Ta rơh rƀŭn, nuĭh ƀon lan ăp phường Sông Cầu, Xuân Đài n'hanh xă Xuân Thọ dăn đă n'gor Dak Lak ơm doh rklaih jêr jŏt ta ăp trong nchrăp kan jŏ jong, ntuh kơl ndơ dŏng rdâng lơh dak bŭk, nkra bah kol khan ta trong nchrăp nkual ƀon têh Sông Cầu n'hanh dăp rgum ntŭk sŏk choih rhŏ dŏng an nău ŭch rdâk njêng ta ntŭk.

Nglôch lôch rơh rƀŭn nchră mâp nuĭh ƀon lan, wa Nguyễn Thanh Nghị djôt dơn ăp nău dăn đă bah nuĭh ƀon lan, dăn đă n'gâng kan n'hanh ngih pah kan dơi kan n'gor Dak Lak tâm pă, mkra lôch ăp nkô̆ nău mpeh nău dơi. Nkre, lah rjăp gay mât uĕh săk geh, dơh uĕh, n'gor Dak Lak ân ndăn ƀư lôch jêh dăp rgum gưl xă, phường, njêng ntŭk nsing mbơh ƀư ăp nău dơn kan hun hao wăng sa - rêh jêng.