Bol mpôl kan dơi kan tâm ban kơt N’gâng kan ntĭm nti n’hanh n’gâng kan ta ntŭk hŏ nkah njrăng lor mbro mpeh nô nău mplư rlăm ma mạng, yơn tâm ban ri aơ âk nai ntĭm nti ta nkuâl Đăk Hà, n’gor Kon Tum hŏ geh bu ndơm rlăm đah rnoh prăk geh pit in tât rlău 1 rmen 300 rkeh prăk.  

Tĭng nău mbơh bah nai Lê Văn Lâm, nai ntĭm Nhih nti THCS thị trấn Đăk Hà, nkuâl Đăk Hà, n’gor Kon Tum, nar  5/10 mhe aơ du mpôl rlăm săk cán bộ điều tra Công an n’gor Kon Tum n’hanh Bộ Công an ôp mbro ma điện thoại nău lư mpeh nău nai ntĭm geh tât du nău tih tăch rvăt ma túy têh. Gay mô khuch tât rnăk wâl tâm ban kơt kơt koh nău tih, ta nâm nău ntĭm nti n’hanh mpet đă bah mpôl mplư rlăm dja, nai Lâm hŏ manh 1 rmen 100 rkeh prăk njuăl tâm tài khoản ta du ngân hàng lôch nê geh pit in lĕ rngôch rnoh prăk. Nai ntĭm Nguyễn Văn Hiền, Hiệu trưởng Nhih nti THCS thị trấn Đăk Hà ntŭk nai Lê Văn Lâm dôl pah kan an gĭt:

“Rnôk nai Lâm mbơh ri gâp Hiệu trưởng nhih nti mpăn nuih n’hâm nai Lâm ngăch dĭl lah mbơh Công an nkuâl. Mpeh bah gâp ri gâp mbơh đah Đảng ủy, Ủy ban. Tât ôi aơ lah nai Lâm hao ntŭk Công an n’gor”.

Ndrel đah nai ntĭm Lê Văn Lâm, ta thị trấn Đăk Đăk Hà, nkuâl Đăk Hà, nai ntĭm Hồ Thị Thu Sương, Nhih nti THPT Trần Quốc Tuấn mhe geh ăp nuĭh ta mạng mplư rlăm pit in 270 rkeh prăk đŏng.

Nău mbơh bah nai Sương an saơ, nar 9/10 mhe aơ geh nai ntĭm đăng ký râng bôk nău kan sơch ca sỹ. Tĭng nău đă bah bôk nău kan, rnoh prăk ân ndơ̆ ăp tơ̆ hao mbrơi tât 100 rkeh prăk. Dŭt âk ăp nuĭh rlăm đă ndơ̆ tât 220 rkeh prăk ri sŏk tay rnoh prăk 100 rkeh prăk hŏ ndơ̆ bah năp nê nơh. Tâm rnôk rnăk wâl jêr jŏt, hôm dôl geh nău rngot nai Hồ Thị Thu Sương hŏ manh 170 rkeh prăk nôp an ndơ pâl nê ri mơ gĭt lah he hŏ geh bu mplư rlăm.

Nău ăp nai ntĭm ta nkuâl Đăk Hà, n’gor Kon Tum wăk geh bu mplư rlăm mô dơn roh huach mpeh wăng sa bah êng nơm  ma hôm ƀư nhih pah kan ntŭk nai ntĭm ntop âk tay nău kan, dơn jâk tay nău  kan. Nai ntĭm Mai Xuân Kiên, Hiệu trưởng Nhih nti THPT Trần Quốc Tuấn, an gĭt:

“Lôch rnôk nai ntĭm geh kơt nê ri nhih nti rƀah gĭt nău lư, đă mpeh Công đoàn nhih nti way groi tĭng nai ntĭm kơp lĕ ma măng nê gay mpăn nuih n’hâm nai ntĭm nti gay der bah nău tât jêng ăp nău ƀư mô tâm di. Trong rƀŏng an nai ntĭm nti tâm nkô̆ nău tâm ôp đah ăp nhih pah kan dơi kan n’hanh nhih nti rgŏ jă  tay tâm ban kơt tĭng groi nđôi gay nai ntĭm nti mô hôm rvê”.

Mpeh nkô̆ jêng tât nău âk nai ntĭm nti ta nkuâl geh tŭp nău bu ndơm mplư rlăm ta mạng, wa Lê Thị Nhung, Kruanh Phòng Giáo dục n’hanh Đào tạo nkuâl Đăk Hà, n’gor Kon Tum, an lah geh dŭt âk nkô̆:      

“Bol hŏ dơi nkah njrăng lor bah nhih pah kan dơi kan hôm, lơn lah bah công an. Yơn lah nha hôm geh nău nai ntĭm nti nha hôm djăt tĭng ăp nău bu mplư rlăm, têk klônh đŏng. Nklăp nai ntĭm nti mô hŏ năl dơi nuĭh nê moh ndơ ŭch? Tâl bar nklăp geh âk  nai ntĭm nti ŭch geh du rnoh prăk nê nơh gay năp an nău rêh êng nơm mô lah rnăk wâl jêng râng tâm nău kan nê. Tâl pe nkô̆ mplư rlăm ăp nai ntĭm nti mĭn lah he geh tŭp tâm nău nê ngăn jêng ƀư tĭng trong đă nê lôch nê njuăl prăk”./.