Ngih sam ƀŭt Cư Mlan, nkuăl n’har bri geh rlău 600 kon hŏk tĭng nti bah jrô 1 tât 5. Tâm  rnoh aơ geh rlău 140 oh dôl gŭ ta ngih sam ƀŭt n’hanh bơi 40 kon hŏk êng bah du ngih sam ƀŭt ndrel xă. Wa Trần Thị Thủy-Hiệu trưởng ngih sam ƀŭt an gĭt, lĕ rngôch ăp kon hŏk nội trú dơi ntop kơl du gâl prăk sa nung nar n’hanh măng. Rnoh ntop kơl lah 8.500 prăk du hê kon hŏk du tơ̆ sa. Nău ntop kơl prăk sa nung nar măng lĕ kơl me bơ̆ kon hŏk bah oi mbak jâng prăk kaih, kơl ngih sam ƀŭt mât ŭnh năk jŏ jong, kon hŏk geh tŏng ndơ kah hun hao săk soan, nti nsơm. Wa Trần Thị Thủy an gĭt:

“3 năm aơ rmôt kơl kan lĕ mât n’hanh ntop kơl an ăp oh kon hŏk nội trú geh piăng sa đăp mpăn, ndrel ty đah ngih sam ƀŭt ntop kơl geh nău rêh uĕh ta nkual nội trú jŏ jong. Lah mô geh khân pơng kơl ma ngih sam ƀŭt sa êng ri dŭt jêr ƀư. Ngih sam ƀŭt mpŏng ăp nuĭh lŏng bôk tôr hăn ndrel tay ntop kơl piăng sa an ăp oh kon hŏk”.

Aƀaơ ngih wâl ndoh ndơ ăp ngih sam ƀŭt ta n’har bri Ea Súp, n’gor Dak Lak lĕ dơi ntuh kơl kloh uĕh, đah tŏng ăp ndơ ntĭm n’hanh nti. Yơn lah, yor ntŭk ntô têh. Nău ndơ̆ wơt oh kon ăp nar mâp âk jêr jŏt, me bơ̆ way săch trong manh jay êp ngih sam ƀŭt. Oh Phùng Trung Hiếu, kon hŏk jrô 2 Ngih sam ƀŭt Tiểu học Cư M’lan nkoch, ngih sam ƀŭt ngai bơi 20km mê̆ bơ̆ an manh jrô gŭ tâm rgop đah âk kon hŏk êng. Nău ngêt sa, gŭ âm mâp âk jêr ŏt. Bah rnôk dơi lăp gŭ ntŭk nội trú n’hanh dơn ntop kơl prăk sa, nău gŭ âm nti nsơm dơh lơn dŭt âk.

“Bah năp đaơ kon gŭ jrô manh êp ngih sam ƀŭt, sa nsum, ăp nuĭh sa ngăch jêng kon mô dơi sa hơm. Yơn aƀaơ lăp sa gŭ nsum ta nội trú, kon dơi sa âk hôm, tŏng ăp ndơ”.

Tĭng wa Đăng Quốc Vương-Bí thư Nkuăl Đoàn Ea Súp, nău rêh bah kônh wa ăp rnoi nuĭh ta nkuăl Ea Súp hôm e âk jêr jŏt, lơn lah ăp oh kon hŏk. Bah n’gul năm 2018, nkuăl đoàn tâm rgop đah Ntŭk kơl kan Ngih dak n’hanh du đêt nuĭh lŏng bôk tôr tâm n’hanh bah dih n’gor Dak Lak ntơm ƀư ntop kơl prăk sa gŭ bah dih, gŭ ta ngih sam ƀŭt an âk kon hŏk ach o ta nkual n’har bri; ndâk njêng nkual jay gŭ nsum đah rnoh prăk bơi 800 rkeh an ăp oh geh ntŭk sông sa, gŭ âm, mĭn nău nti nsơm. Nkuăl đoàn dôl kuăl jă tay ăp nuĭh lŏng bôk tôr ta lam dak mât nău ƀư bôk nău kan n’hanh gay nar geh âk kon hŏk ach o ta nkual n’har bri dơi dơn.

“Bôk nău kan “mât oh” lĕ mbơh ƀư an năm tal 3. Tă bah bôk nău kan, ăp oh dơi nti gŭ âm ngêt sa tŏng ăp ta ngih sam ƀŭt. Rnôk nău rêh đăp mpăn, ăp oh dơi nti, râng ăp nău ƀư bah ngih sam ƀŭt dơh lơn, dơh âk lơn. Mpôl hên mpŏng ăp rmôt kan, êng nuĭh hăn ndrel tay bôk nău kan dơi mât jŏ jong, nar lơ geh âk kon hŏk ach o ta nkual n’har bri geh dơn, tât tay ngih sam ƀŭt”.