Nău nkoch mpeh du hê “kruanh” sơm êng săk bah rmôt FULRO tă ƀư lư tâm ntŭk gŭ rêh ăp rnoi nuĭh Tây Nguyên lah wa Ybome (way kuăl lah Ja Na-68 năm deh), gŭ ƀon Ring Rai, xă Hà Bầu, nkuăl Đăk Đoa, n’gor Gia Lai. Khay 2/2001, đah nău kuăl jă bah Ksor Kơk-nuĭh djôt bôk rmôt FULRO gŭ ta dak Mỹ, âk nuĭh rnoi mpôl đêt geh nsŭk nsôr lĕ râng ƀư rŭng răng. Jêh nu nău, Ja Na geh mhal dôih 12 năm gŭ ndrung đah nău tih “Phah nău kơl tâm rnglăp rnoi nuĭh”. Tâm rnôk gŭ ndrung, wa Ybome gĭt saơ ăp nău tih. Jêh rnôk sĭt ơm, wa plơ̆ sĭt đah ƀon lan, gơih nđơr pah kan n’hanh ntơm ndâk njêng nău rêh mhe.

Rnôk hăn ƀư rŭng răng, dun rlơn, aƀaơ mĭn tay bah năp đaơ dak măt gâp luh êng. N’glêh dŭt kônh wa tâm ƀon lan mbak khuch khat, gâp hăn krŭng. Aƀaơ sĭt ƀon lan gâp rblang an kônh wa wât bôk nău kan tâm rnglăp m’hâm ƀư, nău khlay lah an geh nău tâm rnglăp ri mư dơi lĕ rngôch.

Hôm đah wa Siu Un, 59 năm deh, gŭ ta thôn Tân Điệp 1, xă Ia Ake, nkuăl Phú Thiện, nuĭh lĕ rlet rlău 16 năm nkrŭng gŭ ndrung, nău rêh ngăn lah du nuih n’hâm gay sŏk tay nău nsing nơm. Khay 6/2022, wa plơ̆ sĭt gŭ âm tâm chi hội tin lành ta thôn, mpeh tâm Tin lành Truyền giáo Cơ Đốc-du chroh tâm di. Wa Siu Un aƀaơ lĕ mô hôm đit, prêng, mô hôm geh ăp nuĭh dun rlơn dak bah dih kuăl jă. Wa way nkoch nkô̆ nău mpêh tâm rnôk tin n’hanh plơ̆ sĭt đah chroh brah ndu bah nơm, kơl kônh wa tâm ƀon gĭt năl nău tih nău di.

Gâp an plơ̆ sĭt đah brah ndu dơm, plơ̆ sĭt đah chroh way tĭng. Rnôk plơ̆ sĭt, Đảng, Ngih dak, n’gâng kan ƀon lan uănh uĕh đah gâp. Gâp ŭch kônh wa ƀon lan, ăp ntŭk kơt ta Dak Lak, Gia Lai.. ăp nuĭh dôl geh tât tin lành Đề Ga ri an plơ̆ sĭt đah brah ndu, plơ̆ sĭt đah chroh ơm way tĭng lĕ dơi Đảng n’hanh Ngih dak an.

 Gay trong plơ̆  sĭt đah nsum mpôl, đah brah ndu ngăn ngên pơk hvi tay, ăp năm bah năp, n’gor Gia Lai lĕ mbơh ƀư ntrong kan “Plơ̆ sĭt đah brah ndu-mât đăp mpăn ƀon lan”, đah nău râng bah 4 rmôt: Đảng viên, nuĭh nsing nơm, ăp chức sắc, tôn giáo n’hanh ăp nuĭh tă tih djăt tĭng Fulro.

Kruanh rmôt rƀŭn Chroh kon Việt Nam (miền Nam), lah kruanh ban pah kan mặt trận thôn Sô Ma Lơng, xă Chrôn Pơnan, nkuăl Phú Thiện, n’gor Gia Lai, wa Ksor Duing an gĭt, gâp ndrel đah ăp gưl n’gâng kan rgŏ jă dơi âk nuĭh ntlơi tin lành Đề Ga gay tĭng chroh di pháp luật.

N’gâng kan ƀon lan uănh tât mro mpôl hên, nta an gay mpôl hên rgum rƀŭn chroh nâm ơm. Kuăl jă oh nô tih trong plơ̆ sĭt. Bôk năp mpôl hên wơt dơn 13 rnăk dơm, yơn mbrơi mbrơi tât aƀaơ lah rlău 300 nuĭh. Ăp nuĭh tih trong mpôl hên tâm rgop ntĭm chroh n’hanh tâm rgop đah wa Siu Un hăn tĭng rgŏ jă, ntrŭt nsôr, nkoch trêng khân pơng tĭng nău ntrŭnh trong hăn bah Đảng, Ngih dak.

Tĭng wa Ra Lan Chung, Groi Bí thư N’gor ủy, Kruanh UBND n’gor Gia Lai, đah ăp nkô̆ nău uĕh n’hanh di, ntrong ƀư “plơ̆ sĭt đah brah ndu, mât đăp mpăn ƀon lan” ta ƀon dôl nta an ntŭk ntô gay ăp nuĭh tă tih dơi rêh, pah kan, n’hao êng nău rêh drăp ndơ, nuih n’hâm bah săk nơm n’hanh rgop an nău hun hao bah nsum mpôl:

Năm mhe rlău lĕ rgŏ jă geh dŭt âk bah lĕ trong chính trị ndrel râng mkra ăp nău jêr jŏt bah ăp nuĭh lĕ râng Fulru rnôk plơ̆ sĭt đah nsum mpôl, tâm rgum, ntĭm nti, bônh đă gay khân pơng mô plơ̆ tay đah nău ƀư phah. Ta ntŭk ăp nkuăl bah n’gor dôl ƀư tĭng ntrong ƀư “Plơ̆ sĭt đah brah ndu-mât đăp mpăn ƀon lan” mpôl hên uănh lah dŭt prêh mpeh nău săk rnglăy, ngăn ngên. Ntrong ƀư aơ lĕ dơi N’gâng Công an uănh lah n’hanh mĭn lah Gia Lai lah ngoăy tâm âk ntŭk ƀư tĭng tay n’hanh pơk hvi mô knŭng bah Gia Lai ma bah ăp n’gor Tây Nguyên.