Hăn ăp ntŭk tăch ndơ, siêu thị ndrel chợ tâm nkuăl ƀon têh Buôn ma Thuột n’gor Dak Lak mra dơi saơ nau khuh bah Tết tât. Ăp nŭih tăch ndoh ndơ ndrel siêu thị hŏ nchrăp ueh, mpla ăp ndơ gay kơl an ƀon lan rvăt Tết. Dôl ma săch ndoh ndơ Tết tâm ntŭk tăch tâm trong Nguyễn Văn Cừ, yuh Trần Thảo Nguyên, tâm Phường Tân Lập, nkoch:

            ‘Ndoh ndơ Tết năm aơ âk ntil, rnoh tăch tâm di. Tết mra rvăt tay du đê̆ bánh kẹo, ndoh ndơ, ndrănh ƀiêr, dak njŭng ndrel ma ăp ndơ bu tâl tâm dŭng gay ân ma me mbŏ, Tết kônh wa yơ me. Rnăk hên hôm rvăt nâm ơm kơt ăp năm mô geh nau têm prăp lor hôm, yor rnôk aơ tâm chợ ndơ kah rih da dê”.

            Tâm chợ Tân An, ngoai tâm ăp ntŭk tăch ndơ têh bah nkuăl ƀon têh Buôn Ma Thuột, ăp nŭih tăch mpla ndơ bah ơm, ơm lơn ăp năm. Yuh Đồng Thị Thanh Trúc, tăch bánh kẹo mbơh, năm aơ yuh rvăt ndơ hao 30% rđil năm e ndrel tăch ntơm bôk khay 12.

            Tâm ăp siêu thị ndrel ntŭk tăch têh, rnoh ndoh ndơ tăch tâm rnôk Tết kŏ geh nchrăp ơm. Bah nau mbơh ntŭk tăch ndrel văng sa tâm năm 2024, ăp rmot kan hŏ nchrăp ndoh ndơ ntơm 30 tât 50% rđil năm e. Nô Lê Xuân Hoan, nŭih mât trong kan tăch ndơ tâm Dak Lak mbơh: rmôt kan hŏ nchrăp ndoh ndơ hao 50% rđil tết Giáp Thìn. Êp nê, nau nchrăp ndơ tăch ndrel ndơ ân, năm aơ ăp ntŭk tăch rai uănh khlay tât rnoh ndoh, ngăn lah jêh rnôk nau tăch tuh chăt mô kloh geh saơ tâm chợ đầu mối ndrel du đê̆ ntŭk tăch:

            ‘Ăp ndơ geh rvăt têm đăp mpăn tâm di nau đăp mpăn kloh ndơ. Ndo ndơ têm geh âk, yơn mô geh ntrơn leo âk ôh tâm ăp ntŭk tăch, geh ntŭk ân tâm khu công nghiệp Tân An, lĕ mơ leo nsĭt”.

            Gay bonh nau rvăt dŏng tâm rơh Tết, ăp siêu thị hôm ƀư bôk nau kan tăch thuk đŏng. Êp nê, ăp siêu thị ntop tay nŭih kan ndrel mông tăch, đah nau pơk mpông ơm ndrel tăch la tâm 2 pơh bah năp Tết. Tĭng wa Trần Thị Thành Nhân, Groi Giám đốc Siêu thị Co.op Mart Buôn Ma Thuột, rnoh ndơ Tết tăch tâm siêu thị hao ntơm 30 tât 50%, tâm nê ndơ Việt geh tât 90%. Siêu thị tăch rnoh thuk âk rbăn ntil ndơ ntơm lơ 1/12/2024 tât lơ 28/1/2025:

            ‘Rmôt têm ndoh ndơ tâm 2 khay tăch tết rlau 80 rmen, tâm nê ndoh ndơ geh rnoh tâm di rlau 20% ndrel rmôt kan rgum tâm ăp ntil ndơ kơt lah ndơ sa, ăp ndơ ê nkra, prăch kik djar ndrel byăp bum play ndrel ăp ndơ geh tăch tâm rnôk tết đah rnoh tâm di tâm rnôk bah năp ndrel ba kơi Tết gay kơl an nau rvăt năp bah ƀon lan”.           

            Gay đăp mpăn rnôk tăch tâm rnôk dŭt năm ndrel Tết năm mhe Ất Tỵ 2025, UBND n’gor Dak Lak nchrăp nau têm ndoh ndơ dŏng âk. Rnôk aơ, 11 ntŭk tăch ndơ hŏ têm ndơ rnoh rlau 5-7 rmen, tŏng dŏng 36,4% nau dŏng bah ƀon lan.

Ăp ndoh ndơ geh mât rnoh nâm ơm geh ndơ sa, ndơ nkra lor, puăch kik djar, dak si, bột ngọt, sĭk, bum play ndrel ndơ dŏng. Nau mât rnoh ăp geh ƀư ntơm lơ 15/12/2024 tât lơ 28/2/2025. Wa Lưu Văn Khôi, Giám đốc N’gâng kan Công thương Dak Lak mbơh, ndrel ma đăp mpăn ndoh ndơ, nau mât uănh ntŭk tăch ndơ tâm rnôk Tết geh ăp n’gâng kan ntrŭnh đŏng:

            ‘Phung hên mra lŏ uănh nau tât bah ntŭk tăch rgâl ndrel năn ndŏ luh ăp nau kan gay ma rdâng đăp mpăn nau pă tăch rnoh đăp mpăn, nkre bonh đă ăp ntŭk kan ân ntrŭt dăng nau ê nkra, hun hao dăng trong tăch ndoh ndơ, kơl an nau ŭch rvăt bah ƀon lan”.

            Đah nau nchrăp tŏng mpeh ndoh ndơ, bôk nau kan tăch thuk ndrel đăp mpăn rnoh ndoh ndơ, ntŭk tăch tâm rnôk tết năm mhe Ất Tỵ 2025 tâm Dak Lak mra tŏng nau ŭch rvăt năp bah ƀon lan./.