Đại hội Đảng bộ ăp gưl năm kan năm 2025-2030 hăn tât Đại hội đại biểu lam dak tâl XIV bah Đảng lah nar kan chính trị geh nkô̆ dŭt n’hâm khlay ntơm an rơh hun hao mhe bah neh dak. Aơ mô dơn lah rnôk gay lam Đảng, lam ƀon  lan n’hanh lam tahen uănh tay du njăr trong hŏ hăn rlău uănh năl nău dơi hŏ geh n’hanh ăp nchiăng khan mpăng đêt rnôk ntăm n’gâng an ăp trong nchrăp têh jong rƀŏng tât hun hao neh dak tâm rơh mhe. Yor kơt nê̆, pah kan nchrăp n’hanh ƀư đại hội Đảng ăp gưl ân dơi ƀư đah nuih n’hâm dơn kan dŭt âk. Gưl ủy ăp gưl rgum rđău đă khoa học ăp tŏng rêng n’hanh răp jăp. Radio nău ngơi Việt Nam dăn mbơh nkoch nău nchih bah Tổng Bí Thư Tô Lâm đah bôk moh “Ƀư uĕh Đại hội Đảng bộ ăp gưl năm kan 2025-2030”

Đại hội đảng bộ ăp gưl năm kan 2025 - 2030 geh nkô̆ khlay mha êng. Aơ mô dơn lah rơh sinh hoạt chính trị têh kuâng, jru hvi tâm lam Đảng, lam ƀon lan ma hôm lah jâng ntơm gay ƀư geh nău dơi Đại hội đại biểu lam dak tâl XIV bah Đảng. Têh lơn, rêng kan dja lah ngoăy tâm ăp ndơ ƀư jêng n’gâng sơn nâp njêng ntŭk nsing chính trị dăng n’hao neh dak tĭng kơn chuat lăp tâm rơh hun hao mhe, rơh hun hao, ndrŏng dăng, hun hao têh uĕh, têh kuâng, tâm ban đah ăp dak lam ntŭr neh kơt nău ŭch rŏng mpŏng geh bah Kruanh Hồ Chí Minh dŭt n’hâm dêh rŏng n’hanh nău wơl geh bah lam rnoi nuĭh.

Ngăn geh cách mạng Việt Nam an saơ, Đại hội đảng bộ ăp gưl geh nău khlay têk ndrêng, rƀŏng trong, n’gâng tơm, geh ring tam jru hvi tâm lam Đảng n’hanh lam  rêh jêng kon nuĭh. Đại hội Đảng bộ ăp gưl năm kan dja geh 3 nău dơn kan rgum tơm, nê lah: tâm nchră, ŭanh an dŏng siƀŭt nchrăp lor đại hội gưl he n’hanh rgop đah trong nchrăp siƀŭt Đại hội gưl bah lơ, siƀŭt nchrăp Đại hội XIV bah Đảng; sơch nuĭh râng gưl ủy ăp gưl; nchrăp ăp tŏng nuĭh kan tâm lam nhih pah kan kruanh rđău kan bah Đảng ntơm bah tâm dâng tât gưl Trung ương. Ăp nkô̆ dja lah nkô̆ nău “Rêh nha”, têh khlay, geh tât nău khlay rđău kan, mât bôk kan, suan rlăch ndăng bah Đảng; tât nău tor luh trong nchrăp, gung trong, trong rđău đă; n’glêh an suan dăng tâm Đảng nơm n’hanh lam trong kan chính trị; tât lĕ rngôch nău kan rđău đă bah mpôl kan đảng ăp gưl tâm năm kan tât tâm ban kơt suan dăng bah lam rnoi nuĭh let năp tay.

Đảng he lah đảng mât bôk, Đảng rđău đă ma gung trong. Siƀŭt nchrăp lor Đại hội ăp gưl lah nău ƀư jêng ngăn ngăn nău mĭn, trong rƀŏng rđău đă bah Đảng jêng ăp trong nkra geh suan rêh bah ngăn geh n’gâng kan, nhih pah kan, đơn vị, trong kan dơi tâm pă nău dơn kan; geh rnoh khlay rƀŏng tât nău rđău đă, leo trong, nkra bah lĕ nău nchiăng khan, nău khoah, ndăn uĕh trong dơh soih, droh rklaih ntŭk kô̆ yơn kơl khan, mpêr n’gar nking kol, rgum ntêr lĕ nău tât râng bah cán bộ, đảng viên n’hanh ƀon  lan, njêng suan dăng têh kuâng gay dơi tât n’hanh rlău rnoh tât hŏ nchrăp lor, rgop ƀư wat jêh tât geh nău dơi ăp rnoh tât kan, trong nchrăp ma Trung ương mô lah đảng bộ gưl bah lơ hŏ n’gluh. Đăp mpăn săk tam nău rgop đah siƀŭt nchrăp lor Đại hội bah gưl he, trong nchrăp siƀŭt gưl bah lơ na nê̆, bah gưl bah lơ tâm ban kơt trong nchrăp siƀŭt Đại hội XIV bah Đảng, lơn lah  dăn đă ăp trong nkra ntơm bah nău rêh tâm dâng, bah n’hâm n’hôr bah nău rêh bah tĭng n’gor, mô dơn nê ma hôm tĭng xã, tĭng ƀon lan n’hanh tĭng nuĭh kan đŏng, nuĭh n’hâm nsan, suan ring lam dăng tâm lam dak lah nău ŭch tât ma ăp gưl ủy ân dơi geh.

