Yuh Đỗ Thị Mỹ Duyên, 24 năm deh, ta phường Buôn Ma Thuột, n’gor Dak Lak an gĭt, mạng xã hội aƀaơ nkre lah ntŭk yuh tâm nđŭr, pâl rlưn, nkre lah ntŭk uănh joi nu nău mhe. Lơn lah, tâm trôk nar lơh, phŭt dak lip, wơt kơl ndal ri mạng xã hội geh nău mbơh uĕh. Nău uĕh lah mbơh ta ntŭk aơ mư vĭ vĕ, geh rnôk mô di na nê̆. Bah rơh phŭt dak bŭk têh phah Tây Nguyên-Nam Trung bộ, yuh Duyên dŏng âk mang xã hội n’hanh saơ âk fanpage bah rmôt Công an, nkre đăp mpăn ngăch, uĕh n’hanh dơi djăt. Bah nĕ, yuh Đỗ Thị Mỹ Duyên way uănh nđôi ăp trang aơ:

Gâp way lăp facebook, tâm nĕ way lăp bah Công an Dak Lak. Tâm nĕ way nchih mbơh ăp rup, nu nău mhe ăp nău tih Luật ntung trong. Mô lah mhe aơ âk rup mpeh wơt kơl rmanh nuĭh ƀon lan nkual dak lip ta ăp xă mpeh bah lơ nhâp nar (n’gor Phú Yên ơm). Gâp way nkoch tay, n’hanh đăp mpăn ngăn mô rwê nău rlăm.

Ƀư tĭng ntĭm rđău bah N’gâng kan Công an mpeh rgâl mrô, kơt dŏng khoa công nghệ tâm trong kan, ăp ntŭk kan mpeh tâm Công an n’gor Dak Lak ndâk ƀư fanpage da dê. Tă bah nĕ, rmôt công an ntrôl dăng nkoch trêng, mbơh rblang pháp luật; wơt dơn nău lah bah nuĭh ƀon lan, rgop đăp mpăn rnă njrăng n’hanh njrăng n’gang nău dun ăp nău mĭn êng tih. Trung tá Trần Viết Nghĩa, Đội trưởng Đội nkoch trêng, ntĭm nti Jrô kan pah kan chính trị Công an n’gor Dak Lak an gĭt, fanpage “Công an n’gor Dak Lak” yor ntŭk kan mât uănh, aƀaơ geh rlău 121.000 nuĭh uănh nđôi, bơi 9 rkeh nuĭh uănh. Mô knŭng nchih mbơh nău nkoch trêng pháp luật, wơt dơn ơh tay nău, phong nuĭh tih bah nuĭh ƀon lan, ma hôm lah ntŭk pơk nău mbơh kuăl jă tâm rnglăp, tâm pă, tâm kơl ƀon lan geh trôk nar lơh.

Tâm rơh dak bŭk mhe rlău, ta xă Hòa Thịnh geh du hê bu ur bŭn jŭr rnăn nchrăp deh kon yơn geh nkhah êng yor dak băm. Dơi tăng nău mbơh mpôl hên ngăch nchih tâm fanpage n’hanh jêh nĕ dâl, rmôt wơt kơl rmanh Công an xă Hòa Thịnh lĕ wơt dơn, ngăch mbơh ƀư ndơ̆ bu ur bŭn tât ngih dak si deh ngăch. Gâp an lah aơ nău ntop kơl ngăch, ngăn ngên bah fanpage tât nuĭh ƀon lan.

Du fanpage săk rnglăy êng bah công an Dak Lak lah “Jrô Cảnh sát ntung trong Dak lak”. Fanpage aơ aƀaơ wăch rgum rlău 33.000 nuĭh uănh nđôi, đah rlău n’gul rkeh nuĭh joi uănh ăp khay. Aơ lah trong nkoch trêng Luật ntung trong; ngăch uănh joi ăp nu nău geh tât đăp mpăn ntung trong n’hanh rnă njrăng đăp mpăn. Tă bah fanpage, Jrô kan Cảnh sát ntung trong hôm wơt dơn rup, clip lah bah nuĭh ƀon lan mpeh ăp nău ƀư tih ntung trong, tăch rwăt ndơ mô an dŏng... Trung tá Nguyễn Khiếu Nam Vũ, mât uănh trang thông tin “Jrô Cảnh sát ntung trong Dak Lak”, an gĭt:

Ntŭk kan geh tay du trong mbơh wơt dơn nău lah bah nuĭh ƀon lan. Tă bah nĕ, jrô kan lĕ rmal bơi 100 nuĭh tih, đah dĭng lĕ prăk rlău 300 rkeh. Ntĭt nsa: N’gul khay 12 mhe rlău, bah nău lah bâh nuĭh ƀon lan lăp trang fanpage đah clip 2 bôk ndeh rlet ngăch, mpôl hên lĕ uănh nđôi, năl n’hanh rmal 2 bôk ndeh năch tih. Na nê̆, nău yor wa Đ.V.P, gŭ xă Tuy Đức, n’gor Lâm Đồng, ƀĭt ndeh ô tô biển số 48B-000.XX, geh rmal 5 rkeh prăk n’hanh trừ 2 điểm samƀŭt ƀĭt ndeh.

Lĕ rngôch ăp jrô kan nghiệp vụ n’hanh công an 102 xă, phường mpeh tâm Công an n’gor Dak Lak lĕ ƀư fanpage, âk trang wăch rgum nuĭh uănh nđôi, geh fanpage geh hang rhiăng rbăn nuĭh ŭch n’hanh uănh nđôi. Nkô̆ nău nchih dơi ntuh kơl uĕh, âk ntil, bah nkoch trêng pháp luật, đăp mpăn rnă njrăng tât âk nău ƀư wơt kơl nuĭh rmanh, treh rêng nuĭh uĕh, kan uĕh n’hanh njrăng n’gang jăng nău mbơh tih mô săk rnglăy. Wa Nguyễn Quốc Hiệp, Groi Giám đốc N’gâng kan Văn hóa, Thể thao n’hanh Pâl nđaih n’gor Dak Lak uănh lah, aơ ntrong ƀư nkoch trêng tâm di đah trong rgâl mrô aƀaơ hin.

Khay tât, N’gâng kan tâm rgop săk rnglăy tay đah ăp ntŭk kan tâm rmôt Công an n’gor Dak Lak gay n’hao nkoch trêng treh hvi lơn tay, kơl nuĭh ƀon lan gĭt ngăch, ngăch mbơh nu nău ta ăp trang fanpage bah rmôt Công an tât đah kônh wa. Mpla nsơ tay, nkoch mbơh ăp trang aơ tât đah kônh wa, lơn lah kônh wa ta nkual jru ngai, nkual rnoi mpôl đêt, gĭt ăp trang fanpage aơ rêng hvi lơn.

N’hêl na nê̆ an saơ, ăp fanpage bah Công an Dak Lak mô knŭng lah trong mbơh nău di na nê̆ ta trôm mạng, ma lĕ jêng ntung nthoi dăch êp, di djăt đah rmôt công an n’hanh nuĭh ƀon lan. Ta nĕ, nău mbơh dơi nkoch ngăch, di na nê̆; nău lah bah nuĭh ƀon lan dơi djăt, rmal ngăch, rgop mât nâp rnă njrăng đăp mpăn, treh rêng kloh nuih n’hâm “Yor Nuĭh ƀon lan rhŏ an” tâm rnôk rgâl mrô./.