đê̆, lah đảng viên, n’hanh ăp sinh viên hŏ lôch jêh nti đại học.

Nar 12/2, ăp nkuâl, nkual ƀon têh bah n’gor Lâm Đồng du rơh ƀư rgum njŭn hăn tahen năm 2025, đah rlău 1.200 tahen mhe nchrăp hăn, tâm nê bơi du n’gul lah nuĭh rnoi mpôl đê̆. Năm aơ, n’gor Lâm Đồng geh rlău 1.200 tahen mhe lăp, tâm nê bơi du n’gul lah nuĭh rnoi mpôl đê̆ n’hanh rlău 50% geh siƀŭt nchih dăn lăp êng tahen. Tâm rnoh dja, tahen mhe geh trình độ trung cấp, cao đẳng, đại học âk 7,6%, trung học phổ thông âk rlău 36%, lơn lah geh 23 tahen mhe lah đảng viên, tâm nê geh 11 đảng viên nuĭh rnoi mpôl đê̆. Tahen mhe Lơ Mu Tha Ni, đảng viên, 21 năm deh, nuĭh K’ho, ta thôn Đạ Nghịt 1, xã Lát, nkuâl Lạc Dương rhơn an gĭt, săk nơm n’hanh rnăk wâl dŭt rhơn n’hao êng rnôk siƀŭt dăn lăp êng tahen ŭch dơn, jêng tahen mhe hăn lăp ƀư tahen ngăn gay dơi kơl an, rdâk njêng n’hanh mât njrăng neh dak.  

Bol ma lôch nti Đại học, geh nau kan đăp mpăn, yơn âk bu druh ndăm tâm n’gor Gia Lai hôm nsôih dăn hăn lăp tahen, nthoi nau vay ơm bah rnăk vâl ndrel nau ŭch ƀư kan ân nhe dak. Bah năp nar hăn tahen, Lê Thị Hồng Ngọc, tâm xã Diên Phú, nkuăl ƀon têh Pleiku răk êng săm ƀŭt dăn hăn lăp tahen ân rnăk vâl ndrel djăt. Tâm ban ma nê, bu druh Lê Thanh Mai, tâm Phường Yên Thế, nkuăl ƀon têh Pleiku kŏ têh druh tâm rnăk vâl tahen, bol ma lôch nti Đại học Chuyên ngành Y dược, yơn rnôk aơ kŏ nchih săm ƀŭt dăn hăn êng tahen. Ngăn lah, tâm rnăk vâl pah kan lŏ mir tâm xã Ia Piar, nkuăl Phú Thiện, n’gor Gia Lai, bu mom rnoi Jrai, Ksor Thanh mhe lôch nti Đại học Luật-Đại học Huế, kŏ hăn tahen ƀư nau kan tâm rnôk aơ đŏng./.