Binh đoàn 15 (Bộ Quốc phòng) gŭn kan ta n’gor Gia Lai, ăp năm rlău aơ hŏ rgop rdâk njêng ntŭk nsing jâng wăng sa nâp, đăp mpăn rnă njrăng njok 251km trong n’har bri ta Tây Nguyên. Lah đơn vị wăng sa njrăng n’gang neh dak gŭ kan ta 251 km trong n’har bri đah Lào n’hanh Campuchia ta nkual Tây Nguyên, aƀaơ Binh đoàn 15 geh rlău 15.000 công nhân, nuĭh kan, lơn âk lah nuĭh rnoi mpôl đê̆.

5 năm aơ, bol mâp âk jêr jŏt, yơn Binh đoàn nha hôm đăp mpăn rĭng geh prăk khay rlău 6,5 rkeh prăk/nuĭh/khay đŏng. Ăp năm, Binh đoàn ntêm an 30 rmen prăk gay dŏng kơl mât chăm, rlu rlău n’hâm suan n’hanh tĭng ƀư bôk nău kan "N’hŭt răm Công đoàn, tâm rŏng băl tahen”. Mhe aơ, lah ta Đại hội Đại biểu Công đoàn tâl V, Thiếu tướng Hoàng Văn Sỹ, Groi bí thư Đảng ủy, Tư lệnh Binh đoàn 15 an gĭt: “Nuĭh kan nuĭh Yăn n’hanh rnăk ƀon lan rnoi mpôl đê̆ krêp dêh rnăk wâl, tâm kơl nsum pah kan jan sa, tâm kơl nsum wăng sa, tâm nđŭr văn hoá. Nsĭt geh wăng sa ƀon lan rnoi mpôl đê̆ hao ngăch”.