Bâh 10 năm lah dak kan ndrel, tâm boh tâm rnglăp n’hanh tâm kơl đah Việt Nam- Thái Lan lĕ geh ăp njoat hăn nâp nâl ta ăp trong kan chính trị, wăng sa, nchră nău đah dak bah dih, văn hóa, ngih dak- rnă njrăng.

Đah nkuăl ƀon têh Đà Nẵng, aƀaơ geh 13 nău nchrăp kan bâh Thái Lan hôm nha geh nău tam đah lĕ rnoh prăk ntuh kơl klâp ma 60 rkeh đôlar Mỹ, rgum ta ăp trong kan tăch rgâl, tăch nchrai, pah kan, ka choh kho ao, rdâk njêng. Aƀaơ, Đà Nẵng geh 57 nău nchrăp kan dôl geh kuăl jă ntuh kơl ta âk trong kan. Ntŭk tăch dnơ lam ntur neh mpeh tăch rgâl, ntuh kơl, pâl nđaih, nău kan wăng sa luh nar- nhâp nar way geh ƀư ƀa ƀơ ta Đà Nẵng, geh âk nău tât râng bâh âk ntŭk, săk rnglăy bâh ăp doanh nghiệp Thái Lan. Ntoh ngơi ta rơh rƀŭn nchră, wa Hồ Kỳ Minh, groi kruanh UBND nkuăl ƀon têh Đà Nẵng ŭch, rơh rƀŭn nchră lah ntung njŏ ueh, geh săk tam tât ăp nuĭh ntuh kơl Thái Lan n’hanh ăp nuĭh ntuh kơl tâm dak tât đah Đà Nẵng. Nuĭh leo kan nkuăl ƀon têh Đà Nẵng ton kơl an, nta nău dơh nơih ueh gay ma ăp nuĭh ntuh kơl Thái Lan n’hanh ăp nuĭh ntuh kơl tâm dak mbơh tơih nău nchrăp kan, pah kan tăch rgâl geh săk rnglăy ta Đà Nẵng.