Ƀon Sơn lah ƀon lah rnoi Jrai tâm nkuăl n’har bri Đức Cơ. Bah năp nơh, tâm rnôk ngih vâl, gung trong ê geh hun hao, nau tâm n’ur đah nkuăl n’har bri ê geh âk, ri nau ma ƀon kan rdâng nê lah nau mô geh hăn nti, djăt nau bu jâu, văng sa mô geh hun hao. Bu ranh Siu Bình lah nŭih leo trong hun hao văng sa, đah du ha cà phê, rlau 2 ha cao su, du ha điều. Yor tĭng wa, gay kônh wa kơt tĭng ri săk păng nơm ân leo trong lor:

 “Ƀon lan saơ nơm ƀư lor ri bu ƀư kơt tĭng nơm dơm. Tâm ƀon nê, bah năp nơh mô geh nŭih tăm cao su ôh, êng gâp dơm, jêh ri bu saơ cao su geh nau dơi sa ri bu tăm bum. Saơ gâp dơi ƀư ri ƀon lan bu kơt”.

Rlau 70 năm, yơn lah nhoat jâng bah wa Siu Bình hăn ngăch, hôm têl tâm neh bah ƀon Sơn. Wa tât ăp ngih, hăn tât mir bonh đă kônh wa ngăn lah rnăk ach o kơt nti, ƀư tĭng nau kan ueh, ăp nau văng sa săk tam gay ma rgâl nau rêh. Đah nau blau ngăn, wa ntĭm, mbơh nau tăm cà phê, cao su ân du đê̆ rnăk tâm ƀon. “Mih jŏ bĕ neh” ndrel “kuăn ty ntĭm kan” lah bar nau ma lôch 10 năm ma aơ Wa ƀư gay ăp nhoat kơl an ƀon lan, tâm nê geh rnăk wa Ksor H’Phiêng rgâl nau mĭn, nau kan, hun hao văng sa rnăk vâl nâp nâl. Yuh nkoch: “Rnăk hên tăm ba, cao su ndrel điều. Bu ranh Bình kŏ ntĭm nti rjăp ngăn. Ntĭm nau tăm, mât chăm, jêh ri siu phân mhâm ƀư ân tâm di yan, ân geh nau văng sa prêh ngăn. Ntă nŭih mô gĭt ri ôp păng ntĭm mbơh rjăp ngăn. Kônh wa phung hên rhơn ngăn ndrel djăt tĭng Wa Bình lah kơt nê. Bu ranh lah nŭih bu rnơm tâm ƀon hên ngăn”.

 Đah yuh Siu H’Lan, bu ranh Siu Bình lah nŭih kơl an rnăk wa đăp mpăn, mô êng tât nau kan văng sa, ma hôm kơl rklaih nau tâm jin tâm lah tâm rnăk vâl:

 ‘Bar hê ur sai nhul ndrănh, jêh ri Wa Bình hăn kơl rjaih ân. Pnagư bonh đă, ntĭm nti jêh aơ mô hôm dơi geh nau ƀư kơt nê tay ôh”.

            Bu ranh Siu Bình mbơh tâm dăch kơt aơ:

‘Geh nau tâm jin tâm lah ri nơm tâm nkhah 2 ding, nơm dâk tâm nklang. Nơm ân ndơn nau ma nơm lah ma bu. Lah khân păng tâm jin ri nơm mô dơi rganh ri nơm đŏng hăn kơl rklaih nau”.

Ntơm bah ăp nau tâm jin, tâm lah tâm ƀon lan, tât nau kan bonh đă ƀon lan mô tĭng, mô djăt ăp nau mhik, mât đăp mpăn rnă njrăng tâm nkuăl n’har bri, moh nau tih nau jêr kŏ jă bu ranh Siu Bình kơl rklaih mbơh ân kloh. Thiếu tá Đăng Duẩn, tâm rmôt kan bong đă nŭih ƀon lan Đồn Biên Phòng Ia Nan, mbơh:

‘Bu ranh vay tâm mbơh tâm nchră nau ma oh nô tahen Biên phòng bonh đă, ntĭm nti kônh wa hun hao văng sa, rnăk vâl, bay ndrel ma rmôt kan hên hăn tât ăp ngih, nkah đă đê̆ rnăk ƀon lan geh mir tâm dăch ma nkuăl n’har bri, vay geh tâm in, tâm pit ri ƀư ân rjăp tĭng nau ntrŭnh mrô 34 mpeh n’har bri jêh ri ăp nau ton lah bah ƀon lan, nau ntrŭnh bah xã”.

Hôm bu ranh Siu Bình knŭng mĭn lah: Kônh wa hôm ŭch, hôm rnơm, păng hôm geh nau nsôih, n’hâm soan ri mra hăn ndrel ma khân păng, leo ƀon Sơn jêng ƀon lan mhe ueh ngăn:

 ‘Bu lĕ săch nơm, nơm ân geh ndơn nau kan, moh nau geh ri nơm hăn rklaih ân lôch lĕ. Nơm ân kơl an ƀon lan mơ tâm di”.

Trong sĭt ƀon Sơn, xã n’har bri Ia Nan, nkuăl Đức Cơ, n’gor Gia Lai nar aơ nthoi tay màu ndrih bah tơm cao su, mir điều, cà phê, ân saơ du nau rêh đăp mpăn ndrel hơm răm. Tâm nê geh bu ranh Siu Bình dôl nar măng nkoch mbơh nau ân kônh wa ndâk njêng nau tâm rnglăp, yor nau hơm răm, đăp mpăn ndrel hun hao bah ƀon lan nơm./.