Nuĭh kan gưl ủy lah rmôt kruanh cán bộ mât bôk kan, ƀư tơm, n’gâng sơn ta tĭng n’gâng kan, tĭng n’gor, nhih pah kan, đơn vị; lah “ntung njŏ” đah Đảng, Ngih dak đah ƀon lan, lah mpôl kruanh rđău đă, ntĭm nti, leo tĭng ƀư, n’glêh an nău ndơ̆ trong nchrăp, gung trong bah  Đảng, trong kơl, pháp luật bah Ngih dak lăp tâm nău rêh; nkre, rƀah gĭt nô nău dăn đă đah Đảng, Ngih dak n’gluh trong nchrăp, trong kơl tâm di đah nău mpŏng, nău geh tâm di bah ƀon lan. Bí thư, Groi bí thư, gưl ủy viên way  lah tơm nuĭh khlay, n’glêh an tât geh nău dơi tĭng ƀư nău  dơn kan chính trị, nău đăp mpăn, hun hao, nâp dăng bah n’gâng kan ta ntŭk, nhih pah kan, đơn vị lam dak ta năp măt n’hanh jŏ jong.

Gay ƀư geh nău dơi Đại hội đảng bộ ăp gưl năm kan 2025-2030, gưl ủy ăp gưl ân grêt dêh nkô̆ nău ntrŭnh mbrô 35 nar 14/06/2024 bah Bộ Chính trị “mpeh leo kan Đại hội đảng bộ ăp gưl hăn tât Đại hội đại biểu lam dak tâl XIV bah Đảng” n’hanh n’glôch jêh mbrô 118 nar 18/01/2025 bah Bộ Chính trị mpeh rgâl nkra, kơi ntop nău ntrŭnh 35 mhe nkoch bah  lơ nê.

Tâm rnôk he nsrôih an ƀư Nghị quyết mbrô 18 bah Bộ Chính trị mpeh dăp rgum, glêh tam nuĭh kan ăp nhih pah kan, đơn vị tâm lam trong kan chính trị, ăp gưl ủy ân ngăch dăp rgum ăp tŏng nuĭh kan, n’glăp kan n’hanh ƀư glêh tam tay nuĭh kan tâm trôm bah tĭng nhih pah kan, đơn vị, n’gor. Puăn Đảng bộ mhe dơi njêng lah Đảng bộ ăp nhih pah kan Đảng Trung ương, Đảng bộ Chính phủ, Đảng bộ Quốc hội, Đảng bộ Mặt trận Tổ quốc; du đêt Ban Đảng trung ương mhe dơi njêng dăp rgum tay; ăp đảng bộ, chi bộ mhe bah du đêt Bộ, ăp n’gor, Nkual ƀon têh... nsing tâm nău dơi, nău dơn kan, dăp rgum nuĭh kan dơi quy định ơm đăp mpăn dơi leo ƀư n’hanh mât kơn nău kan tĭng di điều lệ Đảng n’hanh ăp qui định mhe bah Ban chấp hành trung ương tâm nău mât bôk kan tâm ban kơt tâm rnôk leo ƀư Đại hội đảng bộ, chi bộ.

Gay ƀư jăp Đại hội Đảng bộ ăp gưl, ăp ủy ân rgum tâm 3 nkô̆ nău tơm bah kơi aơ:

Bôk năp, ân tâm ban ŭch nău gĭt êng, ăp nău dơi bah neh dak hŏ dơi geh lôch 95 năm ta nâm nău rđău kan bah Đảng, lơn  lah lôch 40 năm rgâl mhe dŭt têh dăng, dŭt di ma uănh khlay, n’hao êng săk. Yơn neh dak he nha hôm tâm rdâng đah âk ntil jêr jŏt, ntul rlong ma lam Đảng, lam ƀon lan, lam tahen he ân nsrôih tâm rnglăp, nsrôih lơn đŏng gay rlău dơi, tâm nê Đại hội đảng bộ ăp gưl năm kan 2025-2030 geh nău dơn kan ân râng n’hanh lah mpôl kan n’gâng tơm ân nkra ăp nău jêr jŏt, ntul rlong dja bah kơi. Âk kô̆ yơn, kol khan mpeh trong đă tĭng nchiăng khan jŏ năm nha mô hŏ dơi droh rklai, ntlơi jăng đŏng. Geh ma nău “ntrâm jâng ta ntŭk”, geh ma nău plơ̆ rŭch tay bah kơi, lơn lah plơ̆ rŭch mpeh wăng sa, mpeh khoa học, công nghệ n’hanh tŭp “dăk ndơm rĭng geh tĭng bôk nuĭh” hôm rŭ hôch.

