Tâm nău rêh, geh ăp kon nuĭh hŏ sơch nău kan gay an lĕ nău gĭt blău, gay kơl nuĭh êng mô kă rnam jêr jŏt. Bu ur bác sĩ rnoi Khmer Huỳnh Thị Kẩm Huyên, tât bah Trung tâm Y tế nkuâl Châu Thành (Trà Vinh) – lah nuĭh leo lor trong mpeh nuih n’hâm kan dak si uĕh n’hanh lĕ nuih n’hâm đah nuĭh ji, lơn lah ăp nuĭh ji ach o, ndrô ranh.

Ntoh bah du rnăk kan mir ba ngăn, ntŭk âk ƀon lan Khmer gŭ rêh, jêng Huỳnh Thị Kẩm Huyên ntơm bah jê̆ hŏ gĭt nău krit jêr n’hanh mô ăp tŏng geh bah me bơ̆ tâm ban kơt nuĭh ƀon lan ƀon he. Tă bah nê hŏ ntrŭt ntrôl păng tĭng trong kan dak si, đah nău ŭch rŏng nsĭt nău gĭt blău n’hanh mpang ti bah he gay rhŏ an nuĭh ji dŭt ach o. Bác sĩ Kẩm Huyên nkoch, ntơm bah jê̆ păng uănh saơ âk nuĭh geh kop ji ma mô dơi săm uĕh. Geh ăp nuĭh ji tă bah mô năn kơl săm ngăch ma jêng jru lơn jêng păng hŏ ton êng tâm nuih n’hâm tât druh têh ân ƀư du ntil nê nơh gay kơl khân păng mât chăm dak si uĕh lơn, tâm rnôk me bơ̆ dŭt n’grŏ tĭng nău n’glêh an bah kon:

“Me bơ̆ ri mô nchâp đă nău kơt nti mô lah nău kan an oh kon. Rnôk hôm jê̆ gâp way geh kop ji đŏng, n’hanh ăp tơ̆ ji ri saơ me bơ̆ mât chăm dŭt krit jêr ngăn, ndrĭ dĭng geh nău mĭn lah mhâm ƀư du ntil ndơ nê nơh gay mbra kơl tay nuĭh êng dơi mât chăm uĕh mpeh dak si, me bơ̆ nuĭh ji ri dơi mât chăm uĕh lơn. Jêng n’glêh an sơch nău nti”.

Năm 2015, lôch geh bằng Bác sĩ đa khoa, Huỳnh Thị Kẩm Huyên dơn lăp pah kan ta Khoa Cấp cứu, Nhih dak si nkuâl Châu Thành (aƀaơ lah Trung tâm Y tế nkuâl Châu Thành). 10 năm aơ, bác sĩ Kẩm Huyên mô dơi nkah hŏ dah âk nuĭh he mât săm, mbơh nti trong săm ji an bu. Âk nuĭh geh tât rmanh, thŏk ndal dơi yuh n’hanh băl ndrel kan kơl rêh ngăch lor rnôk rdeng hao tât chuyên khoa tâm di. Mô dơn lĕ du nuih n’hâm đah ăp nuĭh hŏ kơl săm ngăch, bác sĩ Huyên hôm rôih săm n’hanh mât chăm lĕ nuih n’hâm ăp nuĭh ji têh ranh. Tâm nê geh mô đêt bu ranh lăp tâm nhih dak si tâm nuih n’hâm rvê, mô dơi ât nuih n’hâm đah bác sĩ. Yơn  đah nău đăp dêh n’hanh lĕ nuih n’hâm, Huyên hŏ ƀư muh măt uănh mô jăp nơm jêng nsing nơm n’hanh nău dêh rmên.

