Ta ăp rơh tâm mâp ta ăp xã Đăk Ru nkuăl Đăk Rlâp, xã Đăk R’tih nkuăl Tuy Đức, xã Đăk Ha ta nkuăl Đăk Glong n’hanh xã Đăk Drô ta nkuăl Krông Nô, ăp đại biểu Quốc hội lĕ geh mbơh tơih đah ƀon lan ta Dak Nông mpeh nău nchrăp  nkô̆ nău kan, bôk nău kan bâh rơh rƀŭn nchră tal 6, Quốc hội khóa 14, djăt nău tâm rgop, nău dăn đă bâh ƀon lan ta năp rơh rƀŭn nchră.

Ƀon lan ta ăp ntŭk ta Dak Nông lĕ geh mbơh âk nău hôm e mô hŏ geh doh rklaih, dŭt âk ta trong kan mât uănh ntung trong, nău nchrăp mpeh neh ntu, ƀư tĭng nău kan hành chính mpeh dŏng neh. Ƀon lan đă ngih dak mât uănh ntuh kơl ƀư lôch ntung trong ta nkual ƀon lan, pă nău kan an oh kon rnoi đê̆, uănh nđôi nău dŏng sŏk prăk nti ta bôk năm nri...Âk ƀon lan mpơl nău ŭch n’hanh nău tâm ban nuih n’hâm njêng nău kan gay ma ơm mbơh tơih nău kan ƀư trong têh Chơn Thành n’gor Bình Phước- Gia Nghĩa n’gor Dak Nông ntop njêng nău nsrôih gay ma hun hao wăng sa rêh jêng.