Lor bôk năp ta n’gor Dak Lak, nuĭh ƀon lan hăn ƀư siƀŭt ta phường mbra dŏng trí tuệ nhân tạo (AI) gay ƀư ăp ntil siƀŭt. Nău dŏng công nghệ mhe mô dơn kơl rhuăt glêh mông nar, dơh glêh rêng ƀư siƀŭt ma hôm mpơl nău nsrôih bah Dak Lak tâm rdâk njêng jâng nsing ƀư siƀŭt ma keh mbrô, rhŏ dŏng geh nău dơi nuĭh ƀon lan n’hanh doanh nghiệp. 

Ntŭk rgum ƀư siƀŭt phường Tân Lập n’gor Dak Lak hŏ năp âk máy móc têh uĕh mhe, ma ntoh lư lah bar máy tính n’glăp dŏng trí tuệ nhân tạo (AI), ntop kơl nuĭh ƀon lan pơk joi, nôp hồ sơ n’hanh tĭng groi nđôi rnoh ngăch ƀư siƀŭt bah ngai. Nô Lê Văn Toàn hăn ƀư siƀŭt khai sinh an kon an gĭt, nô dơi nuĭh kan ta aơ ntĭm nti dŏng công nghệ AI dŭt geh nău tam.

“Ăp băl đoàn viên druh ndăm ntop kơl he nchih mbơh nău lư, lôch nê máy in êng phiếu. Nău ƀư giấy khai sinh aƀaơ dơi ntêng lêng đah ntŭk mât prăp nău lư ntŭk gŭ n’hanh bảo hiểm, dŭt dơh ngăch. Nkre đah AI lăp ƀư siƀŭt kơl rhuăt glêh mông nar, rêng ƀư siƀŭt dơh ngăch.”

Ta ntŭk ƀư siƀŭt phường Tân Lập, geh 9 chuyên viên n’hanh 1 cán bộ bưu điện mât uănh nău kan dơn n’hanh mplơ̆ lôch jêh ƀư siƀŭt ma bưu chính, ndrel 4 đoàn viên druh ndăm ntop kơl pet lât an nuĭh ƀon lan. yuh Lê Thị Nguyên Hạnh, cán bộ bưu điện, an gĭt ăp nar yuh ntop kơl ntơm bah 30 – 40 tơ̆ nuĭh ƀon lan dŏng AI lam lĕ rngôch:

“He mbra pơk lăp tâm phần mềm AI, lôch nê nuĭh ƀon lan ŭch ƀư siƀŭt ri khân păng lât ta máy tính ri mbra mpơl luh siƀŭt he ƀư. Ntĭt kơt ŭch ƀư siƀŭt đăng ký rgâl nkô̆ tăch rgâl ri phần mềm bah AI mbra n’gluh ăp njuat ƀư gay đă ƀư ăp siƀŭt he ŭch, lôch nê he mbra ntĭm nti an nuĭh ƀon lan gay nuĭh ƀon lan nchrăp siƀŭt khlay, lôch nê gâp mbra ntĭm nti nuĭh ƀon lan scan hồ sơ lôch nê nôp sŏng dăng gay hŭch đêt njuat ƀư siƀŭt an cán bộ nkra ƀư tâm trôm.”

An dŏng AI ƀư siƀŭt, phường Tân Lập dŏng bar ứng dụng, bah Viettel n’hanh VNPT. Du ứng dụng ntop kơl cán bộ chuyên viên pơk joi nău lư siƀŭt ngăch; ứng dụng hôm ƀa ƀă rgum ntop kơl nuĭh ƀon lan pơk lăp ƀư siƀŭt bah ngai. Kơp ntơm bah nar 1/7 tât aƀaơ, rlău 900 hồ sơ hŏ dơi dơn, tâm nê rlău 400 hồ sơ dơi nkra na nê̆ ta ntŭk, hôm ƀa ƀă nkra ƀư ma ndơ pơk lăp n’hanh rhŏ dŏng bưu chính công ích. Wa Nguyễn Mạnh Hà, Groi kruanh UBND phường, Giám đốc Ntŭk rgum ƀư siƀŭt phường Tân Lập lah rjăp, nău n’glăp AI tâm rnôk dơn n’hanh kra  ƀư hồ sơ mô dơn kơl cán bộ hăr blău lât ƀư ma hôm n’hao săk blău rhŏ dŏng an nuĭh ƀon lan đŏng:

“Mpôl hên hŏ mbơh nkoch trêng lam hvi an nuĭh ƀon lan rƀah gĭt. Nuĭh ƀon lan tât ƀư siƀŭt, mpôl hên an ăp oh nô ntĭm nti an nuĭh ƀon lan njêng ăp hồ sơ ngăch dơh lơn. Aƀaơ dôl ƀư ma ti, jêh aơ tay mbra mĭn tât nău dŏng máy, he ƀư siƀŭt djăt ma mbơh gĭt dơm n’hanh máy mbra n’gluh an tay.”

Nău dŏng AI ta phường Tân Lập lah du gâl tâm njăr trong hăn tât rgâl mbrô lam n’gor. Nar 10/7 mhe aơ, Dak  Lak hŏ ntơm lăp dŏng 4 jâng nsing mbrô tơm khlay rhŏ dŏng an n’gâng kan bar gưl: jâng nsing trí tuệ nhân tạo ntop kơl nuĭh ƀon lan pơk joi, nôp hồ sơ; jâng nsing rhŏ dŏng ƀư siƀŭt pơk lăp bah ngai; dashboard (pet lât bah ngai) ƀĭt juet lăp rgum rhŏ dŏng an mât bôk kan ăp gưl; n’hanh trong nkra nău lah bah ƀon  lan.

Lôch hăn ôp uănh na nê̆ nău dŏng trí tuệ nhân tạo nkra ƀư siƀŭt ta ăp  xã phường, wa Đỗ Hữu Huy, Groi Bí thư Tỉnh ủy, Groi Kruanh Ban Rnâng kan Ban rđău đă mpeh hun hao khoa học, công nghệ, rgâl blău mhe n’hanh rgâl mbrô n’gor Dak Lak lah rjăp, aơ lah njuat hăn dŭt khlay gay n’hao nău dơi tam- nău dơi ngăn bah trong ƀư siƀŭt tâm rơh mhe:

“Rnôk n’glăp phường, xã ri rnoh têh hvi lơn, rnoh âk cán bộ âk yơn đah rnoh dăp rduăl nău kan dơi tâm pă gưl an xã phường dŭt mpưm ri nău dŏng AI lah dŭt n’hâm khlay. Nău an ƀư ri phường lah nuĭh nhŭp ti nchŏng kan, lah nuĭh an ƀư na nê̆ ăp siƀŭt ri ân rƀah gĭt kloh n’hanh ntĭm nti nuĭh ƀon lan joi dơi di ndơ ma nuĭh ƀon lan ŭch n’hanh he ân nkra ƀư dŭt ngăch.”

Nău Dak Lak lor nchrăp an dŏng AI tâm nkra ƀư siƀŭt, ntơm bah tâm dâng, an saơ nău nsrôih tĭng ƀư jêng ngăn ngăn n’gâng kan mbrô, rgâl mbrô nkre đah rhŏ dŏng nuĭh ƀon lan. aơ lah njuat hăn khlay tâm rnôk rdâk njêng jâng nsing ƀư siƀŭt têh uĕh mhe, kloh rvah, nsĭt geh nău dơi./.