Mpŏng tât kahgĭt 100 năm nar njêng Đảng Cộng sản Việt Nam 3/2/1930-3/2/2030, ôi lơ 15/1, ta Hà Nội, Ntŭk kan Trung ương Đảng ƀư rơh ntơm nău kan Nkra mhe, n’hao mhe n’hanh ƀư mhe nkual năch gŭ Hồ Tây, aơ lah njoat hăn bôk năp gay ma geh ƀư tĭng ăp nău kan rdâk njêng Bảo tàng Đảng Cộng sản Việt Nam n’hanh bôk nău kan rgâl mhe rnoh brô tâm ăp ntŭk kan đảng. Ta rơh ntơm ƀư, Tổng Bí thư Tô Lâm ndrel đah ăp đồng chí leo kan Đảng, Ngih dak n’hanh nkuăl ƀon têh Hà Nội lĕ pơk nău đă ntơm ƀư nău kan. Nău kan nkra mhe, ƀư mhe nkual Ngih an năch gŭ Hồ Tây lĕ geh ntơm ƀư, rdâk njêng lôch mbra jêng ntŭk leo ƀư ăp bôk nău kan, nău kan chính trị tâm dak, dak bah dih, ăp nău kan khlăy êng bâh Đảng, Ngih dak, ƀư đại hội đại biểu lam dak bâh Đảng, ntŭk leo ƀư vơt ăp năch dak bah dih têh tât khâl n’hanh pah kan n’hanh leo ƀư ăp bôk nău kan nghệ thuật ntoh lư khlăy kahgĭt ăp nar lễ têh bâh neh dak. Aơ lah nău kan dŭt khlăy mpeh chính trị mpŏng tât vơt rhơn Đại hội Đảng lam dak tal 14, tâm rgop ta nău hun hao mpeh wăng sa, văn hóa rêh jêng bâh Thủ đô rbăn năm văn hiến, ƀư ueh lơn tay rup, nău ntoh lư bâh Việt Nam đah băl mpôl lam ntur neh.