Rnăk wa K’Phân, đảng viên tâm thôn 3, xã Đinh Trang Thượng, nkuăl Di Linh lah ngoai tâm âk rnăk leo trong tăm cà phê nâp, kah. Đah 3 ha cà phê, năm mhe rlau kơl an rnăk wa geh 17 tấn rnglay, nsĭt geh âk rmen prăk. Mô êng blau ƀư ndrŏng ân nơm, wa K’Phân hôm nsôih kơl an kônh wa tăm tay cà phê rang, ntĭm ndop ntil mhe gay n’hao nau geh:

            ‘Cà phê ranh mô geh âk play, ri ân ndop tơm gay ma ân jêng tay. Tâm nê, tŏ dak đê̆ ngăn 3 tŏ, poh phân 4 tŏ, puh dak si 2 tŏ tâm năm ri mơ cà phê geh âk play. Ntơm ndop măt cà phê ntil mhe ăp năm geh tât 15 tấn”.

            Đah nau tuch tăm tâm di, ndrel ăp ntil tơm tăm geh rnoh văng sa âk kơt, sầu riêng, play bŭng, tăm tơm ndrŭng brai...rnoh geh tuch tăm ta Đinh Trang Thượng hao mro. Năm 2024 tâm du ha neh tăm ta aơ ân geh 125 rkeh, tâm du hê bôk nŭih geh nklăp 47 rkeh prăk, geh 104% nau nchrăp ntrŭnh bah Đảng bộ xã ndŏ luh.

            Tĭng wa K’Đức, Bí thư Chi bộ Thôn 2, xã Đinh Trang Thượng, ngoai tâm ăp nau khay kơl an nkuăl geh hun hao tâm rơh rlau aơ lah lah nau leo trong lor bah đảng viên, Lam thôn geh rlau 200 rnăk ƀon lan, tâm nê geh 17 đảng viên hăn lor tâm nau hun hao văng sa:

            “Ƀư ueh nau rđau đă bah Đảng uỷ gưl ba lơ, Chi bộ ntrŭt dăng nau ndop măt ân tơm cà phê, ăp đảng viên tâm rhôn leo trong ueh ngăn, ƀư ueh nau leo trong tâm nau ƀư ndrel nsĭt nau săk geh văng sa ueh, nau rêh bah kônh wa geh n’hao, geh nau dơi gay mât chăm ân oh kon hăn nti tât dŭt tât lôch. Êng ndop cà phê, rnôk aơ kônh wa hôm tăm nsum âk tơm tăm kơt, bơ, sầu riêng, mắc ca, tă bah nê nau săk geh lơn ma n’hao âk”.

            Wa K’Đô, Groi Bí thư Đảng uỷ, Kruanh UBND xã Đinh Trang Thượng mbơh, ntơm rnôk rnoh cà phê jur thuk, xã ƀư nau ntrŭnh mpeh nkô̆ nau rgala tơm tăm, bonh đă ƀư nau mhe kơt ah tăm tơm ndrŭng brai, tuh byăp, dŏng ntil cao sản. Ngăn lah, nau dơi bah ăp đảng viên lah nau khlay tâm nau ntĭm nti kônh wa dŏng nau kan mhe tâm tuch tăm. Tâm năm 2025 aơ, ndrel ma ntrŭt dăng nau kan hun hao tuch tăm nâp nâl, xã bonh đă ƀư hun hao tăm cà phê kloh gay n'hao nau geh, tâm rgop ma ăp ntŭk kan rvăt ndơ tuch tăm gay đăp mpăn ntŭk tăch ueh ân kônh wa. Nsôih n'huch rnoh rnăk ach o geh 2% ndrel n’hao nau geh bôk nŭih geh 55 rkeh prăk.  Wa K'’Đô mbơh:

            ‘Đah nau rđau kan bah Đảng uỷ ndrel nau nsum ty lăp kan bah lam ntrong kan chính trị ri âk đảng viên hŏ leo trong tâm nau hun hao văng sa. Ntơm bah nê ƀon lan tâm nkuăl leo trong tâm kơt, rgop nau ntrŭt dăng văng sa, rêh jêng nsum bah nkuăl. Đinh Trang Thượng kŏ nsôih bonh đă ƀon lan jut ngih truh sat, tâm năm 2024 hŏ jut 16 ngih. Tâm năm 2025 aơ mra lŏ jut 18 ngih, hên nsôih ƀư jêh bah năp đại hội đảng tâm khay 5 năm 2025 ân jêh lĕ”.

            Đah ăp nkô̆ nau tâm di, nau nsum ty ndrel nau nsum nuih n’hâm bah đảng bộ, n’gâng kan ndrel ƀon lan, Đinh Trang Thượng dôl ăp nar hao jêng, jêng ngoai tâm ăp xã ƀon lan mhe leo trong bah nkuăl Di Linh. Rnôk aơ xã Đinh Trang Thượng dôl ƀư ueh nau dơi bah đảng viên, n’hao nau kan khoa học tuch tăm mhe, ntrŭt dăng nau tăm tĭng trong nâp nâl, rgop nau ndâk ƀon lan săk ntor, nsôih ndâk dơi nau prêh ngăn gay ma rhơn ân nar Đại hội lam dak tal XIV bah Đảng./.