Ôi 31/10, ta Hà Nội, Bộ Công an ƀư Lễ wơt ngăn Mpôl ntơh măt gưl têh Bộ Nội vụ Liên bang Nga dôl geh hăn khâl, pah kan ta Việt Nam. Lôch rnôk wơt, Bộ trưởng Tô Lâm ndrel Bộ trưởng Bộ Nội vụ Liên bang Nga ƀư rgum nchră, Bộ trưởng Tô Lâm lah rjăp, tâm boh đah Bộ Công an Việt Nam n’hanh Bộ Nội vụ Liên bang Nga geh ăp njuat hun hao uĕh tâm ăp trong kan.

Ta rơh tâm nchră, bar ding hŏ tâm ban ŭch mbra an ƀư geh nău tam “Bôk nău kan nsum đah Bộ Công an Việt Nam n’hanh Bộ Nội vụ Liên bang Nga lvang năm 2022 - 2024” ký tâm khay 5/2022; Lôch nê tâm ôp nău lư nuĭh tih, ôp uănh, nkra rmal ăp nău tih geh tât bar ding. Bar ding gŭ mĭn mbra njêng trong kan nsum tâm pah kan mât nkrum doanh nhân, kon se hăn gŭ nti n’hanh nuĭh ƀon lan bah dak dja pah kan, kơt nti n’hanh wăng sa gŭ rêh ta dak ri, đăp mpăn nău dơi, nău geh tâm di bah ƀon lan bar dak, tâm ban kơt lor nchrăp njrăng n’gang nuĭh tih, tih pháp luật, lơh khuch an rnă njrăng neh dak bah Việt Nam n’hanh Liên bang Nga.