Hoà Thịnh-nkuăl geh khuch ngăn, jâk ngăn tâm rnôk geh dak bŭk lơh hô ngăn tâm khay 11 năm e, rnôk aơ dôl ma ndal nchrăp ăp nau kan njrăng rdâng. Êp ăp ngih mhe geh dăp prêh gay ma der dak bŭk, geh ndâk tă bah “Nau kan Quang Trung”, 13 ngih rdâng ma dak bŭk lơh nsum mpôl dôl geh ndâk. Tĭng wa Phương Văn Lành, Bí thư Đảng uỷ xã Hoà Thịnh, đah 13 ngih gay ma rdâng đah dak bŭk, ăp ngih geh nau dơi ân lăp gŭ nklăp 200 nŭih, nkuăl mra dơi geh đăp mpăn tâm nau kan joi ntŭk gŭ der đăp mpăn ân kônh wa jêh geh dak bŭk hao têh. Nau kan nchrăp nŭih kơl ndrel ntĭm nti nau kan dơi rdâng kơl an kŏ geh ƀư: ‘Xã Hoà Thịnh dôl ma rgum âk nau kan gay ma rdâng, njrăng ma dak bŭk tâm yan mih dak lip tât. Ngăn lah, xã mhe rlau aơ lĕ ntrŭnh ƀư ndâk 13 ngih gay ma der dak bŭn nsum. Xã ko tâm rgop nsum ma N’gâng kan Njrăng rdâng nau tât khuch ƀư nau ntĭm mbơh nau blau, nau kan dơi mpeh nau njrăng rdâng trôk nar lơh, rdâng ma mih dak lip ân kônh wa, nkre lah nchrăp duk mpan ndrel ao nthông ân ăp thôn gay ma dơi nchrăp. Êp nê, xã kŏ ndrel ndơn ăp ca nô đah nau dăng têh gay kơl an nau kan rdâng, njrăng phŭt dak lip lơh’.

 Tâm êp ma Hoà Thịnh, xã Hoà Mỹ kŏ lah xã ƀa ƀơ geh nau nkri khuch bah dak bŭk lơh. Nau geh ơm mô lăng blau tâm nau rdâng ma dak bŭk tâm dŭt năm e geh nkuăl rhuăt nau blau rjăp.  Wa Nguyễn Hữu Thuận, Bí thư Đảng uỷ xã Hoà Mỹ, n’gor Dak Lak mbơh:‘Phung hên hŏ nchrăp ăp ndoh ndơ ân ăp ƀon lan du mlâm duk gay ma dơi geh tâm pleh tâm kơl ƀư nau kan hăn kơl an ân nŭih mâp khuch tâm ntŭk. Ăp thôn kơt nê mra geh du rmôt kan hăn kơl an yor druh ndăm, ƀon lan tâm rgop ƀư tâm jă kơl an”.

Yan mih năm 2026, ăp ntŭk kan, rmôt kan tâm n’gor dak Lak hŏ n’hao nau kan, nchrăp mra leo rđau đă 24 rbăn cán bộ, tahen ndrel geh nklăp 35 rbăn ndơ dŏng, ndơ nchrăp gay ma kơl nau leo ntrơn ƀon lan, leo nau kơl an ndrel rklaih nkre nau khuch khat tâm ntŭk yor mih dak lip tât geh ndal. Trung tá Phạm Thành Long, Groi rđau kan, Rnâng kan rđau tahen njrăng rdâng nkuăl 6, N’gâng kan tahen n’gor Dak Lak, mbơh: ‘Ƀư nau kan pă ndoh ndơ dŏng, ndoh ndơ hăn kơl an, nau kơl an ndal rnôk tât khuch tât 18 rnêng kan rđau kan tâm xã tâm nkuăl geh nau khuch gay tŏng ăp mprh rnoh nŭih ndrel rmôt ƀư nau kan ndal. Tâm nê, kơl an âk lơn mpeh rnoh nŭih ân ăp xã ndrel ăp nkuăl geh nau khuch tât ndal, ƀa ƀơ geh ma nau tât khuch mih dak lip, ngăn lah tâm yan mih têh”./.