Ta n’gor Dak Lak, geh ăp bu ur đảng viên way lĕ nuih n’hâm an trong uĕh di cách mạng. Ăp nuĭh ntĭt leo lor nê mô dơn rgop rdâk njêng ƀon lan đăp mpăn, geh ndrŏng, ma hôm nkoch trêng lĕ nuih n’hâm an druh ndăm aƀaơ.

72 năm deh, 53 năm Đảng, wa Nguyễn Thị Hồng ta thị trấn Quảng Phú, nkuâl Cư Mgar, n’gor Dak Lak nha hôm lĕ nuih n’hâm đah pah kan lam rêh jêng đŏng. Lah Kruanh Mpôl Nuĭh gŭ ndrung rŏng dak ơm nkuâl Cư Mgar, păng way nsrôih mât chăm nău rêh n’hanh nău dơi hội viên. Ơm râng nău  kan cách mạng ta nkual căn cứ Đạt Lý 2 (jêng lah thôn 1, xã Hòa Thuận, nkual ƀon têh Buôn Ma Thuột, n’gor Dak Lak aƀaơ), năm 19 năm, păng hŏ rhơn n’hao dơi n’glăp tâm Đảng Cộng sản Việt Nam. Lôch ăp tơ̆ geh  phŭng rlăng nhŭp kân, lơh dong, păng nha mât nâp nuih n’hâm nsing nơm cách mạng đŏng. Tât bah tâm lơh, păng râng pah kan tay ta nkuâl Cư Mgar. Wa Nguyễn Thị Hồng nkoch:

“Tâm rơh tâm lơh lah tâm ntral măt đah phŭng rlăng, nănh khĭt, nănh rêh n’hanh nănh n’groh săk. Gâp râng cách mạng ri uănh saơ âk ndrăng băl he khĭt să rlă lŭ nsĭt an đăp mpăn, dah rŏng nar aơ. Nê lah nkô̆, lah suan ntrôl gay an he nsrôih, mât tay nău ton du bông nău rêh đah neh dak, đah Đảng, đah ƀon lan. Tât bah tâm lơh tâm su gâp saơ he lah nuĭh geh nău lap hôm dơi rêh, hôm geh ndơ gay he an ƀon tơm, an neh dak”.

Hôm đah Thượng tá Lữ Thị Anh Đào, Groi kruanh jrô kan PA02, Công an n’gor Dak  Lak, bơi 30 năm pah kan tâm trong kan rdâng lơh mpôl rlơn lơh tay, yuh way lăp jru  nău mĭn cách mạng n’hanh trong uĕh di bah nuĭh đảng viên, wat jêh ăp nău kan dơi jao. Thượng tá Lữ Thị Anh Đào nkoch:

“Dơi ăp rơh kơn hăn lor bôk năp ntĭm nti, kơi năp nău gĭt blău, ndrel đah ăp nău nti ta nhih nti, tă gĭt tâm rnôk kơt nti, gâp saơ ăp nău roh yot, n’groh an lĕ n’hâm suan nău gĭt blău bah rơh u che, ri ăp jêr jŏt, ŏ r’ah ma gâp dôl rlău mô jêng ntil đêt. Yor kơt nê̆ jêng gâp hŏ ƀư êng pah kan rƀŏng nău mĭn an săk he nơm, ăp ntil ma ndrăng băl he ƀư dơi ri nklăp he mbra ƀư dơi đŏng gay he nsrôih n’hanh he ân dơn lĕ nău kan ri he mbra ƀư dơi”.

Lah bu ur cán bộ nuĭh rnoi mpôl đê̆, ta 39 năm deh, yuh H Cir Mlô, ta xã Ea Đar, nkuâl Ea Kar hŏ geh 14 năm Đảng. Tă ƀư Bí thư chi bộ buôn Sứk, xã Ea Đar, lôch nê ƀư Kruanh Hội Liên hiệp bu ur xã Ea Đar, moh ta ntŭk gŭ kan, yuh way ntik n’hao uĕh nău khlay kan ƀư ntung njŏ an Đảng đah nuĭh lan. Kơl nuĭh ƀon lan nkoch gĭt nău ŭch rŏng, mpŏng geh tâm  di n’hanh dơn geh nău plơng ơh, rblang tâm di bah kruanh rđău kan, yuh H Cir Mlô hŏ rgop n’hao nuih n’hâm  nsing nơm bah nuĭh ƀon lan đah Đảng n’hanh n’gâng kan ta ntŭk.

“Tŏng nuih n’hâm uĕh lŏng, tŏng nău gĭt blău, tŏng di rnoh uĕh blău bah du hê nuĭh cán bộ tâm rơh mhe, he ân lăp rgum, săk he nơm ân dơn kan lor bôk năp. Gâp dŭt nsing nơm tâm trong kan, ăp siƀŭt njuăl đă, nghị quyết, nău ntrŭnh bah Đảng n’hanh Ngih dak. Jêng nău tâm pă kan, tâm pleh gŭ kan moh ntŭk ƀư, gâp way rôih tĭng gay ƀư lôch jêh uĕh nău dơn kan dơi jao”.

Đah nuih n’hâm dơn kan, nău rôih mĭn rlău dơi jêr jŏt n’hanh nuih n’hâm đah Đảng, đah ƀon lan, ăp bu ur đảng viên nâp nuih n’hâm djăt tĭng ta Dak Lak dôl rêng nău nđơr an rơh druh ndăm kơt tĭng, rdâk njêng ƀon tơm nar lơn ma ndrŏng uĕh./.