Jêh 3 năm ƀư tĭng bôk nău kan ndrel nkoch trêng, Đài TNVN lĕ ƀư nkra njêng rlău 3.000 nău mhe, nău nchih, nău nkoch, nău ôp, ƀoh nău ntuh ngơi sŏng dăng mpeh ăp ntil wăng sa, văn hóa, rêh jêng, rnă njrăng-mât njrăng bri dak ta n’gor Dak Lak. Nkre, lĕ nkra njêng n’hanh pơk 1.816 bôk nău ntuh mpeh nău ngơi rnoi mpôl đêt, geh: 908 bôk nău ntuh nău ngơi Êđê n’hanh 908 bôk nău ntuh nău ngơi Bunong, 2 nău ngơi ta Dak Lak. Tâm 6 khay bôk năm 2023, Đài TNVN lĕ geh 480 nău nchih ăp ntil lah ăp nău kan wăng sa, chính trị, rnă njrăng mât njrăng bri dak bah n’gor.

Tâm rnôk nu nău rnă njrăng chính trị ta ntŭk du đêt nkuăl bah n’gor Dak Lak geh âk nu nău jêr jŏt, Đài TNVN lĕ geh âk nău nchih nu nău mhe, nău nchih tâm di njrăng n’gang ăp nău mplư rlăm, nsŭk nsôr, dô̆t jă bah ăp nuĭh rlăng; lah mpeh nău mô di bah ƀon lan ta năp ăp nu nău n’hanh nău wơl bơh bah ăp nuĭh lĕ tih.

Ntoh ngơi ta rƀŭn nchră, Ủy viên Trung ương Đảng, Tổng Giám đốc Đài TNVN Đỗ Tiến Sỹ uănh lah prêh, jêh 3 năm ƀư tĭng bôk nău kan ndrel, trong kan tâm rgop nkoch trêng trong hăn, nău mĭn, nău ntrŭnh bah Đảng, nău kơl bah pháp luật bah Ngih dak tât nsum mpôl ƀon lan ta lam n’gor Dak Lak lĕ n’hanh dôl nta nơih an phóng viên Đài TNVN râng pah kan ta lam n’gor. Nkre, n’gor lĕ ngăch mbơh an tŏng ăp nu nău ma báo chí uănh tât geh ăp ntil nău rêh, văn hóa, chính trị, wăng sa, rêh jêng, rnăk njrăng-mât njrăng bri dak gay nuĭh djăt geh trong uănh tâm di, lĕ rngôch n’hanh di na nê̆ ngăn. Tổng giám đốc Đỗ Tiến Sỹ mĭn lah, Đài TNVN lĕ n’hanh mbra hăn ndrel đah n’gor Dak Lak tâm ntrôl dăng lơn tay trong kan mbơh nu nău mhe, nkoch trêng. Tâm nĕ uănh khlay tĭng jăp ăp nău ntrŭnh, nău kơl geh nău êng an nkual Tây Nguyên n’hanh Dak Lak:

Tâm năm tât ri mpôl hên hôm e mĭn mbra ndrel đah đồng chí tĭng jăp ăp Nghị quyết bah Trung ương Đảng, ntĭm rđău bah Chính phủ, nău ntĭm rđău bah Ban ntĭm rđău 35 mpeh njrăng n’gang nu nău đăp mpăn, jêh nĕ nău kơl rnoi nuĭh, 3 bôk nău kan rƀŏng tĭng lam dak. Lơn lah n’glôn  jêh 67 bah Bộ Chính trị, Nghị quyết 103 bah Chính phủ n’hanh Nghị quyết 72 bah Quốc hội mpeh rlong ƀư du trong nău kơl êng an nkual ƀon têh Buôn Ma Thuột, tât aơ tay mpôl hên mbra rgop ndrel đah đồng chí ƀư tĭng nău kan nkoch trêng tâm di đah ăp nu nău mhe uĕh ngăn.

Uănh tay 3 năm ƀư tĭng bôk nău kan ndrel, Ủy viên Trung ương Đảng, Bí thư N’gor ủy Dak Lak Nguyễn Đình Trung an gĭt, ăp tác phẩm báo chí bah Đài TNVN nkoch trêng mpeh ăp ntil nău bah n’gor Dak lak lĕ n’glơi tay uĕh jru n’hanh geh lư uănh lah prêh. Lơn lah, nău Đài TNVN geh âk bôk nău ntuh ngơi rnoi mpôl đêt ta Dak Lak n’hanh nkual Tây Nguyên lah nău khlay gay n’hao săk rnglăy mbơh nău mhe nkoch trêng đah kônh wa ta ăp ƀon lan.

Đah nău tâm tâm rgop rjăp lĕ kơl ƀư tĭng uĕh nău mbơh mhe, nkoch trêng lĕ rngôch ăp ntil wăng sa-văn hóa, rêh jêng, rnă njrăng mât njrăng bri dak ta n’gor. Tă bah nĕ, rgop khlay tâm nău n’hao jâng nsan n’gor, nâp nâl nău knơm bah nuĭh ƀon lan tâm nău rđău bah gưl ủy, n’gâng kan ƀon ta ntŭk, ntrôl hun hao wăng sa, văn hóa, rêh jêng bah n’gor. Lah ntŭk geh tât 49 rnoi nuĭh oh nô, nău ŭch nu nău mhe, nkoch trêng ta Dak Lak lah dŭt têh. Yor nê, Bí thư N’gor ủy Dak Lak đă, năm tât, Đài TNVN pơk hvi tay ăp nkô̆ nău kan ndrel nu nău mhe, nkoch trêng. Tâm nĕ, dŭt ŭch nău mhe mpeh nău ƀư tĭng ăp nău ntrŭnh nău kơl bah Đảng n’hanh ngih dak ta n’gor.

 Tâm rnôk ƀư tĭng ăp nău kơl bah Ngih dak ta n’gor ri na nê̆ geh âk nău jêr, geh âk nău n’hŭch, nău kơl rnôk kơt dŏng ta nkual Tây Nguyên ri geh âk wăk kol. Nău aơ ƀư dŭt kloh tă bah ăp bôk nău kan rƀŏng tĭng lam dak jêh nĕ du đêt nău êng. N’gor mpŏng VOV, lơn lah VOV Tây Nguyên an geh ăp nău ngơi, an geh âk nău lah têh lơn tay mpeh ăp nău jêr, mô lah ăp nău wăk kol tâm nău mbơh ƀư tĭng ăp nău kơl gay hun hao nkual Tây Nguyên.

Nkhêp di nar ƀư n’gul gâl 3 năm ƀư tĭng bôk nău kan ndrel đah n’gor Dak Lak, Tổng Giám đốc Đài TNVN lĕ an Kỷ niệm chương yor nău kan ntuh ngơi an ăp đồng chí Nguyễn Đình Trung, Ủy viên Trung ương Đảng, Bí thư N’gor ủy; đồng chí Phạm Minh Tấn Groi Bí thư Rnâng kan n’gor ủy; đồng chí Phạm Ngọc Nghị, Kruanh UBND n’gor; n’hanh đồng chí Nguyễn Tuấn Hà, Groi Kruanh rnâng kan UBND n’gor.

Di rơh aơ đŏng, Đài TNVN lĕ an n’gor Dak Lak 3 rnăk jay tâm rnglăp khlay 300 rkeh prăk.