Ƀon lan rnoi mpôl đê̆ ta n’gor Kon Tum way du nuih n’hâm tĭng nău Đảng. Tâm rơh tâm lơh tâm su kăl e, ƀon lan tĭng Đảng, Chính phủ, kơl tahen  lơh phŭng rlăng. Lôch nê, kônh wa ndrel đah ăp thôn ƀon lan gay jut jăng ji ngot n’hŭch ach o. tâm rơh hun hao mhe, Kon Tum n’hao nău dơn kan an ăp đảng  viên n’hanh mpôl kan đảng, nkre grêt dêh đah tâm dâng, nkre đah ăp trong nkra ngăn ngăn gay tĭng kơn ndơ̆ thôn ƀon hun hao nâp dăng.

Jay bah yuh Y Chon, rnoi Gié- Triêng, Kruanh Hội liên Hiệp bu ur xã Đăk Dục, nkuâl Ngọc Hồi ta ƀon Đăk Răng aƀaơ hŏ jêng ntŭk pla n’hơ, tăch ăp ntil ndơ tuch tăm- puăch ka ntoh lư bah nkuâl, kơt puăch sŭr pâr, ndrănh yăng, boh tiêu cha…aơ lah n’hâm suan 4 năm rdâk njêng Hợp tác xã Dục Nông bah yuh Y Chon. 4 năm rdâk njêng hợp tác xã ri geh 2 năm kol nuh srê Covid-19, yơn yuh Y Chon ndrel 40 xã viên hôm ƀư geh 10 ndơ geh ƀư êng bah he đŏng, tăch luh âk. Nsĭt geh năm aơ hŏ tât 1 rmen prăk. Yuh Y Chon an gĭt:

“Đảng viên ân lah nuĭh dâk leo lor mpeh lĕ rngôch ăp trong ntĭt leo, ăp nău dơn kan. Mpôl hên mô dơn tăch ăp sŭr mblâm, puăch sŭr rêh mô lah sŭr ntil dơm ôh ma mpôl hên ƀư puăch sŭr nê jêng puăch sŭr pâr n’hanh mpôl hên hŏ sơch ndơ dja gay tâm rlong ndơ geh ƀư Ocop gưl n’gor n’hanh geh 3 sao. Tât aƀaơ ndơ geh ƀư bah mpôl hên dơi bu ŭch rvăt dŭt âk lơn lah ăp rnôk Tết ri ndơ geh ƀư bah mpôl hên mô tŏng an tăch”.

Nău nkoch yuh Y Chon nkre ƀư Kruanh Hội bu ur xã, nkre dâk leo kônh wa ta nkual jêr jŏt joi geh trong hăn mhe tâm nău kan ƀư njêng tăch rgâl, lah ngoăy tâm hang rhiăng, hang rbăn nău ntĭt mpeh cán bộ, đảng viên ta Kon Tum dâk leo lor, krêp dêh đah ƀon lan tâm nău tĭng ƀư ăp nău dơn kan ma mpôl kan Đảng hŏ jao. Tĭng wa A Blum, du hê bu ndrŏng sâm Ngọc Linh ta ƀon Ngọc La, xã Măng Ri, nkuâl Tu Mơ Rông, đah aƀaơ rlău jât năm ri  păng n’hanh kôn wa tâm ƀon, tâm  xã hôm ach o ngăn. Nơm cán bộ bah xã tât nkuâl nhŭp ti nchŏng kan, ntĭm nti bun tĭng mbor neh, trong srih tăm tĭng găr sâm, ươm dŭng cà phê, koh n’ging njêng mpŭm lha…ma aƀaơ wăng sa rgâl  kloh. Ăp trong ƀư geh ndrŏng ma tơm cà phê bri nđik, tơm Sâm Ngọc Linh hŏ rêng lam nkuâl Tu Mơ Rông. Wa A Blum rngot rhơn:

“Kônh wa he tĭng Đảng, Ngih dak, djăt cán bộ ntĭm nti trong wăng sa, tăm sâm, tăm ba lŏ gay geh ndơ sa, nău rêh dơi hơm răm, đăp mpăn”.

Tĭng wa Dương Văn Trang, Ủy viên Trung ương Đảng, Bí thư Tỉnh ủy, Kruanh HĐND n’gor Kon Tum, ăp năm aơ rƀŏng sĭt mpeh tâm dâng n’hanh nkual ƀon lan rnoi mpôl đê̆ dŭt jêr jŏt mha êng, hŏ geh bar pe jât rbăn tơ̆ cán bộ, đảng viên dơi rgum jŭr sĭt tâm “njêng”, grêt dêh thôn, ƀon “Ndrel gŭ, ndrel sa, ndrel ƀư”, djăt nău ŭch rŏng, nkra nău dăn đă n’hanh nău ŭch rŏng bah nuĭh ƀon lan. Rƀŏng sĭt tâm dâng, ndrel hăn đah ăp ƀon, xã mât chăm nău rêh hun hao wăng sa – rêh jêng kon nuĭh, n’hao nău rêh nuĭh  ƀon lan lah trong nchrăp mô rgâl, dơi tĭng ƀư mbro ma ăp rơh kơn kruanh rđău kan n’gor Kon Tum. N’hanh tâm năm kan 2020- 2025 nău dơn kan dja dơi n’hao prêh đah nău ŭch njêng nău hun hao jŏ jong an ăp ƀon lan:

“Hŏ ma cán bộ đảng viên ntop kơl rnăk  ach o, rnăk dăch kêng ach o ƀon lan rnoi mpôl đê̆ lah hăn jŭr tât mir ba, lŏ sre n’hanh tĭng ƀư trong rƀŏng “mih jŏ tâng jru”, “nhŭp ti nchŏng kan” rdâk nkah nău mĭn nsrôih nsan hao êng klaih rlău ach o bah ƀon lan rnoi mpôl đê̆. Aơ lah ngoăy tâm ăp nău dơn kan chính trị khlay bah ăp cán bộ, đảng viên tâm dâng n’hanh ntŭk ƀon lan gŭ geh âk ƀon lan rnoi mpôl đê̆ gŭ rêh”.

Ntơm bah nău nsum suan, du nuih n’hâm bah Đảng n’hanh ƀon lan, n’gor Kon Tum hŏ ơm tât lĕ rngôch ăp xã geh trong ndeh ô tô hăn tât nklang; săk blău ntĭm nti dơi n’hao prêh; nhih dak si  ăp xã geh bác sỹ. Rnoh rnăk ach o ntơm bah rlău 65% rnôk mhe njêng tay n’gor năm 1991, hŭch jŭr hôm ta nâm 11% tâm kêng dŭt năm 2022. Ndrel đah nê lah rdâk njêng dơi lam trong kan chính trị nâp dăng đah 14 Đảng bộ mpeh n’gor, 668 mpôl kan Đảng tâm dâng đah rlău 31.300 đảng viên. Tâm ban ŭch đah trong nchrăp n’hanh dâk kan na nê̆, Đảng bộ n’gor Kon Tum rdâk tay nău nsing nơm đah Đảng bah ƀon lan ăp rnoi mpôl đê̆ tâm n’gor . ndrel đah nê, nuih n’hâm krêp dêh dôl njêng suan ntrôl n’hanh nău nănh an lam đảng bộ, tĭng ƀư ăp trong nkra têh, ntik n’hao ăp suan dăng bah n’gor gay hun hao jŏ jong nâp dăng đŏng./.