Thủ tướng lah rjăp, nău nchrăp ƀư trong têh hăn ngăch TP.HCM-Thủ Dầu một-Chơn Thành lah nău nchrăp ƀư bah nău lah Đảng, nuih n’hâm ƀon lan, aơ lah bah play nuih gay nkah gĭt ăp nuĭh lĕ roh yor neh dak an dơi ƀư, mô lah dơm, mô lah jêr, mô lah geh ma mô ƀư, mô dơi mbrơi tay, an ƀư tĭng an rjăp, lĕ lah ri ƀư, lĕ ƀư, lĕ tĭng lah geh ndơ.

Gâp đă ăp n’gor Bình Phước lah ngoăy, nkual ƀon têh Hồ Chí Minh, Bình Dương tâm khay 3 aơ lah an jêh ăp sam ƀŭt boăt nthoi trong Dak Nông tât Chơn Thành. Aơ lah nău mĭn Đảng nuih n’hâm ƀon lan, nuĭh ƀon lah dŭt mpŏng kâp, nău hun hao ri dŭt ŭch jăch ndăn. Yor nê, gâp đă ăp đồng chí mô mbrơi tay, n’hanh an ƀư tĭng di ntĭm rđău, ƀĭt joet bah Thủ tướng Chính phủ, ƀư tĭng rjăp, mô geh jêh lah an ta nĕ, nuih n’hâm lĕ lah an ƀư, lĕ ton lah an ƀư, lĕ ƀư, lĕ tĭng an geh ndơ, nĕ lah nău kan bah play nuih n’hanh he nkah gĭt đah ăp nuĭh lĕ roh, ăp nuĭh lĕ roh ri nkual neh aơ gưl kan na nê̆ mô di lah nsum nsum tay n’hanh an ƀư tĭng geh tâm ban. Gâp đă ăp đồng chí mĭn tay ngăch m’hâm ƀư ma 2/9/2026 nkah gĭt 81 năm nar ndâk njêng neh dak he dơi sa nkra, jêng ăp đồng chí an ntrôl ngăch.

Thủ tướng an gĭt, lam dak dôl rgum 3 nău mhe têh lah rgâl hao mpeh trong ƀư, ntung trong, n’hanh nuĭh kan uĕh nâp, Thủ tướng mpŏng n’gor Bình Dương hăn lor tâm 3 nău rgâl hao aơ ngăn lah rgâl hao mpeh trong ƀư rgop rgâl mhe trong ƀư bah kan nsrel nsum êng, ntuh kơl gay dôh rklaih ntŭk kol bah ntŭk wăk, nkre hăn lor hun hao ntung trong boăt nthoi nkual.

Nău nchrăp ƀư trong têh hăn ngăch TP.HCM-Thủ Dầu Môt-Chơn Thanh lvang rlău n’gor Bình Dương geh jong rlău 52 km, dơi dăp rgum đah têh 6 mbôr ndeh hăn ngăch, hăn ngăch rdâk ƀư 100km/h. Aơ lah trong têh hăn ngăch bôk năp nthoi TP.HCM đah Bình Dương, Bình Phước n’hanh luh tay đah trong têh hăn ngăch Gia Nghĩa-Chơn Thanh gay boăt nthoi hăn Tây Nguyên.

Lvang 1, nău nchrăp ƀư dơi ntuh kơl đah têh 4 mbôr ndeh hăn ngăch, mbôr rlu ndeh ndal na nao lôch trong, hvi neh trong 25,5 mét. Dĭng lĕ ntuh kơl 8.833 rmen prăk, dơi ƀư tĭng trong kan ndrel nsum-êng (PPP). Khay ƀư 36 khay kơp bah nar tâm ton geh tam.

Trong têh hăn ngăch TP.HCM-Thủ Dầu Một-Chơn Thành nthoi bah trong Vành đai 3 TP.HCM tât Thị xã Chơn Thành (n’gor Bình Phước), nta an hun hao nkual Đông Nam Bộ, pơk hvi ntŭk ntô nkual ƀ on têh n’hanh công nghiệp. Rnôk trong têh hăn ngăch Chơn Thành-Gia Nghĩa lôch jêh, mbra nthoi tay đah nkual Tây Nguyên, jêng tâm rgop nkual, ntrôl hun hao wăng sa-rêh jêng, nkre đăp mpăn mât njrăng bri dak, renăk njrăng. Nău nchrăp ƀư rgop ƀư tĭng rgâl nău rƀŏng 5.000 km trong têh ngăch ma Đảng n’hanh Chính phủ lĕ n’gluh an tâm lvang 2021-2030.

Thủ tướng lah rjăp, năm 2025 lah năm hao rgâl ngăch rƀŏng tât Đại hội Đảng lam dak rơh tal 14, Thủ tướng đă N’gor Bình Dương ƀư uĕh Đại hội Đảng ăp gưl; ƀư uĕh ăp nar lễ, nar nkah gĭt têh bah neh dak; rgop mbơh ƀư n’glôch jêh ƀư tĭng Nghị quyết 18 bah Trung ương mpeh dăp, rgum jêt n’gâng kan ƀĭt jêt; kơp uănh tay ăp nău rƀŏng, nău kan gay ƀư uĕh lơn tay, geh săk rnglăy năm 2025 âk lơn năm 2024 n’hanh lôch jêh ăp nău rƀŏng, nău kan bah lĕ năm kan.

Đah jong trong knŭng rlău 50km bah nău nchrăp ƀư, Thủ tướng đă, rhoăt đêt khay ƀư, ƀư tĭng 3 ca 4 kíp, sa ndăn bĭch ndăn gay tât nar 2/9/2026 sa nkra nău nchrăp ƀư gay geh ntŭk ntô hun hao, Thủ tướng nsing nơm ăp n’gâng kan nău kan n’gor mbra ƀư dơi.

Thủ tướng đă Nkual ƀon têh Hồ Chí Minh, Bình Dương, Bình Phước, Tây Ninh an ƀư rjăp di ngăch, đăp mpăn, uĕh nâp n’hanh an mât uănh nău rêh bah nuĭh ƀon lan lĕ an ntŭk gŭ bah nơm an nău nchrăp ƀư, nuih n’hâm lah ntŭk gŭ mhe uĕh lơn ta ntŭk ơm, nkre njrăng n’gang sa khâm sa ƀer, an pah kan dah rŏng kloh uĕh, yor ƀon lan, yor nău hun hao bah neh dak.