Đah 30 năm nsơr soan tâm pah kan, yuh H’Er Niê Kđăm, Chuyên viên Jrô kan rnoi nuĭh nkuăl Cư M’gar, n’gor Dak Lak nkoch, yuh saơ nău kơl an cán bộ rlu ranh ơm tĭng Nghị định 178 lah tâm di. Yuh H’Er nsing nơm, ăp đồng chí mom lơn mbra mât uĕh tay n’hâm soan bah nơm n’hanh săk yuh geh nău rgop tâm di tay an nsum mpôl ntŭk gŭ rêh.

Jêh rnôk rlu ranh, gâp mbra plơ̆ sĭt đah ƀon lan. Tâm rnôk pah kan gâp lĕ nkrem nău blău bah nơm mbra sĭt đah ƀon lan, moh nău ƀon lan mô wât ri mbra kơl ƀon lan, ntĭm an ƀon lan ƀư sa hun hao. Lah gâp dơi râng pah kan ta thôn ƀon nơm mbra nsrôih kơl ƀon lan.

Tâm ban ma nĕ, Kỹ sư Nguyễn Ngọc Giao, Kruanh Jrô kan Tuch tăm mât rong n’hanh hun hao ƀon lan nkuăl Cư M’gar, lĕ nchih sam ƀŭt dăn rlu ranh ơm. Wa Giao nsing nơm, rơh ngăch dơh n’gâng kan ƀĭt joet dôl ƀư lĕ trong chính trị mbra nsĭt tay nău geh jŏ jong an nuĭh ƀon lan n’hanh nău hun hao nâp nâl. Đah nău kan tuch tăm, mbra kơl hun hao lŏ mir uĕh âk, nsĭt tay nău geh uĕh an kônh wa ƀon lan.

Gâp dŭt mpŏng ăp rơh nthoi tay bah kơi aơ an mât uĕh nuih n’hâm lĕ đah nău kan n’hanh ndơ geh bah rơh hăn lor lĕ ƀư an m’hâm ƀư n’hao uĕh tam, săk rnglăy tâm nău kan chính trị bah Đảng n’hanh ngih dak pă jao.

 Kơp tât lơ 10/1, nkuăl Cư M’gar lĕ geh 16 cán bộ nchih sam ƀŭt dăn rlu ranh ơm. Wa Nguyễn Thiên, Groi Bí thư Rnâng kan Nkuăl ủy Cư M’gar, an gĭt, Ban Thường vụ Nkuăl ủy mbra uănh mĭn tay tĭng nuĭh, đăp mpăn nău kơl tâm di tĭng nău ntrŭnh bah pháp luật. Wa Nguyễn Thiên lah rjăp:

Gâp an lah ăp đồng chí lĕ dơi saơ nău ŭch, nkô̆ nău bah năp dăp ngăch jêt n’gâng kan ƀĭt joet. Rnôk ƀư pah kan nău rĭng ri ăp đồng chí dŭt răm, jêng tâm pah kan rmôt cán bộ ăp đồng ŭch êng ri Mpôl rdâk ƀư dơh lơn n’hanh rnôk geh nău kơl ri nsrôih nta an ăp đồng chí dơi geh tĭng di nău ntrŭnh.

Ndrel đah Cư M’gar, ăp ntŭk êng tâm n’gor Dak Lak djôt dơn âk nuĭh cán bộ dăn rlu ranh ơm tĭng Nghị quyết 18. Lĕ geh 7 cán bộ, đảng viên mpeh tâm Ban Thường vụ N’gor ủy mât uănh, tâm nĕ geh 2 Ủy viên Ban Thường vụ N’gor ủy, 1 Bí thư Nkuăl ủy nchih sam ƀŭt dăn rlu ranh ơm. Lah Bí thư Nkuăl ủy bôk năp bah Dak Lak ŭch êng dăn rlu ranh ơm rnôk hôm e 6 năm pah kan, wa Ra Lan Vôn Ga, Bí thư nkuăl ủy M’Drắk nkoch:

Gâp rlu ri gâp mpŏng geh ntŭk an rmôt kan kơt ăp ntŭk kan tâm rnôk dăp ndâk lăp nsum geh cán bộ uĕh lơn gâp, ngăch blău lơn gâp gay pah kan n’hanh nsơr soan kơl an nkuăl n’hanh an n’gor nar lơ hao. Rnôk gâp dơi rlu ranh, hôm e geh, hôm e dăng săk soan n’hanh đah nău nti bah gâp mbra joi du nău kan tâm di gay rgop an hun hao bah săk nơm kơt nsum mpôl n’hanh nău rêh kon nuĭh.

Wa Nguyễn Thượng Hải, Kruanh Ban Tổ chức N’gor ủy Dak Lak an gĭt, tĭng trong nchrăp, n’gor mbra n’hŭch đêt ngăn 15% bôk nău kan tâm trôm jêh rnôk ndâk lăp ndrel n’hanh n’hŭch 20% nuĭh kan. Nău ăp cán bộ, đảng viên ŭch êng nchih sam ƀŭt dăn rlu ranh ơm lah nău dơi ryơk, tă bah nĕ kơl n’gor dơh lơn tâm nău ƀư tĭng Bôk nău rgop an tâm nchrăp dăp tay, dơh jêt n’gâng kan ƀĭt joet:

Geh âk đồng chí hôm rlău 5 năm pah kan hôm e tŏng năm dăp hao gay ƀư năm kan bah năp tay, yơn ăp đồng chí mĭn lah nta an rơh bah kơi gay dơi nsrôih hun hao nău rgâl têh dăng, ƀư mhe gay ndơ̆ n’gor, ndơ̆ ntŭk kan hun hao têh dăng lơn kơt ndơ̆ neh dak bah he rgâl săk.

Nău ăp cán bộ ŭch êng rlu ranh ơm ta Dak Lak dôl nta an nău nơih an n’gor tâm nău dăp dơh jêt n’gâng kan ƀĭt joet. Aơ lah nău jao an lĕ đah nău kan, kơl n’hao hun hao săk rnglăy trong kan, geh n’hâm soan an Dak Lak hun hao.