Êp rơh Tết Nguyên đán Ất Tỵ 2025 n’hanh mbah rhơn nkah gĭt 95 năm nar ndâk njêng Đảng Cộng sản Việt Nam (3/2/1930-3/2-2025), kêng măng 14/1, Kruanh dak Lương Cường n’hanh mpôl pah kan Trung ương lĕ tât khâl n’hanh mbah rhơn Tết ăp nuĭh tă ƀư Kruanh dak Trương Tấn Sang n’hanh Nguyễn Minh Triết. Kruanh dak Lương Cường nkoch nău ryơk ăp nău rgop bah 2 Kruanh dak ơm đah nău kan cách mạng bah Đảng, n’hao nău nsing nơm neh dak n’hanh nâp nâl tâm rnglăp lam rnoi nuĭh.

Nkhêp di năm mhe Ất Tỵ 2025 êp tât, Kruanh dak lĕ an ndơ Tết an ăp Kruanh dak ơm Trương Tấn Sang n’hanh Nguyễn Minh Triết, rhơn ăp đồng chí ndrel rnăk wâl năm mhe geh âk săk soan, uĕh lăng, lôch jêh, wơt năm Ất Tỵ răm m’ak. Kruanh dak ơm Nguyễn Minh Triết n’hanh Kruanh dak ơm Trương Tấn Sang nkoch nău rhơn lah uĕh ta năp nău rŏng n’hanh nău uănh tât bah ăp đồng chí kruanh Đảng, Ngih dak lah nsum n’hanh êng Kruanh dak Lương Cường lah êng; nkre nsing nơm neh dak he mbra hăn tât năm 2025 nâp dăng đah nău rđău bah Đảng, dơi geh âk nău lôch uĕh têh dăng lơn tay, nău rgâl hao tâm nău lăp ndâk njêng n’hanh hun hao neh dak.