Ƀư tĭng nău ntrŭnh bah điện lực Việt Nam, bah khay 10/2023, Công ty điện lực Dak Lak mbra ntơm ƀư tĭng rgâl nar nchih mrô công tơ đah nar dŭt khay an ăp nuĭh dŏng điện ta lam n’gor. Tĭng nĕ, tâm năm 2023, nău kan điện mbra ƀư rgâl nar nchih công tơ điện đah nar dŭt khay an 289 rbăn nuĭh (geh 48,5% dĭng lĕ nuĭh dŏng), lah ăp rnăk geh nar nchih rnoh điện bah nar 16 let kơi.

Tâm năm 2024, nău kan điện mbra rgâl nar nchih mrô công tơ đah nar dŭt khay an lĕ rngôch nuĭh dŏng ƀa ƀă. Dơi gĭt bah bôk năm 2023, điện lực Dak Lak lĕ jêh nglăp công tơ điện tử n’hanh trong nchih rgum êng vê̆ kơp bah ngai an 100% nuĭh dŏng điện, đăp mpăn ndoh ndơ gay nchih tâm nar dŭt khay, dơh an nuĭh dŏng dơh nkah gĭt, dơh uănh nđôi. Nău rgâl aơ gay n’hao uĕh, săk rnglăy, kloh rah wah, dơh wât tâm trong kan mât uănh vê̆ kơp điện năng, nchih mrô điện n’hanh nchih prăk điện.