Gay ntrôl ngăch đă ntrơn du gay an ƀư 53 ntŭk nchrăp kan rgum tơm khlay, n’gor Dak Lak hŏ njêng 5 Rmôt pah kan bah Tỉnh ủy, tă bah Bí thư n’hanh ăp Groi Bí thư Tỉnh ủy ƀư Kruanh rmôt. Aơ lah ăp trong nchrăp kan hôm nchiăng khan âk hồ sơ, wăk kol mpeh neh ntu, trok tâm, đă ntrơn du ntŭk gŭ mhe jŏ jong.

Lôch 45 nar an ƀư trong kan đă ntrơn du, 7 trong nchrăp kan hŏ ƀư lôch jêh 100% đă ntrơn du; 15 ntŭk nchrăp ƀư lôch jêh ntơm bah 90% let lơ. Nău dơi dja lôch rnôk ăp Rmôt pah kan jŭr na nê̆ tâm dâng, ndrel n’gâng kan ta ntŭk n’hanh nuĭh tơm ntuh kol tik luh tĭng wăk kol, năl kloh nkô̆ ân nkra ƀư n’hanh nău dơn kan bah tĭng nhih pah kan. Ndrel đah nê, păng nchih rnoh ngăch ƀư dơi pơk lăp mbro ăp nar kơl kruanh rđău kan n’gor ngăch năl ăp ntŭk nchrăp kan geh ma nău ƀư mbrơi rđău đă nkra ƀư. Lôch trong kan, Bí thư Tỉnh ủy Dak Lak Lương Nguyễn Minh Triết uănh năl, ăp wăk kol bah ăp ntŭk nchrăp kan ngăn ngăn ta rêng tĭng ƀư.

“Âk nău kan ntơm nơh he mĭn lah jêr, mĭn lah wăk kol trong tĭng, trong kơl, yơn rnôk kruanh rđău kan jŭr tât na nê̆ n’hanh ndrel ăp nhih pah kan way kan, tĭng cán bộ ƀư pah kan đă ntrơn du tik luh tĭng nkô̆, năl kloh nău dơn kan, kloh mông nar ƀư lôch jêh ri âk nău kan mbra dơi nkra lôch jêh.”

Lah nău đă ntrơn du lah ngoăy tâm ăp rêng kan khlay gay n’glăp trong nchrăp kan an ƀư, ri n’gluh tơm prăk ntuh kơl hôm dôl mpet jâk têh đah Dak Lak tâm ăp khay kêng dŭt năm đŏng. Ta rơh hop way tât leh khay 8 mhe aơ, kruanh rđău kan n’gor rong âk mông nar uănh năl rnoh ngăch n’gluh tơm prăk ntuh kơl đŏng. Trong nchrăp ntuh kơl năm 2026 bah Dak Lak rlău 11.294 rmen prăk. Tât aƀaơ, n’gor hŏ tâm pă na nê̆ rlău 9.918 rmen prăk, geh tât bơi 88%. Dŭt njrăng uănh khlay, hôm 1.375 rmen mô hŏ tŏng geh nău dơi jao tơm prăk.

Tĭng Giám đốc Sở Tài chính n’gor Dak Lak Cao Đình Huy, khay 8 tĭng trong nchrăp ân n’gluh dŭt đêt 3.000 rmen prăk yơn I ngăn geh nklăp 604 rmen prăk dơm. Gay n’gluh tơm prăk ntuh kơl di tât trong nchrăp quý III, êng tâm khay 9 n’gor ân tĭng ƀư nklăp 5.154 rmen prăk. Sở Tài chính hŏ pah kan đah ăp nuĭh tơm ntuh kơl geh tât, đă ton rnoh ngăch ƀư.

“Aƀaơ Sở Tài chính mbra pă nsing ta tơm ndơ manh ngăch rplăch n’hanh dơn pă an ăp ntŭk nchrăp kan hŏ geh rnoh âk kơp dơn dơm. Ăp pơh mpôl hên mbra dăn đă ăp Ban mât uănh dăn đă lah mpôl hên mbra pă an dĭl đah ăp rnoh nău kan hŏ ƀư lôch jêh. Nkhêp ăp oh nô mô hŏ dơi n’gluh tơm prăk ri mpôl hên rhuăt tay gay pă an ăp trong nchrăp kan êng geh rnoh âk nău kan.”

Aƀaơ nklăp 60% mpet jâk n’gluh tơm prăk ntuh kơl bah n’gor Dak Lak rgum ta 4 Ban mât uănh trong nchrăp kan, lah Ban Mât uănh trong nchrăp kan ntung trong n’hanh Tuch tăm, Ban Ntuh kơl Rdâk njêng mpeh luh nar, Ban Buôn Ma Thuột n’hanh Ban Tuy Hòa. Bah năp nău ŭch geh rgâl kloh tâm ntuh kơl, đă ntrơn du n’hanh ăp ntŭk ƀư rgum tơm khlay, Kruanh UBND n’gor Dak Lak Đỗ Hữu Huy đă mbơh na nê̆ nău dơi n’gluh tơm prăk ntuh kơl bah tĭng trong nchrăp kan, tĭng rnoh âk nău kan; rgâl ngăn tơm prăk luh bah ăp ntŭk nchrăp kan mô geh nău dơi ƀư an ăp ntŭk ŭch geh tơm prăk n’hanh nău dơi n’gluh tơm prăk ntuh kơl uĕh lơn. Kruanh rđău kan n’gor đă n’hao dăng hăn ôp uănh na nê̆ ta ntŭk ƀư đŏng, uănh năl nău dơi bah nuĭh tơm ƀư ndranh. Ăp nuĭh tơm ƀư ndranh mô tŏng dơi ân mĭn uănh tơh rgâl, der an nuĭh mô tŏng geh nău dơi ƀư jêng kô̆ yơn ƀư mbrơi nkai n’hanh n’gluh tơm prăk.

“Văn phòng ân mbơh an Kruanh rđău kan Ủy ban nhân dân n’gor trong nchrăp tâm pă an Kruanh rđău kan Ủy ban mât uănh tĭng tơm nuĭh ntuh kơl n’hanh trong nchrăp hăn ôp uănh, ntrŭt ntrôl tĭng trong nchrăp kan. Hăn tât ntŭk rdâk ƀư, mĭn uănh nuĭh tơm ndranh khân păng gĭt geh máy móc ndơ ntrŭp dŏng, khân păng geh công nhân đŏng lah mô; ndjôt lĕ rngôch siƀŭt nchih nar luh ƀư gay ra uănh tay. Mĭn uănh đăp mpăn lah ntơm bah rnôk dja tât kêng dŭt năm n’gluh geh dah âk. Lah tâm rnôk wăk kol ma năl kloh nuĭh tơm ndranh mô tŏng geh nău dơi, ri đă nuĭh tơm ntuh kơl ân rgâl dĭl.”

Ntơm bah trong kan đă ntrơn du tât rnôk ntrŭt ntrôl n’gluh tơm prăk ntuh kơl, Dak Lak dôl ndơ̆ rgum tơm tâm du trong ƀư mhe: grêt dăch ntŭk rdâk ƀư, nkra bah n’gu tơm tĭng kô̆ yơn n’hanh nkre đah rnoh ngăch đah nău dơn kan na nê̆. Aơ dơi uănh lah trong nkra khlay gay njêng nău rgâl tâm ăp khay kêng dŭt năm, ntrôl ngăch rnoh ƀư ăp ntŭk nchrăp kan, dŏng geh nău tam tơm prăk n’hanh ơm n’glăp dŏng ăp ntŭk nchrăp kan, ntik n’hao săk tam.