Ôi 17/2, Ban Tuyên giáo n’hanh Dân vận Trung ương ƀư Tâm nchră mbơh nău n’glêh an bah Bộ Chính trị mpeh nău rgum n’hao wa Huỳnh Thành Đạt (Bộ trưởng Bộ Khoa học n’hanh Công nghệ) ƀư Groi kruanh Ban Tuyên giáo n’hanh Dân vận Trung ương. Mbah rhơn wa Huỳnh Thành Đạt mât ƀư nău kan mhe, Kruanh Ban Tuyên giáo n’hanh Dân vận Trung ương Nguyễn Trọng Nghĩa an lah, aơ mbra lah du suan dăng mhe n’hanh du tơm ndơ mhe gay Ban Tuyên giáo n’hanh Dân vận Trung ương ƀư wat jêh tay nău dơn kan dơi Đảng, Ngih dak n’hanh ƀon lan jao an.

Wa Huỳnh Thành Đạt deh ta Bến Tre, dơi ntĭm nti ăp tŏng rêng, rlău âk ntŭk gŭ pah kan. Ta nău kan Bộ trưởng Khoa học n’hanh Công nghệ, wa Huỳnh Thành Đạt hŏ rgop, ndơ̆ trong kan khoa học n’hanh công nghệ geh njuat hăn đăt ndal têh.​ Khoa học n’hanh công nghệ lah ngoăy tâm ăp trong kan đăt ndal, ntrŭt ntrôl rgâl blău njêng mhe, lah jâng nsing gay neh dak lăp tâm rơh mhe, rơh hun hao lhung jong săk bah rnoi nuĭh. Yor kơt nê̆, nău khlay kan, nău dơn kan Ban Tuyên giáo n’hanh Dân vận Trung ương ân ntrôl dăng rgâl mbrô tâm pah kan rƀŏng trong mĭn, nkoch trêng trong kan tât tĭng cán bộ, đảng viên n’hanh nuĭh ƀon lan.