Jêh âk nar sa Tết răm m’ak, gơih nđơr, wa Nguyễn Viết Đồng ta phường Ea Kao, n’gor Dak Lak lĕ hăn mir cà phê hăn uănh nđik neh, pơk dak tŏ êng, nchrăp an tŏng tơm tơm tăm. Wa Đồng an gĭt, mir tơm bah rnăk wâl dôl tâm lvang kơn play, tŏ tŏng dak mbra kơl mir mât play dơh lơn, hao săk geh tâm năm tât.

Gay wơt geh du năm săk play, ăp gưl khlay bôk năp, gay tŏ di nar gay nkao dang, kơn play. Mpôl hên ndăn sa tết, nchrăp hăn mir ăp nar khay wai gay tŏ cà phê. Mŏng năm Bính Ngọ răm m’ak, yan cà phê năm săk play.

Jêh ăp nar Tết rgum rƀŭn, wa Nguyễn Văn Trường (xă Cư Pơng, n’gor Dak Lak) mô ru plơ̆ tay mir cà phê 1,5 ha bah rnăk wâl gay nchrăp an rơh tŏ tal 2, rnôk khlay kơl tơm si mât play nse n’hanh hun hao đăp mpăn. Gay tŏng dak tŏ, Wa Trường lĕ ntuh kơl lĕ n’glău n’gâr dak ndrel trong tŏ ntêm nkrem.

Aƀaơ, tâm xă lĕ rngôch kơt kuih lĕ neh, rwăt bặt lăk gay mât dak. Ƀư n’glău bạt dŭt tam. Kônh wa saơ geh dak lah bơm sĭt nkrem tâm n’glău. Rnôk yan wai geh duh phang ri dŏng dak ntêm nkrem aơ gay tŏ an tơm tăm.

Dak Lak aƀaơ geh nklăp 213.000 ha cà phê, rgum dŭt âk ta nkual mpeh bah lơ nhâp nar (n’gor Dak Lak ơm). Knơm nchrăp tơm dak, kơt dŏng khoa học kỹ thuật n’hanh mât chăp đăp mpăn, săk geh cà phê yan năm 2025-2026 mât rnoh âk, săk geh rlău 570 rbăn tấn, nsĭt tay geh prăk âk an nuĭh tăm.

Tâm rnôk nuĭh ƀon lan ta mpeh bah lơh nhâp nar hăn mât chăm tơm tăm jŏ năm geh rnoh khlay âk ri nuĭh ƀon lan joi ka mpeh bah lơ luh nar n’gor Dak Lak hăn tĭng dak lêng jêh âk nar răm wơt năm mhe, wơt Tết. Ta ndrâm ka Đông Tác, phường Phú Yên, (n’gor Dak Lak), âk tàu ka dak lêng têh tât ndrâm. Nô Hồ Ngọc Hội-Du hê ƀĭt duk nkoch:

 Nar 5 Tết oh nô ƀĭt duk tât ndrâm. Rhơn răm ngăn, joi geh âk ka ngừ. Tết mbrơi năm 2026 aơ uănh kơt geh prăk bah dak lêng hôm.

Njưh ndrâm dak lêng ka Đông Tác đŏng jêh ăp nar răm wơt Tết, nô Hồ Trọng Hạnh, tơm tàu ka ta phường Phú Yên, n’gor Dak Lak, rhơn an gĭt.

Rơh hăn dak lêng aơ joi dŭt âk, oh nô ăp nuĭh rhơn đŏng, răm m’ak. Bôk năm rhơn dơh nơih kơt aơ lah dŭt rhơn ngăn hôm.

Tâm rnôk nuĭh ƀon lan rhơn tât ndrâm, ăp nuĭh ƀĭt duk, doanh nghiệp rwăt âk rnôk tàu mhe tât ndrâm. Wa Cao Thanh Hừng, ntoh măt du doanh nghiệp way rwăt ka ngừ tăch n’gluh an gĭt, ka joi joi Trường Sa yan aơ geh âk n’hanh ndơ uĕh kah, dơi ntŭk rwăt jêr ngăn kơt châu Âu, Mỹ, Nhật Bản ŭch. Lĕ rngôch rnoh ka tât ndrâm tâm ăp nar bôk năm mhe dơi doanh nghiệp rwăt lĕ.

Bôk năm mpôl hên nsrôih rwăt đah rnoh khlay, ntop kơl kônh wa jêh ăp nar jong tĭng dak lêng, gay ăp nuĭh geh du nău Tết mbrơi hơm răm.

Rnoh kơp bah Chi cục Thủy sản n’hanh gôl dak n’gor Dak Lak, jêh Tết nguyên đán Bính Ngọ, du nar geh âk tàu ka (dŭt âk joi ka ngừ đại dương) njưh ndrâm, đah rnoh nchrăp geh hang rhiăng tấn.

Bah ăp mir cà phê uĕh nđĭr tât ăp tàu ka njưh ndrâm bôk năm mhe, rup ndah pah kan jan sa  jêh Tết ta Dak Lak dôl pơk âk rup gui uĕh. Mông nar hăn pah kan ndăn, nău mĭn nkra njêng nchrăp lor n’hanh tĭng đah nuĭh ƀon lan đah doanh nghiệp lĕ jêng nâp nâl an du năm mhe âk nău mpŏng, Đah nău nsing nơm mhe, nsrôih mhe n’hanh trong ƀư nar lơ săk rnglăy, nuĭh ƀon lan, nuĭh joi joi ka Dak Lak mpŏng du năm Bính Ngọ uĕh dăng, nău rêh nar lơ sâm geh, rgop tâm nău hun hao nâp nâl bah nuĭh ƀon lan.