Wa Trương Văn Quốc (56 năm deh), gŭ xă Ea K’tur, n’gor Dak Lak, mhe rwăt ndeh ô tô 5 ntŭk gŭ lĕ tă dŏng. Jêh rnôk jêh samƀŭt rhoăt samƀŭt rhăch nău bôk năp ta Jrô kan Cảnh sát Ntung trong, wa ndơ̆ ndeh sĭt n’hanh tât ngih Công an xă Ea K’tur gay ƀư samƀŭt dăn rwăt tay. Bôl lĕ ranh n’hanh mô gĭt công nghệ, yơn wa Quốc dơi cán bộ công an ntĭm dŭt n’hâm. Knơm nĕ, lĕ rngôch rnôk dăn rwăt ndeh ƀư ngăch. Wa Trương Văn Quốc lah:

Gâp dơi cán bộ công an ntŭk dăn ntĭm samƀŭt dăn ta phần mềm, mbơh soăy n’hanh uănh nđôi mrô khung, mrô măy. Aƀaơ, gâp lĕ ndơ̆ soăy, bấm mrô n’hanh khân pơng ton 2-3 nar. Lah nsum rmôt công an xă ntĭm dŭt n’hâm đah ƀon lan, samƀŭt dơi ƀư ngăch n’hanh dơh.

Nô Nguyễn Minh Tuấn, nuĭh kan du doanh nghiệp tăch ô tô ta Dak Lak an gĭt, du khay doanh nghiệp tăch nklăp 40-50 ndeh mhe. Bah năp đaơ, samƀŭt dăn rwăt n’hanh bấm biển an ndơ̆ samƀŭt rhăch nău n’ha rđaih ta công an n’gor mô lah nkuăl, roh âk nar. Bah khay 3 tât aƀaơ, trong ƀư aơ lĕ dơi rgâl dơh knơm phần mềm điện tử, tâm rgop hao đah công an xă n’hanh ăp ntŭk tăch. Nău dăn rwăt ndeh aƀaơ knŭng roh đêt mông, nuĭh rwăt dơn biển số bah kơi 2-3 nar, rgâl yor kâp lĕ pơh n’hanh tâm in tâm mpet kơt bah năp.

Aƀaơ mô hôm jut mrô khung, mrô măy kơt bah năp đaơ, yor ngih măy khân pơng lĕ ntăm ơm phiếu mrô khung, mrô măy tâm samƀŭt rhăch nău ndeh. Nuĭh rwăt knŭng mbơh săk lah căn cước công dân, app định danh rnoh 2, gay mpôl hên mbơh soăy trước bạ n’hanh khân pơng mbra dơn nău mbơh ta điện thoại. Jêh nĕ khân pơng ndơ̆ prăk măt mô lah njuăl khoản, jêh nĕ bấm biển ta ntŭk tâm điện thoại bah phần mềm. Nău bấm mrô, mbơh ndơ̆ soăy, knŭng roh 2-3 mông n’hanh jêh nĕ jêh ăp samƀŭt. Nuĭh ƀon lan dăn rwăt ndeh ri bưu điện mbra njuăl biển số tât jay.

Thượng úy Nguyễn Tất Diệu, cán bộ mât uănh dăn rwăt ndeh ô tô Công an xă Ea K’tur mbơh, du khay ntŭk kan mkra nklăp 200 samƀŭt rhăch nău mô tô n’hanh 60 samƀŭt rhăch nău ô tô, măy sok, măy kuih... Jêh rnôk ntlơi công an gưl nkuăl (bah 1/3), lĕ rngôch samƀŭt gưl mhe, pă rgâl, rgâl săk ndeh... dơi ƀư tă bah phần mềm da dê n’hanh điện thoại thông minh. Bah lơ 1/7 mhe rlău, ntŭk kan dơi ntop tay cán bộ jêng nău wơt dơn samƀŭt rhăch nău n’hanh ƀư samƀŭt pă dăn rwăt ndeh dơh lơn. Thượng úy Diệu an lah, rnôk nuĭh ƀon lan bên đah dăn rwăt trực tuyến, ƀư lĕ hăr, nău ƀư ăp samƀŭt pă dăn rwăt ndeh mbra lơ ngăch lơn tay.

Ndeh mhe aƀaơ dơi dăn rwăt trực tuyến toàn trình. Rnôk rwăt ndeh ta ntŭk tăch, nuĭh ƀon lan ƀư ndơ̆ soăy online ta điện thoại; ngih pah kan công an mbra wơt dơn samƀŭt rhăch nău, mkra n’hanh njuăl tay samƀŭt jêh ƀư. Nuĭh ƀon lan knŭng kâp n’hanh dơi dăn rwăt ta jay. Đah ndeh ơm, ndeh rgâl săk, rwăt tăch tay mô lah rgâl nkra ndeh, nuĭh ƀon lan an djôt samƀŭt rhăch nău n’hanh ndeh tât gay mpôl hên uănh nđôi na nê̆ ndeh. Lah ndeh mô geh lôk mrô khung, mrô măy, dak sơn mô geh rgâl nkôp đah samƀŭt rhăch nău tơm ri mbra dơi uănh an n’hanh ntĭm ƀư samƀŭt dăn rwăt ndeh kơt ndeh mhe.

Jêh n’gul khay nglăp nsum n’gor, Dak Lak djôt dơn tay hang rhiăng ô tô n’hanh mô tô dơi dăn rwăt mhe. Bôl rnoh ndeh dăn rwăt nar lơ âk, nuĭh kan mô tŏng, yơn đah nuih n’hâm lĕ đah nău kan n’hanh dŭt n’hâm rhŏ an, công an n’gor Dak Lak hôm e mât săk rnglăy trong kan dăn rwăt ndeh. Ăp rgâl mhe tâm rgâl mrô mô knŭng rhoăt đêt mông nar, n’hŭch prăk hăn nsong, ma hôm dơi saơ kloh nuih n’hâm “yor nuĭh ƀon lan rhŏ kan”./.