Rgâl ma knŭng tât rgâl mrô ta nău mĭn công nghệ, rƀŭn nchră hăn lăp tâm ăp nkô̆ nău hăn ndrel đah nău pah kan jan sa, tăch rgâl ăp nar bah ƀon lan kan lŏ mir kơt joi n'hanh uănh năl nău lư, dŏng AI, livestream, tăch ndơ trực tuyến, mât uănh năch n'hanh buăt nthoi ntŭk tăch rgâl; tâm ôp mpeh trong ƀon lan kan lŏ mir tât rgâl mrô bah nău ŭch geh ngăn ngăn.

Wa H'Giang Niê, Kruanh Hội Nông dân n'gor Dak Lak mĭn lah, Dak Lak geh âk nău dơi, nău geh mpeh nkra njêng lŏ mir, đah âk ndơ lŏ mir ntoh lư. Yơn lah, nkra njêng geh ndơ uĕh kah mhe knŭng lah nău bôk năp. Nuĭh nkra njêng hôm e an uănh khlay tât rup uĕh, ndơ nklâm tâl, joi tu tơm, ndâk njêng săk ntơ lư, nkoch n'hơ n'hanh nău dơi tâm di nău ŭch ntŭk tăch rgâl. Nkre lah an ndơ̆ ndơ geh ƀư ta ntŭk mạng gay n'hao rnoh khlay, tăch ndơ geh ƀư. Aơ lah nău đă khlay n'hanh ngăn ngên tâm rơh aƀaơ. "Gay ntop kơl nuĭh ƀon lan kan lŏ mir ngăn ngên ƀư tơm ntŭk tăch rgâl, an lor bôk năp bah mpôl hên lah ƀư ăp jrô tiăr nti, kơl kônh wa gĭt wât jru tơm nău gĭt blău tơm. Nkre, Hội ntĭm nti nuĭh ƀon lan kan lŏ mir tâm rgop ndrel ăp KOC, KOL nsing nơm gay ndơ̆ ndơ lŏ mir hao ăp ntŭk tăch rgâl điện tử. Ndăn jêh rêng ƀư dja, mpôl hên mbra njêng rmôt ntop kơl tăch ndơ lŏ mir, na nê̆ ntĭm kônh wa nău blău livestream tăch ndơ tâm ban kơt trong tât ăp ntŭk tăch rgâl mbrô êng ƀa ƀă. Nău mĭn n'hanh nău ŭch dŭt têh bâh mpôl hên lah: Ƀon lan kan lŏ mir ta ntŭk, Hội Nông dân ta nĕ; Hội way lah ntŭk nsing knơm ngăn hăn ndrel đah ƀon lan tâm ntrong kan rgâl mhe rnoh mbrô."

Ta rơh Rgum nchră, ăp đại biểu nkoch đŏng nkô̆ nău rdâk njêng nău nsing nơm đah năch. Ăp ntil ndơ dơi tâm ôp geh kloh rvah tu tơm, mã ndơ, QR, nău lư nkra njêng, nkô̆ nău nkoch nău ngăn n'hanh mât uănh năch jêh tăch. Bah nău ngăn âk năm tăch ndơ trực tuyến geh nău dơi, wa Trần Thị Bích, du hê ƀon lan kan lŏ mir xã Ea Súp an lah, knŭng rnôk nchrăp tŏng ăp nău lư mpeh ndơ, săch du trong tâm di, rdâk njêng nkô̆ nău n'hanh njêng nău tâm rnglăp uĕh, way bên đah nuĭh uănh, nău rƀŏng tât ntŭk tăch rgâl mrô mhe geh nău dơi. "Nău tơm khlay n'glêh an nău tăch dơi ndơ lah ndơ geh ƀư ngăn, nău nkoch ndơ geh ƀư ngăn, ndrel đah nău kơl mât uănh nuĭh dŏng ndơ bah kơi jŏ jong uĕh. Lah kanŭng hao livestream ngơi dơm ri dŭt jêr đă nuĭh dŏng ndơ, yor he mô di lah ăp KOL mô lah KOC ntoh lư geh nău ring tam têh. Yor kơt nê̆, rnoh khlay ngăn n'hanh nău uĕh ngăn bah ndơ geh ƀư lah n'gâng tơm nău dơi kan dơm."

Tâm bôk nău kan, Mpôl rdâk ƀư mbơh tơih rmôt Zalo "Ƀon lan kan lŏ mir Dak Lak tăch ndơ online", njêng ntŭk tâm mâp đah ƀon lan kan lŏ mir, hợp tác xã n'hanh ăp nuĭh tơm ndơ an geh mbơh tơih, tăch rgâl ta ntŭk mbrô.