N’gor Dak Lak aƀaơ geh nklăp 150 HTX lŏ mir, rlău 270 ntŭk mât rong, ndrôk rpu n’hanh rlău 15.500 rnăk ƀon lan geh tâm rgop nkra njêng n’hanh tăch ndơ lŏ mir đah doanh nghiệp. Nău râng ntrong kan tâm rgop nsĭt tay âk nău geh an ăp ding râng. Ăp doanh nghiệp, HTX dơi geh tơm pă an ntŭk nkra njêng đăp mpăn, uĕh kah; mkra ntŭk tăch ndơ an nuĭh ƀon lan tă bah ăp tâm ton boăt nthoi, nta an nău kan an nuĭh ƀon lan. Ndrel đah nĕ, nău boăt nthoi jêng luh ăp ndơ kloh uĕh, đăp mpăn, ăp tu tơm kloh na nê̆ an nuĭh dŏng, nta an nău kan an nuĭh pah kan. Nău kơt dŏng ăp kỹ thuật mhe tâm nkra njêng lŏ mir kơl n’hŭch nău khuch mô uĕh tât ntŭk ntô gŭ âm.

Mhe aơ, UBND n’gor Dak Lak lĕ ƀư rƀŭn nchră uănh lah 5 năm ƀư tĭng Nghị định 98 năm 2018 bah Chính phủ. Ta rƀŭn nchră, ăp đại biểu lĕ dăn đă, n’gluh an ăp trong mkra ƀư tĭng ăp nău nchrăp ƀư, trong nchrăp boăt nthoi n’hanh tăch ndơ lŏ mir săk rnglăy lơn tay. Wa Huỳnh Bài, Kruanh Liên minh hợp tác xã n’gor Dak Lak dăn đă:

Liên minh hợp tác xã n’gor mpŏng geh nău uănh mĭn mpeh bôk nău ntĭm nti nuĭh kan, tal 2 lah nta an nơih gay ăp hợp tác xã gĭt tât tu tơm neh ntu hun hao ăp nkual tăm kơt ndâk ƀư ăp nkual prăp mât ndơ gay rhŏ an rnôk nkra njêng. Đah ăp gưl n’gâng kan kơt doanh nghiệp geh nău tâm rgop joi ntŭk luh an ndơ bah hợp tác xã geh nău đăp mpăn.

Wa Huỳnh Bài an gĭt đŏng, mhe rlău Liên minh Hợp tác xã n’gor Dak Lak lĕ ƀư ntŭk mpla nsơ nkoch tơih ndơ bah ăp rmôt hợp tác xã, hợp tác xã n’hanh ăp ndơ OCOP. Ntŭk tăch ndơ gŭ ta mrô 88 trong Điện Biên Phủ, phường Thành Công, nkual ƀon têh Buôn Ma Thuột, mpla tăch 151 ntil ndơ bah 25 Hợp tác xã tâm n’gor. Ntŭk tăch mpla nsơ ăp ndơ bah rmôt kan ndrel, Hợp tác xã n’hanh ăp ndơ OCOCP mbra lah ntŭk boăt nthoi tăch ndơ săk rnglăy đah ăp Hợp tác xã đah ăp nuĭh ton rwăt, tâm pă n’hanh nuĭh dŏng.

Mhe aơ, UBND n’gor Dak Lak lĕ ƀư rƀŭn nchră n’gul gâl 3 năm mbơh ƀư trong nchrăp hun hao wăng sa nsum, hợp tác xã lvang 2021-2025 n’hanh Bôk nău kan ƀư ngăn bah UBND n’gor ƀư n’glôn jêh bah N’gâng kan Chính trị mpeh rgâl mhe, hun hao n’hanh n’hao săk rnglăy wăng sa rgum tâm lvang mhe.

Tâm 3 năm bôk nău ƀư trong nchrăp hun hao nsum mpôl, hợp tác xã, n’gor Dak Lak lĕ ntop kơl ndâk njêng 57 hợp tác xã; ntop kơl ăp hợp tác xã măy mŏk ndoh ndơ, kơt dŏng rgâl mhe công nghệ, ndâk ƀư ntô lĭr, ndâk ƀư trong nkra njêng ndơ lŏ mir khlay ta ntŭk... đah dĭng lĕ prăk rlău 6 rmen. Ăp nău kơl êng kơt ntop kơl ndơ̆ nuĭh pah kan druh ndăm sĭt pah kan ta nkual wăng sa nsum; mô sŏk n’hŭch prăk manh neh, nchoen rnon, jŭt jăng rnon prăk soay; ntop kơl ntuh kơl ntung trong ngih wâl nkret njêng ndơ an hợp tác xã lŏ mir... dơi ăp gưl, n’gâng kan ƀon lan ta ntŭk ƀư. Prăk nkrem hun hao hợp tác xã n’gor Dak Lak lĕ pă an 32 hợp tác xã manh rlău 19 rmen prăk; Prăk nkrem ntop kơl mkra nău kan dôl an 8 hợp tác xã manh prăk rlău 1 rmen prăk. Wa Nguyễn Thiên Văn, groi Kruanh UBND n’gor Dak Lak an gĭt, dŭt âk hợp tác xã, rmôt kan ndrel ta ntŭk geh trong jêt, prăk đêt, têh nău kan jêt; nău tâm rgop hôm e đêt. Gay dơi geh nău rƀŏng tât năm 2030, n’gor geh nklăp 800 hợp tác xã n’hanh 1.000 rmôt kan ndrel, wa Nguyễn Thiên Văn an gĭt:

Tâm lvang tât an ntrôl dăng lơn tay nău ndâk njêng, nâp nâl hợp tác xã tĭng Luật Hợp tác xã năm 2012 n’hanh tât aơ tay nar 1/7/2024 mbra mbơh ƀư tĭng Luật Hợp tác xã năm 2023. Tâm Luật Hợp tác xã năm 2023 geh 8 rmôt nău kơl n’hanh nău kan công nghiệp geh ntop kơl êng. Đă gưl ủy, n’gâng kan ƀon lan ăp n’gâng kan, Ban nău kan an uănh mĭn kơl an nuĭh kan gay ntop kơl nuĭh ƀon lan tă bah ƀư ntoh măt bah khân pơng, geh nău nĕ ri nău kơt dŏng rgâl mrô, kơt dŏng khoa học công nghệ, kơt dŏng ăp nău ntrŭnh an tâm di, ăp nău dơi geh tâm di nkra njêng tĭng nău kan ndoh ndơ kơt nĕ mư geh rgâl ta nkual bah n’gor.

Dơi mĭn lah, ăp năm bah năp wăng sa nsum ta Dak Lak lĕ hun hao mpeh rnoh geh n’hanh n’hao mpeh uĕh kah, rgop dŭt têh tâm nău rgâl trong nkra njêng, n’hao nău khlay ndơ, rgop rgâl muh măt thôn ƀon./.