Rlău 120 km lah trong hăn nô Vũ Thế Lực ndrel rmôt ƀon lan kan lŏ mir ta xă Ea Ning, n'gor Dak Lak, rlet rlău gay tât ta mir ntil bah wa Lê Tùng Linh ta xă Trường Xuân, n'gor Lâm Đồng. Khân păng ŭch uănh năl tu tơm ntil tiu lor rnôk jŭr prăk ntuh kơl. Đah nuĭh tăm tiu kơt nô Lực, săch di ntil tâm ban đah roh âk năm nău kan, ân ntơm ƀư tay du rơh tuch tăm.

"Joi gĭt ma mạng ri âk hôm yơn ma rwăt ntil ri hăn joi gĭt tơm, tât ta mir tơm bôk năp an na nê̆. Nuĭh ntuh kơl kơt nơm ri klach ngăn lah n'gluh prăk rwăt ntil, tăm tơm tiu 2-3 năm, rnôk geh play mơ saơ mô di lah ntil Tiu Tùng Linh, ma lah ntil rlăm, ntil rlăm ri rnôk nĕ roh mông nar hôm, hôm e mông nar ƀư tay đŏng".

Nău rwê ntil rlăm bah nô Lực lah nău rwê nsum bah hang rkeh ƀon lan kan lŏ mir ta Tây Nguyên, n'hanh lĕ lah nău wa Lê Tùng Linh mĭn rwê tâm trong hun hao ntil tiu geh moh săk păng nơm.

Năm 2014, rnôk mât chăm mir tiu bah rnăk wâl, wa saơ du tơm geh nău hao jêng êng. Wa an âk năm tĭng groi nđôi, săch n'hanh yơng ntil. Tât năm 2021, ntil tiu Tùng Linh dơi ndơ̆ an ntŭk tăch rgâl. Ntil tiu aơ geh reh hao jêng dăng, tơm hao jêng uĕh, dơi rdâng đah tu ndrŭng chuh sa uĕh. Bah tơm bôk năp, wa tĭng kơn rdâk njêng mir yơng ntil, aƀaơ geh bơi 8.000 n'gâng tiu rhŏ an yơng ntil.

Năm 2023, tơm tiu Tùng Linh dơi kơp dơn lah tơm bôk năp; năm 2025, mir tơm dơi kơp dơn lah mir tơm bôk năp, geh nău dơi pă an nklăp 700.000 hom ntil ăp năm. Tiu ntil Tùng Linh dơi N’gâng kan Khoa học n'hanh Công nghệ pă an samƀŭt kơp dơn dăn ƀư săk ntơ.

Đah wa Linh, hun hao dơi ntil tiu mhe lah du nău dơi, yơn ndơ̆ ntil di tu tơm tât ty nuĭh tăm mư lah nău dŭt uănh khlay. Yor lah rwăt ntil rlăm, ƀon lan kan lŏ mir mô dơn roh prăk ma hôm roh lĕ mông nar n'hanh nău dơi tuch tăm đŏng. Dơi ntô̆ n'hao lah Nuĭh ƀon lan kan lŏ mir Việt Nam dŭt blău 40 năm rgâl mhe, wa Linh hôm mĭn njêng nău ntil rlăm n'hanh mpŏng ŭch ăp ngih pah kan dơi kan ndrel lăp kan gay mât njrăng nuĭh ƀon lan kan lŏ mir.  "Dơi săch lah nuĭh ƀon lan kan lŏ mir ntoh lư ri dŭt n'hao êng săk, dŭt rhơn n'hao êng săk. Gâp mpŏng ŭch lah, ngih pah kan dơi kan geh nău dơi kan, nsum ty tâm rgop ƀư mhâm ƀư ntlơi jăng nkô̆ nău ntil tiu rlăm ta ntŭk tăch rgâl. Gay ndơ̆ tơm ntil ngăn tât đah kônh wa ƀon lan kan lŏ mir he, hôm lah rwăt ntil rlăm ri nê lah ƀư jêr jŏt an ƀon lan kan lŏ mir."

 Wa Nguyễn Văn Anh, Kruanh Hội Nông dân xă Trường Xuân, n'gor Lâm Đồng, an gĭt ntil tiu Tùng Linh tơm hao jêng dăng, dơi rdâng đah bu tuh n'hanh săk geh uĕh: "Mpôl hên dŭt rhơn rnôk nô Linh lah ngoăy tâm 96 nuĭh ƀon lan kan lŏ mir ntoh lư bah Việt Nam năm 2026. Nô Linh mô dơn lah nuĭh saơ, pơk hvi dơi ntil tiu geh âk nău dŭt uĕh, tâm di đah trôk nar neh ntu ta Tây Nguyên lah nsum n'hanh ta âk ntŭk êng ƀa ƀă. Nô Linh hôm geh dŭt âk nău rgop an nău kan rêh jêng, nău kan kơl nuĭh ta ntŭk đŏng."

Ntơm bah du tơm tiu rgâl êng tâm mir jay, wa Lê Tùng Linh lĕ nsrôih joi, hun hao jêng ntil tiu ntơ săk nơm, pơk tay trong dơh an nuĭh tăm tiu. Yơn nău khlay bah nuĭh ƀon lan kan lŏ mir ntoh lư mô knŭng gŭ ta nău geh wăng sa, ma hôm ta nău dơn kan đah nsum mpôl.