Wa Nguyễn Văn Liêu ta xã Hưng Mỹ, nkuâl Châu Thành – du hê nuĭh ji nting kô̆ mâk n’hanh nsôp nting guĭh, ntơm bah âk năm aơ way luh lăp tâm nhih dak si an gĭt: Aơ lah nhih dak si ta gưl nkuâl ma hôm gŭ dăch nklang n’gor, nuĭh tât săm ndal, but săm ji lơn âk lah bu ranh n’hanh rnăk ach o, lah ăp nuĭh mô geh âk prăk kaih yơn bác sĩ hôm dŭt rah rơch, đăp dêh:

“Uănh nsum bác sĩ ta aơ dŭt n’hâm mât chăm, moh ndơ he geh ji, ôp ri bác sĩ tât dĭl. Hôm bác sĩ Huyên tâm ban kơt nê đŏng, dŭt n’hâm mât chăm, moh ndơ he geh ji ri ôp bác sĩ tât dĭl, dŭt rah rơch ngăn”.

Nkah nău ntĭm bah Wa Hồ đah ăp nai dak si: “Nai dak si tâm ban me mbleh”, bác sĩ Huỳnh Thị Kẩm Huyên hŏ mô rlu kơt nti, tiăr nti gay tĭng ƀư jăp mbăk anh nău kan bah he. Mât di nău ton đah săk he nơm, păng hŏ nsrôih kơt nti n’hanh aƀaơ hŏ tốt nghiệp Chuyên khoa 1 –Nội khoa.

Nău kan ta nhih dak si ơm hŏ ŏ r’ah, yơn đah du bác sĩ bu ur Huyên lơn ma ŏ r’ah lơn. Ăp măng kâp kơl săm ndal nuĭh ji măng rsol, ăp nuĭh ji jru ân mpăn nuih n’hâm n’hanh n’glêh an di….dŭt mpet jâk. Yơn Huyên mô hŏ plơ̆ rŭch. Lơn lah, nhih dak si tât đah nuĭh ji lơn âk lah ƀon lan Khmer, rnăk ach o dơi n’gor ntop kơl bảo hiểm y tế, nău gĭt blău hôm đêt:

“Ƀon lan bah he ta dăch kêng thị trấn ri hôm gĭt aơ ri rnôk hăn tât but săm ji, yơn ăp nuĭh ta ƀon lan jru ngai dŭt jêr jŏt. Geh ăp bu ranh tât nhih dak si ma mô geh rnăk wâl jăt tĭng mô lah tă bah nău rêh jêr jŏt rnăk wâl mô dơi tĭng mât chăm. Geh nuĭh mô geh prăk, mpôl hên tâm rgum nsum rvăt ndơ kơl an piăng, dak mô lah ăp ndơ ŭch geh khlay n’glĕ nău dơi geh bah he”.

Bác sĩ CK1, Giám đốc Trung tâm Y tế nkuâl Châu Thành uănh năl: bác sĩ Kẩm Huyên lah nuĭh nai dak si ntoh lư lĕ nuih n’hâm đah nuĭh ji, nuih n’hâm dơn kan n’hanh geh chuyên môn nâp, dơi băl kan nsum dêh rŏng.

“Mpeh nău way kan tâm ăp pah kan rhŏ dŏng but, săm ji, uănh nsum bác sĩ Kẩm Huyên lah ngoăy tâm ăp bác sĩ ntoh lư, bah nhih dak si. Lơn  lah mpeh nău dơi kan, chuyên môn; tâl bar mpeh trong mâp tâm ba kơt mbơh ngơi đah nuĭh ji. Măy êng đŏng lah Kẩm Huyên dŭt geh nuih n’hâm kơt nti mpeh nău way kan, n’hanh aƀaơ hŏ nti lôch bah kơi đại học đŏng”.

Ta nău rêh âk rduăl nău kan, ăp nău nkoch mpeh nuih  n’hâm uĕh lŏng rŏng nuĭh, lĕ nuih  n’hâm đah nuĭh ji ach o kơt bác sĩ Huỳnh Thị Kẩm Huyên dŭt di ma uănh khlay. Mpŏng lah, nar lơn ma geh âk tay bác sĩ mom geh tâm săk he play nuih nđơr geh, gay pah kan mât chăm n’hâm suan, lơn lah đah nuĭh ach o nar lơn ma uĕh. Bác sĩ Kẩm Huyên mô dơn lah nău n’hao êng săk bah rnăk wâl, bah nhih dak si ma hôm lah nuĭh ntĭt leo lor uĕh ang an ndrăng bal mom kơt tĭng./.