Tĭng nău mbơh bah Bộ Nông nghiệp n'hanh Môi trường, tâm rnoh 38 nău dăn đă bah EC, geh 31 nău dăn đă hŏ ƀư lôch jêh, hôm 5 nău dăn đă dôl tĭng kơn ƀư lôch jêh tĭng trong nchrăp n'hanh 2 nău dăn đă ân tâm ôp, ƀư kloh tay gay đăp mpăn tâm di đah nău ngăn n'hanh pháp luật Việt Nam. Tât lĕ khay 9, lam dak geh rlău 80.000 bôk duk lơh joi ka dơi mbơh dăn, nchih rgum ta ntŭk mât prăp nău lư tui ka gưl neh dak. Rnoh bôk duk hŏ ntrŭp ndơ uănh nđôi trong hăn geh nklăp 99%. N'glôn jêh rơh hop, Groi Thủ tướng đă ntơm bah aơ tât dŭt năm an nsrôih tĭng ƀư "5 mô" tâm nău lơh joi tui ka IUU: mô geh tay bôk duk lơh joi tui ka geh dak bah dih nhŭp kân; mô an geh bôk duk mô tŏng nău dơi hăn; mô an geh nău tih VMS jŏ jong; mô an geh ndơ tăch mô tŏng nău dơi joi tu tơm; mô an geh rnoh nchih mbơh mô tâm di đah rnoh mbrô, si ƀŭt n'hanh nău ngăn. Ăp ntŭk an geh mât uănh na nê̆ tĭng bôk duk ka, mât đăp mpăn rnoh mbrô di na nê̆, tâm mbơh, dơi uănh nđôi; mkra lĕ ăp nău kŏ khan, mô an du ntŭk kan ƀư mô ueh khuch tât nău nsrôih nsum tâm nkô̆ mpŏng jăng lơi nău mbơh njrăng "Nău nchueng rvêl" bâh EC.