Tâm bơh ri aơ nơh, ăp gưl hội bu ur tâm n’gor Gia Lai hŏ nsrôih dŏng công nghệ thông tin tâm pah kan hội n’hanh ăp nău  kan bah bu ur tâm dâng. Đah ăp trong ƀư tâm di, âk ndơ geh ƀư tă bah oh yuh ƀư luh hŏ râng tâm trong tăch rgâl online, njêng suan ntrôl an nău hun hao wăng sa.

Yuh Nay H'Tó ta xã Ia Rtô, thị xã Ayun Pa, n’gor Gia Lai đah săk ntơ "Ndrănh yăng Jarai" hŏ dơi kơp dơn OCOP 3 sao – ndơ ƀư  OCOP lor bôk năp bah xã. Yuh njêng ăp trang facebook, zalo n’hanh fanpage "Ndrănh yăng Jarai Ayun Pa" gay nkơnh n’hơ. Yuh Nay H’Tó an gĭt, nău livestream rêng n’gon ƀư ndrănh kơl nuĭh rvăt gĭt kloh lơn, ntơm bah nê rnoh geh ndơ tăch hao âk rlău ăp khay:

“Rnôk tât di Ocop 3 sao bah thị xã ri dŭt dơh, âk nuĭh  tât joi rvăt. Rnôk tât di ocop bu joi rvăt âk rlău bar tơ̆, nuĭh mhe dŭt âk, geh năch Hà Nội, nkual ƀon têh Hồ Chí Minh. He tâm ton đah shipper, he nklâm lôch ndơ he kuăl khân păng hăn njăl dơm.”

Tâm ban kơt yuh Nay H’Tó đŏng, tâm bơh ri aơ nơh, âk bu ur bah nkual ƀon têh tât nkual thôn ƀon, nkual rnoi mpôl đê̆ ta n’gor Gia  Lai hŏ kơt nti, rƀah gĭt ăp nău dơh ma công nghệ mbrô lah nsum n’hanh mạng xã hội lah êng gay nkơnh n’hơ, ndơ geh ƀư tât âk mpưm nuĭh dŏng. Yuh Hoàng Thị Hồng Hà ta thôn Quý Đức, xã Ia Trok, râng rơh tăch ndơ điện tử ta fanpage Hội Liên hiệp bu ur nkuâl Ia Pa đah ndơ ƀư dak toh srat mƀêt ônh.  Rơh livestream wăch rgum rlău 3.300 tơ̆  nuĭh uănh, dơn tay rhiăng ndơ bu dăn rvăt:

“Rnôk ndơ̆ dak toh srat mƀêt ônh luh ntŭk tăch rgâl ri dơi kônh wa n’hanh nuĭh rvăt nsing nơm n’hanh kơl rvăt. Mpôl bu ur geh tât hăn uănh gĭt n’hanh ntĭm nti an gâp ƀư bên đah facebook, zalo tâm ban kơt tik tok đŏng gay nkơnh n’hơ ndơ geh ƀư bah he. Nơm geh hội bu ur  ma ndơ ƀư bah gâp nar lơn ma hun hao, hăn tât nuĭh ƀon lan n’hanh năch dăn rvăt âk lơn, nkơnh n’hơ ndơ geh ƀư uĕh lơn”

Aƀaơ, Hội Liên hiệp bu ur nkuâl Ia Pa hŏ rdâk njêng geh  5 ntŭk ntĭt leo dŏng công nghệ thông tin nsĭt tay geh nău tam âk. Nê lah nău kan nkoch mbơh “Ăp khay 1 hê nuĭh ntĭt leo lor”, “Ăp du nar 1 nău kan geh nkô̆ khlay”, “Ăp du ntil ndơ geh ƀư nkre đah rơh tăch ndơ điện tử” ta ăp mạng xã hội; trong leo “Mât bôk kan mpôl mô kâp geh siƀŭt”, nkô̆ way nkoch “Djăt nău lah bah hội viên, bu ur”. Ăp trong ntĭt leo dja hŏ rgop kơl bu ur ta ntŭk  ban tĭng ngăch đah rgâl mbrô, nkre ntop kơl ndơ̆ âk ndơ geh ƀư tât nuĭh dŏng. Wa Huỳnh Thị Ngọc Lan – Kruanh Hội Liên hiệp bu ur nkuâl Ia Pa an gĭt tay:

“Mpôl hên dŭt tâm di nuih n’hâm đah trong leo “Ăp pơh du ntil ndơ geh ƀư dŏng đah rơh tăch ndơ điện tử”. Lor rnôk mpôl hên rdâk njêng trong ntĭt leo ƀư dja ri ma ăp nău kan rlong ƀư gay gay nti an ăp hội viên livestream na nê̆ ta mạng xã hội facebook, zalo... Bah rơh tăch ndơ điện tử ri âk oh yuh hŏ geh trong nkơnh n’hơ ndơ geh ƀư bah he ta mạng xã hội du trong lam hvi.

Tâm lam n’gor Gia Lai, hội bu ur  ăp gưl hŏ tĭng ƀư 65 trong ntĭt leo “Rmôt bu ur dŏng công nghệ 4.0" n’hanh "Bu ur rgâl mbrô" đah hang rbăn nuĭh lăp kan nsum, rdâk njêng n’hanh mât kơn hang rbăn rmôt zalo, facebook, tiktok, mbrô youtube….Tĭng wa Rơ Chăm H’Hồng – Kruanh Hội Liên hiệp bu ur n’gor Gia Lai, nău dŏng công nghệ thông tin hŏ kơl oh yuh tĭng kơn rgâl mhe trong tăch rgâl, rgop n’hao nău dơi tam pah kan hội n’hanh hun hao wăng sa.

“Mpôl hên ntik n’hao tay pah kan nkoch trêng ta ăp rmôt hŏ njêng bah ntơm nơh bah Hội, website, cổng thông tin điện tử bah hội, trang zalo, facebook... pơk gĭt ngăch, tât ăp hội viên ăp trong kơl bah hội, ăp Nghị quyết bah Đảng, bah ăp Tâm nchră Ban chấp hành tât hội viên du trong năn ngăch”./.