Tâl bar, mpeh rdâk njêng Siƀŭt nchrăp lor n’hanh râng nău rgop tâm siƀŭt nchrăp đại hội gưl bah lơ, siƀŭt nchrăp Đại hội XIV bah Đảng. Siƀŭt mbơh chính trị hao rblang dăn Đại hội Đảng bộ ăp gưl ân grêt dăch nuih  n’hâm siƀŭt nchrăp hao rblang dăn Đại hội XIV; rgum rblang luh, uănh năl nău dơi tĭng ƀư nghị quyết đại hội mhe aơ nơh; nchih nkoch ăp tŏng, dăch ngăn ngăn n’hanh hun hao bah ăp n’gor, ăp n’gâng kan, nhih pah kan, đơn vị. Ƀư kloh ăp nău dơi rgâl mhe, ntoh lư tâm nău rđău kan, nchŏng đă bah mpôl kan đảng; ta nuih n’hâm uănh sŏng tâm nău ngăn geh, uănh năl di ngăn ngăn, lah kloh nău ngăn, ân nchŏng luh sŏng ăp nău mpăng đêt, rbăn lhơ, hôm nchiăng khan, lơn lah ăp ntŭk kô̆ yơn, kol khan đah nău hun hao mô hŏ dơi droh rklaih, nkra bah.

Tâl pe, êng uănh khlay tât nău nchrăp tơm nuĭh Đại hội. Ân gĭt êng jru, nchrăp nuĭh kan mô dơn êng an du rơh đại hội; ngai lơn, nê lah nău nchrăp nuĭh kan an hun hao let năp tay bah mpôl kan đảng, nău hun hao bah n’gâng kan, trong kan, n’gor, nhih pah kan, đơn vị; hvi lơn, nê lah săk rêh bah Đảng, nău rêh nha bah chế độ n’hanh nău hun hao bah neh dak, bah rnoi nuĭh. Aơ lah nău kan ma cán bộ, đảng viên n’hanh ƀon lan uănh khlay tĭng groi nđôi; aơ lah nău kan ma ăp mpôl tih djơh, ndăn chính trị joi trong choh chôl, nkoch nklă nău, ƀư jêng nău tâm rkeh ndrăng nơm. Mpeh dăp rgum gưl uỷ, ân đăp mpăn nău rđău đă na nê̆, lam lĕ rngôch bah gưl uỷ đah ăp ntŭk gŭ kan, trong kan khlay; uănh săk tam, mô njău ma dăp rgum ma njŭr dêh rnoh di; mô jêng kâp ăp n’gor, ăp n’gâng kan, ân geh nuĭh râng gưl ủy da dê; gưl uỷ viên dơi sơch ân lah găr ntil kruanh rđău kan chính trị, lah ntơh măt an rmôt đảng viên n’hanh dơi nsum mpôl lam ƀon lan nsing nơm; ăp gưl ủy viên ân di lah nuĭh lăp kan nsum “Nkôp nsŏng kơl” rlăch ndăng n’hanh ân tâm rnglăp, dơn ngoăy âk mpeh nău mĭn sŏng di n’hanh dâk kan, kloh uĕh, nâp dăng ngăn, nsĭng nâp. Ân mpư n’hao nău dơn kan bah nuĭh mât bôk kan tâm nău dăn đă, nkoch mbơh nuĭh kan, lơn lah nuĭh nđơn tay nău kan tĭng quy định mhe bah Trung ương.

Lor nchrăp, nsrôih ƀư jăp pah kan rƀŏng nău mĭn, nkoch trêng nău lư gay njêng nău dơn ngoăy tâm lam đảng bộ n’hanh nău tâm ban ŭch tâm nsum mpôl lam ƀon lan; rdâk tay nău nsing nơm bah cán bộ, đảng viên n’hanh ƀon lan đah mpôl kan đảng tâm dâng. Nta trong dơh n’hanh ntŭk soih uĕh gay ntik n’hao bôk rngok gĭt blău n’hanh nău tât râng bah ăp rơh kơn ƀon lan tâm rdâk njêng ăp siƀŭt nchrăp lor n’hanh pah kan cán bộ, rgop uĕh, geh nău tam tâm nău dơi bah đại hội, ơm ndơ̆ nghị quyết đại hội Đảng lăp ngăn tâm nău rêh, nsĭt tay nău rêh hơm răm, dah rŏng, rhơn nđơr an ăp nuĭh ƀon lan.