Ôi 26/2, ta nkual ƀon têh Buôn Ma Thuột, Mpôl tơm ƀư Lễ hội Cà phê Buôn Ma Thuột tâl 9 năm 2025, ƀư hop báo tay mpeh nar ƀư dja. Aơ lah rơh hop báo tâl 3 lôch bar tơ̆ ƀư ta nkual ƀon têh Hồ Chí Minh n’hanh Hà Nội. Năm aơ, lễ hội mbra geh 17 nău kan tơm. Bah meng ăp nău kan rpaih tâm ban kơt ăp rơh lễ hội bah năp nơh, lễ hội rơh dja geh âk  nău mha êng đah ăp trong nchrăp ntơm rdâk ƀư gay nkah ndray 50 năm rklaih luh Buôn Ma Thuột, kơt Lễ ntơm rdâk ƀư ngih máy cà phê năng lượng Trung Nguyên Legend; Lễ Ntơm rdâk ƀư Tổ hợp Trung tâm thương mại - Khách sạn – Jay gŭ ta nkual ƀon têh Buôn Ma Thuột; lễ pah neh ntơm rdâk njêng Nkual Công nghiệp Phú Xuân.

Lễ hội Cà phê Buôn Ma Thuột tâl 9 năm 2025, đah nkô̆ “Buôn Ma Thuột – Ntŭk rgum tât bah cà phê lam ntŭr neh,” mbra ƀư ntơm bah nar 09/3/2025 tât 13/3/2025. Wa Nguyễn Tuấn Hà, Groi kruanh Rnâng kan UBND n’gor Dak Lak, Kruanh mpôl tơm ƀư Lễ hội an gĭt, aơ mbra lah nar ƀư ntrŭt ntrôl ngăch tăch rgâl geh nkô̆ hôr khlay; lah rnôk gay ăp nuĭh mât bôk kan, doanh nghiệp n’hanh băl mpôl dak bah dih tâm mâp, tâm boh tăch rgâl, nkre mbơh nkoch săk ntơ lư cà phê Buôn Ma Thuột, hun hao pâl nđaih n’hanh buăt nthoi tâm rsong tăch rgâl.