Mih têh ntoch jong ta âk nkual mpeh luh nar n’gor Dak Lak ƀư rhiăng ha ba, bum blang ta xã Hòa Thịnh geh ndâp băm. Tĭng n’gâng kan ta ntŭk, nklăp 300 ha bum blang n’hanh rlău 600 ha ba geh tât khuch. Xã hŏ rgum 15 đoàn viên druh ndăm ndrel 50 cán bộ, công an, tahen jŭt lŏ ntop kơl nuĭh ƀon lan ndăn ngăch rôk rek bum ba. Trung đoàn 888, Bộ Chỉ huy Quân sự n’gor Dak Lak, n’hao tay 70 cán bộ, tahen sĭt xã Hòa Thịnh kan nsum rek ba, rôk bum blang hôm ƀa ƀă, bah ir khuch khat tă bah dak bŭk. Ndrel đah ntop kơl nuĭh ƀon lan, xã Hòa Thịnh dôl rdâk njêng trong rdâng lơh tĭng gưl, lor nchrăp nuĭh kan, ndeh rklư, đăp mpăn an nuĭh ƀon lan n’hanh hŭch đêt khuch khat tă bah trôk nar lơh.

 Jêh bơi tât 2 pơh mih têh ta âk ntŭk, dak  buk ndrel rluh neh tâm âk nkuăl bah n'gor Lâm Đồng geh nau tât jêr. Kêng măng 23/9, UBND n'gor đă ăp nkuăl uănh, rjăp ntrơn leo nŭih ƀon lan luh ntŭk mra geh nau khuch hô bah dak buk, rluh neh; nkre kơl an ăp nkuăl geh nkhah, đăp mpăn ndơ sa, ndơ dŏng, mô ân nŭih ƀon lan mô tŏng ndơ sa. Năm xã geh nau khuch ngăn geh Cát Tiên 2, Cát Tiên 3, Quảng Khê, Đam Rông 2 ndrel Quảng Sơn geh đă rgum rmôt kan, ndơ dŏng kơl an ƀon lan. Mih dak lip lĕ ƀư bơi 60 mblâm jay geh khuch, rlău 1.000 ha tơm tăm dak băm; êng xă Hàm Kiệm geh bơi 400 ha thanh long dak băm jru. Yôk Gia Bắc ta Quốc lộ 28 plơ̆ pĭch rlâm tay, ƀư kol trong hăn. Mô hŏ kơp dơn khuch khat mpeh nuĭh.