Ôi 14/1, ta Hà Nội, Thủ tướng Phạm Minh Chính ƀư tơm rƀŭn nchră rơh tal 5 Hội đồng điều phối nkual Dâng rđŭng dak me Hồng. Tĭng nău mbơh, năm 2024, wăng sa rêh jêng bah nkual dâng rđŭng dak me Hồng hun hao âk tay, hăn lor mro tâm ƀư tĭng ăp rgâl hao n’hanh rgâl mhe hao jêng; hao jêng wăng sa rlău rnoh rĭng nsum lam dak n’hanh rlău nkual Đông Nam bộ; leo lor tay mpeh sŏk ndơ̆ tơm prăk ngih dak, tăch n’gluh, wăch rgum ntuh kơl dak bah dih.

Ntoh ngơi ta rƀŭn nchră, Thủ tướng Chính phủ Phạm Minh Chính lah rjăp, năm tât, nkual Dâng rđŭng dak me Hồng an hao jêng 2 rnoh mrô gay ndrel lam dak lăp rach năm mhe kơt trong nchrŏng bah Tổng Bí thư Tô Lâm. Yor nê, Hội đồng rgum uănh lah ăp nău lĕ dơi ƀư, mô hŏ dơi ƀư, kơp uănh tay, rblang nkô̆ nău, rhoăt nău blău ơm tâm rnôk ntĭm rđău bah ăp n’gâng kan, nău kan, n’gor; bah nê mât uĕh ăp nău dơi ƀư, mkra nău mô hŏ dơi ƀư, jêr jŏt, wăk kol, joi trong dôh rklaih. Thủ tướng đă an nsrôih têh, nsrôih âk, ƀư dŭt n’hâm, geh nău khlay, nău tơm, moh nău ƀư lôch nău nĕ.